Qartaıyp, nashar kórdi Maımyl kózi,
Oılady em eterge oǵan ózi.
«Kóz azsa - Kózildirik emi» degen
Tıetin qulaǵyna jurttyń sózi.
Bes-alty Kózildirik Maımyl tapty,
Birazyn quıryǵyna tizip, taqty.
Qarady birin ıiskep, birin jalap,
Bir mezgil tóbesine qoıyp jatty.
Paıda joq ıiskese de, jalasa da,
Qoıyp-aq ár jerine qarasa da.
Maımylǵa kózildirik em bolmady,
Adamnyń kózderine jarasa da.
«Joq, - dedi, - tıtimdeı de paıda tipten,
Májnún bul shynydan darý kútken!
Jaqsy-aq dep Kózildirik, shýlaýshy edi,
Bári de jalǵanshy eken adam bitken.
Sózderi jurttyń aıtqan bári jalǵan,
Men jarym jalǵan aıtqan sózge nanǵan.
Kórmedim jaý alǵyrdan eshbir paıda,
Eńbegim bosqa ketti izdep talǵan!»
Qarańyz, Maımyl ne etti sonda turyp?
Bir tasqa urdy bárin laqtyryp.
Ashý men jarymdyqtan paıda bar ma,
Kúl-kúl bop Kózildirik qaldy synyp.

* * *
Alǵanǵa bul keńeste ǵıbrat bar,
Maımylsha is etetin kóp nadandar.
Paıdaly zatty ornyna jumsaı almaı,
Sógetin paıdasyz dep joq pa adamdar?!

---