InfoHub Logo

«Sıfrlyq Qazaqstan» memlekettik baǵdarlamasynyń aıasynda Shymkent mektepterindegi jumysqa qabyldaý prosesi elektrondyq júıede júrgiziletin bolady. Bul týraly Shymkent qalasynyń ákimi Ǵ. Ábdirahymov Úkimettiń keńeıtilgen otyrysynda baıandady.

«Sıfrlandyrý maqsatynda muǵalimdi jumysqa qabyldaý avtomattyq júıesi engizildi. Bul qyzmetti qazirgi tańda onlaın rejımde alýǵa bolady. Elektrondyq ótinish joldap, konkýrsqa qatysýǵa jaǵdaı jasalǵan. Nátıjesinde aryzdar 90 paıyzǵa azaıyp, muǵalimderdiń  sapalyq quramy ósti. Bul baǵytty damytý aıasynda mektepke jumysqa qabyldaý elektrondyq júıede bolady», — dedi Ǵ. Ábdirahymov.

Ákimniń aıtýynsha, osy júıe arqyly 2109 ótinish qabyldanyp, 1063 onlaın konkýrs ótkizilgen. Nátıjesinde 780 kandıdat jumysqa alynypty.

Sondaı-aq, ol Shymkent qalasynda «aqyldy qala» jobasy barlyq baǵytta qarqyndy júzege asyrylyp jatqanyn, búginde birqatar nátıjelerge qol jetkizilgenin aıtty.

«Qaladaǵy 459 balabaqshaǵa balalardy qabyldaý jáne joldama berý avtomatty júıesi engizildi. Bul júıe – balany elektrondy túrde kezekke qoıýǵa, joldama alýǵa jáne balabaqsha aýystyrýǵa múmkindik beredi. Bul óz kezeginde balanyń elektrondyq pasportyn quraıdy. Eń bastysy – sybaılastyq táýekeldik joıylyp, ata-analardyń memlekettik organmen tikeleı baılanysy toqtady. Sybaılas jemqorlyqtyń 18 táýekeli joıylyp, balabaqshaǵa qabyldaý boıynsha aryzdar 80 paıyzǵa azaıdy», — dedi ol.

Al, bilim salasyn sıfrlyq júıege ótkizý bolsa oqýshynyń oqý úlgerimin arttyrýǵa, muǵalimniń qyzmet sapasyn kúsheıtýge óz yqpalyn tıgizip jatyr eken.

«Bul júıe Shymkent qalasynyń barlyq mektebine engizildi. Nátıjesinde balalardy mektepke bólý jaqsaryp,  3 aýysymdy oqytý qalpy joıyldy. Úshinshiden, barlyq 128 mektepte elektrondyq jýrnal jáne kúndelik júıesi engizildi.  Mobıldi qosymshany engizý ata-ana men oqýshy arasyndaǵy baılanysty kúsheıtti. Balanyń oqý úlgerimi, sabaqqa qatysý men baqylaýǵa múmkindik berdi. Osynyń arqasynda oqýshylardyń sabaqqa sebepsiz qatyspaýy 22 myńnan 2 myńǵa tómendedi. Oqýshylar arasyndaǵy quqyq buzýshylyq 75 paıyzǵa tómendedi. Olardyń sabaq úlgerimi 12 paıyzǵa artty», — dep atap ótti Shymkent ákimi.

Onyń aıtýynsha, sıfrlandyrý balabaqsha jumysyn aıtarlyqtaı jeńildetken. Balabaqshalar avtomattandyrylyp, kezekke turý sıaqty máseleler onlaın formatqa kóshipti.

«Osynyń arqasynda 3 jastan 6 jasqa deıingi balalar kezegi 2 jarym esege azaıdy. Iaǵnı, 46 myńnan 18 myńǵa deıin azaıdy. Buǵan deıin balabaqshaǵa joldama berý úshin 3 aıda 1 ret komısıa otyrysy bolatyn. Al, qazir bul proses táýlik boıynsha avtomatty túrde onlaın rejımde júrgiziledi», — dep túıindedi ol.

Aıta keteıik, «Sıfrlyq Qazaqstan» memlekettik baǵdarlamasy aıasynda «aqyldy qalalardyń» tıptik tujyrymdamasy vıse-premer-mınıstr Asqar Jumaǵalıevtiń bastamasymen qolǵa alynyp, Aqparat jáne komýnıkasıalar mınıstrligi jáne «Zerde» ulttyq ınfokommýnıkasıa holdıńimen» júzege asyrylýda. Al, Shymkent qalasyndaǵy sıfrlandyrý prosesi bilim berý, densaýlyq saqtaý, turǵyn-úı komýnaldyq sharýashylyq jáne qaýipsizdik syndy salalardy qamtýda.

---