InfoHub Logo

Búgingi kún keshegi kúnniń shákirti ekeni belgili. Men búgingi tańda elordamyzdaǵy eńseli oqý ordasy Eýrazıa ulttyq ýnıversıtetiniń 4-kýrs stýdentimin. Kúni keshe ǵana Ulttyq Biryńǵaı Testileýden oblys boıynsha eń joǵarǵy nátıjege qol jetkizip, mektep tarıhyndaǵy tuńǵysh «Altyn belgi» ıegeri atanǵan jas túlek edim. Armanym astanada oqý bolatyn. Oryndaldy.

Ordaly oqý orny da bar osynda,
Armandaǵan qurby-qurdas, dosym da.
Baǵym janyp, bilim alyp kelemin 
Abyroımen aıaqtasam, tilegim!

dep óleń de shyǵaryp úlgerippin. Abyroımen aıaqtaýǵa da sanaýly kúnder qaldy. Qımaımyz. Óıtkeni, esten ketpes erekshe estelikter syılady, tanymal tulǵalarmen tanystyq, suhbattastyq, syrlastyq.

Úlgili, úzdik stýdent bolýdy maqsat tutqan meniń mektep kezindegi jetken jetistikterim óz jemisin bere bastady. Oqý jyly bastalǵan ýaqytta Stýdentter spartakıadasynda gir tasyn kóterý saıysynda júldeli ekinshi orynǵa ıe boldym. Kóp ýaqyt ótpeı fakúltettegi «Bizdiń maqtanyshtarymyz» taqtasynda, álemge áıgili boksshy G.Golovkınmen sýretim qatar turdy. Keýdemdi qýanysh kernep, stýdenttik ómirdiń sáýleli sátteri bastalyp ta ketti. 

Ýnıversıtetimizdiń «Eýrazıa» gazetine birneshe maqalalarym jaryq kóre bastady. Ǵylymı konferensıalardan da jeńimpaz atanyp úlgerdim, degenmen kóńilim qalaǵan taǵy bir sala óner edi. Kastıngte oqýshy kezimde oınaǵan nemistiń rólin taǵy bir márte somdadym, óleń oqydym. Ónerimdi baǵalady. Solaı, «Shańyraq» stýdenttik teatrynyń múshesi atandym. Jastar jylynda «Úzdik jastar teatry» nomınasıasyn jeńip aldyq. «Bala ǵashyq», «Jaraly gúlder», «Adaspańdar» spektáklderinde oınadym. «Er Jigit-2018» baıqaýyna qatystym. Birneshe aqyndardyń óleńderin jatqa oqyp, batasyn da aldym. Elge tanymal tulǵalarmen, depýtat, mınıstrlermen qatar, ánshi-kúıshilermen, óner juldyzdarymen, sportshylarmen, ǵalymdarmen kezdesip, ómirlik aqyl-keńesterin tyńdaý baqyty buıyrdy. 

Elimizdiń tarıhynda erekshe oryn alar «EHRO-2017» halyqaralyq kórmesi kezinde ýnıversıtet qoldaýymen erikti bolyp aıtýly sharaǵa óz úlesimdi qosqanymdy maqtanyshpen eske alamyn. 

Stýdent atanǵaly bir armanym – áskerı kafedraǵa túsý bolsa, ekinshisi – shetelge shyǵý bolatyn. Árıne, aldymen Allanyń qalaýymen armandarym oryndalyp keledi. Eki jyldyq áskerı kafedrada, vzvod komandıri bolǵanymdy eskerip, aqyly bólimnen tegin bólimge aýystyrdy, zapastaǵy leıtenant shenimiz de bolady. Keıin, túrik tili kýrsyna jazyldym. Túrkıa eline qorytyndy kýrsqa bardym. Oqý Denızlı qalasynda boldy, Antalıa, Izmır, Kapadokıa, Stambýl qalalaryn aralap, túrik mádenıetimen tanystym. 

«BILIM-ORKENIETI» ulttyq ǵylymı-zertteý ortalyǵy uıǵarymy boıynsha «Qazaqstannyń úzdik stýdenti-2020» tósbelgisiniń ıegeri atandym. 
Stýdenttik tórt jylym tekke ótpedi dep sanaımyn. Erekshe estelikter men mol múmkindikter syılaǵan Eýrazıa ulttyq ýnıversıteti – súıikti bilim ordam retinde júrek tórinen oryn alary sózsiz! Raqmet saǵan EUÝ! Men senimen maqtanamyn. Sen de menimen maqtanatyn bolasyń!!!

Qalybek Qulshar

---