InfoHub Logo

İsim ońsyn deseńiz,
Sol istiń mamany bolyńyz.
Dańqym shyqsyn deseńiz,
Kópshiliktiń adamy bolyńyz.

Ábý Nasyr Ál-Farabı

Adam ómirindegi basty qundylyqtardyń biri – durys mamandyq tańdaı bilý. Sebebi, armanyńdy maqsat-muratqa aınaldyrý jolynda, eńbekke degen qushtarlyqty oıatýshy, ol – janyń qalaǵan is, súıikti mamandyq..

Bala shaqtan óz aldyńa tulǵa bolyp sheshim qabyldaıtyn sát – mamandyq tańdaý. Degenmende, búgingi kúni qynjyltatyn jaǵdaı jasóspirimderdiń sanasyndaǵy basty talap, arman qýý emes, ómirlik sheshimniń túıinin baldyq kórsetkishtiń sheshýi. Osy kúni qanshama jas stýdentter qalamaǵan mamandyqtyń arasynda óz ornyn tappaı áýrelikpen ýaqyttaryn ótkizýde. Al, keıbiri janymen berilip, túsken mamandyǵyna talappen izdeniste ary qaraı jalǵastyrýda. Qoǵamdaǵy bundaı jaǵdaıdyń bolýy durys baǵyt- baǵdardyń berilmegendigi, túsindirý sharalary men ata-ananyń balaǵa degen salǵyrttyǵynan týyndaıdy.

Júsipbek Aımaýytov atamyz aıtqandaı: «Mamandyqtyń jamany joq, biraq onyń kez kelgenine ıkemdilik qajet,bul jaı kúneltý, tamaq asyraýdyń ǵana joly emes, úlken ónerdi, zor sheberlikti qajet etetin nárse». Naqyl sózdiń oqyrmanǵa berer mán-mazmuny aqyl-keńes retinde kórinse, basqalar úshin tereń oıdan týǵan astarly sóz ispetti. Bolashaǵyńnyń irge-tasyn qalaýǵa sapaly bilim men tıanaqty oı ushqyrlyǵy qajet ekenin ańǵartady.

Ómir atty uzaq joldyń qıyndyǵyn eńserýge jaqsy kásip pen kemeńger danalyq jeteleıdi. Men osy kúni Ál-Farabı atyndaǵy QazUÝ-niń stýdentimin. 2018 jyly ashylǵan Fılosofıa jáne saıasattaný fakúlteti, dintaný jáne mádenıettaný kafedrasyndaǵy «Islamtaný» mamandyǵynyń shákirtimin.

Kóptiń pikirinshe ıslamtaný degen tek meshitterdiń aınalasymen shekteletin mamandyq túri sıaqty. Shyn máninde, Islamtanýshy degen kim? Onyń qyzmeti qandaı? Keleshekte ne jumys atqarady deıtin suraqtar birshama adamǵa kóleńkeleý.

Islamtaný – ıslam dininiń qaǵıdalary men erekshelikterine, mádenıetine, tarıhyna, qoǵam men dinı uıymdar júıesine etene jaqyndatatyn salanyń bir túri. Rýhanıattyń kemeldenýine, ózara sheshim shyǵarýǵa baǵyttaıdy. Al, ıslamtanýshy degenimiz – osyndaı musylmandyq senimdi, dinı-saıası qozǵalystardy oqyp úırenýshi. Islam dininiń fılosofıasymen qanyǵyp, qorshaǵan ortaǵa durys saraptama júrgizýge mashyqtanady. Ál-Farabıatyndaǵy QazUÝ-ti mol múmkindikter mekeni, stýdentterdiń bilimge yntasyn oıatyp, kerekti jaǵdaılarmen qamtamasyz etip otyrady. Máselen, shetelge shyǵyp(Túrkıa; AQSH; Qytaı t.b.), ózge memleketterdiń teorıasymen tanysyp, tájirıbe almasýǵa sebepker, bul qarapaıym stýdenttiń úmit otyn jaǵyp, aldyǵa qaraı talpynýyna aıtarlyqtaı kómek. Kafedramyzda bilim alý úshin sońǵy tehnologıamen jabdyqtalǵan kabınetter, izdenimpaz jastar úshin sarqylmaıtyn kitaptardyń qory – kitaphana syndy kóptegen jaǵdaı qarastyrylǵan.
Ýnıversıtet - meniń maqtanyshym, al meniń mamandyǵym qazaq eline qyzmet etip qalanýǵa sebepker bolatyn kásibim.

Prezıdentimiz Qasym-Jomart Toqaev óz sózinde: «Qazaqstan – daryndy jastar mekeni. Erteń elimizdiń abyroıyn asyratyn da – osy talantty ul-qyzdar. Biz olardyń órisin ashyp, qarym-qabiletin shyńdaý úshin bar múmkindikti jasaýǵa tıispiz»,- dep jastardyń keleshegine mol úmitpen qaraıtynyn jetkizdi.

Ár salanyń ókili týǵan jerine paıdasyn ártúrli jaǵynan tıgizedi, al biz, ıslamtanýshylar – memleketimizdiń tynyshtyǵy men beıbitshiligin saqtaý úshin halyqtyń dinı saýatyn ashyp, adasýshylyqtyń, qarańǵylyqtyń aldyn alamyz. Otan bizge baqytty balalyq shaq syılaǵan bolsa, endigi kezek sol bala shákirt qanat qaǵyp, eliniń irgesine eńbegimen qalanady.

Qorytyndylaı kele, ómirińniń jas shaǵynda ilim izdep, tabandylyqpen asqar shyńdardy baǵyndyrý, alǵan bilimińniń nátıjesi synalar shaqta tárbıe alǵan ordańnyń atyn bıik dárejede shyǵarýdy murat etip, mamandyqtyń qyr-syryn durys meńgerýdi kózdeý qajet. Men sıaqty, úlken tulǵalar men bilimdi shákirtterdi shyǵarǵan Ál-Farabı atyndaǵy QazUÝ-de oqyǵyńyz kelse, oılanbastan tańdaýdy usynamyn.

Ál – Farabı atyndaǵy QazUÝ-dyń “Islamtaný” mamandyǵy 2 kýrs stýdenti: Nýrtaeva Elnaz  

---