InfoHub Logo

Muǵalim aýladaǵy balalardy jınap alyp oqyta bastaǵan kezde, adamdar tańdanysyp qaldy.

Sóıtse de balalardyń sabaqqa degen yntasy ádettegi mektebine barǵan kezdegiden de anaǵurlym joǵaryraq edi. Olar sabaq ýaqyty jaqyndaǵan kezde dereý oıyndaryn doǵara salyp, dápterleri men qalamsaptaryn alǵan kúıi álgi muǵalimniń páterine qaraı asyǵyp bara jatatyn.

Osy bir páterge qonystanǵan erli-zaıypty jandarǵa jurttyń nazary alabóten aýǵan edi. Adamdar olardy erli-zaıypty muǵalimder eken deıdi.

Kıim kıisi men ózin-ózi ustaýy jaǵynan oqyǵan-toqyǵan jan ekendigi baıqalyp turatyn osy bir er adam men onyń janyndaǵy sulýsha júzdi jubaıyn aýladan kórýge bolar edi. Olar jarasymdy túrde qoltyqtasqan kúıi qatarlasa ketip bara jatady.

Jurttyń nazary, ásirese, er adamnyń jubaıyna kóbirek aýady. Sebebi áıel musylmandyq ǵuryp úlgisimen kıinetin.

- Olar ózi senderge ne oqytyp júr? - dep suraıdy ata-analar balalarynan.

- Olar bizge túrik tilin úıretedi, biz túrik tilin úırenip júrmiz, - deıdi balalar ata-analaryna. - Bizge sabaqty er muǵalim júrgizedi. Ol áripterdi asyqpaı, yjdaǵatpen úırete bastaıdy. Bul kezde onyń jumysyna jubaıy aralaspaıdy. Ol as bólmede bolady jáne bizge táttiler pisiredi. Al kúıeýi sabaǵyn aıaqtap bolǵannan keıin, ol bizdi táttilermen syılaıdy.

- Olar, shynynda da, balalardy jaqsy kóredi eken, - deıdi ata-analardyń biri. - Men olarmen sóılesken edim. Bul olardyń tabıǵı minezi me, álde kásibine saı ustanymy ma, bilmedim? Ózderi balalardy qatty jaqsy kóretindigi týraly aıtty.

Balalar birte-birte qara tanı bastady. Olar tipti keıbir jekelegen sózderdiń maǵynasyn ajyratyp aıtyp ta bere alatyn boldy.

Al bir kúni erli-zaıypty jandar basqa páterge qonys aýdaryp ketti.

Sol-aq eken, aýladaǵy jaǵdaı baz baıaǵy qalpyna túsken edi. Balalar endi dápterleri men qalamsaptaryn ustap sabaqqa asyǵyp bara jatatyn ýaqyttarynda aýlada burynǵysynsha asyr salyp oınap júretin boldy. Olardyń dápterleri de bir buryshta umytylyp qaldy. Ózderi de birte-birte bilgenderin umyta bastady.

Al bir kúni olar osy bir páterde osyndaı bir erli-zaıypty jandardyń turǵandyǵyn da múlde umytyp ketti.
 

---