Pavlodar «Smart City» konsepsıasyn júzege asyrýda úlgi bolýy kerek – N. Nazarbaev
Memleket basshysy Pavlodar oblysyna jumys sapary barysynda sıfrlandyrylǵan Pavlodar munaı hımıasy zaýytynyń jumysymen tanysyp, «Sıfrlyq Qazaqstan» baǵdarlamasy aıasynda jasalyp jatqan mekemelerdi aralady.
Qazaqstan Prezıdenti zaýyttyń ókilderimen kezdesý barysynda óndiris ornyna jańa tehnologıalar engizilgenin tilge tıek etip, olar óndiretin ónimge suranys artyp jatqanyn atap aıtty.
«Sizder eń zamanaýı zaýytta jumys isteısizder. Munda óndiristi sıfrlandyrý isi qolǵa alynyp, jańa tehnologıalar engizilýde. Sizder óndirip jatqan ónimge degen suranys artyp keledi, demek, sizderdiń de tabystaryńyz molaıa túspek», — dedi Nursultan Nazarbaev.
Sondaı-aq, Prezıdenttiń óńirge sapary aıasynda oblystyń áleýmettik-ekonomıkalyq damý máseleleri jóninde keńes ótkizilip, Pavlodar oblysynyń ákimi Bolat Baqaýovtyń baıandamasy tyńdaldy.
«2017 jyldyń qorytyndysy boıynsha oblystyń jalpy ónimi alǵash ret 2 trıllıon teńgeden asyp, 3,6 paıyzǵa jetti. Bıylǵy birinshi jarty jyldyqtyń qorytyndysy boıynsha óndiris kólemi 4,6 paıyzǵa artty. Oblys kásiporyndaryndaǵy óndiris úderisterin sıfrlandyrý jónindegi Sizdiń tapsyrmańyz oryndalýda. Tehnologıalyq turǵydan qaıta jabdyqtaý isine 200 mıllıard teńgeden astam qarjy jumsaldy», — dedi oblys ákimi.
Elbasynyń aıtýynsha, Pavlodar oblysynda bilim salasyn sıfrlandyrý boıynsha pılottyq joba anyqtalypty. Jalpy aıtqanda óńirde 80 jobany júzege asyrý jumystary júrgizilýde.
«Smart City» tujyrymdamasyn tolyǵymen engizip, úlgi bolý kerek», — dedi Memleket basshysy.
Aıta keterligi, Pavlodar oblysynda sıfrlandyrý prosesteri jan-jaqty júrgizilýde. Barlyq salalarda qarqyndy jumystar iske asýda. «Sıfrlyq Qazaqstan» baǵdarlamasynyń aıasynda 100 memlekettik balabaqsha sıfrlyq tehnologıalarmen qamtamasyz etilmek. Sıfrlyq saýattylyqty arttyrý maqsatynda oqytý jumystary júrgizilýde. Máselen, jaz aılarynyń aralyǵynda 16 myń adamnyń elektrondyq saýatyn ashý josparlanyp otyr eken.
Ol boıynsha bilikti mamandar sabaq júrgizedi. Kýrs barysynda aldymen kompúterde jumys isteý tásilimen tanysyp, «Elektrondyq Úkimet» portalynyń múmkindikterin jáne onda memlekettik qyzmetterdi alýdy meńgeredi. Sondaı-aq, bilim berýdiń biryńǵaı aqparattyq júıesi — Bilim Land júzege asyrylýda. Búginde bul júıege oblystaǵy 371 mekteptiń 362-si qosylypty.
You Might Also Like
-
Atalmysh oblysta sıfrlandyrý aıasynda mektepteriniń 80%-y ınternetke erkin shyǵý múmkindigine ıe boldy. Bul jaıynda búgin Úkimettiń kezekti otyrysynda Aqtóbe oblysynyń ákimi Berdibek Saparbaev aıtty.
