Nazarbaev: Stýdentter úshin qosymsha 20 myń grant bólinip, 75 myń oryndyq jataqhana salynady
2018-2019 oqý jylynda stýdentterge qosymsha 20 myń grant bólinetin boldy. Memleket basshysy Nursultan Nazarbaev bul jumysty QR Parlamenti palatalarynyń birlesken otyrysynda belgilengen bes áleýmettik bastamanyń biri ekenin atady.
«Búgingi tańda elimizdegi JOO-larda 530 myńǵa jýyq jas óren bilim alyp jatyr. Olardyń ishindegi 30 paıyzy memleket bólgen grant boıynsha oqýda. Joǵary bilim berýdi qoljetimdi ári sapaly etý úshin kelesi sharalardy usynamyz. 2018-2019 oqý jylynda jyl saıyn bólinetin 54 myń grantqa qosymsha taǵy 20 myń grant bólgeli otyrmyz. Ol granttardyń ishindegi 11 myńyn, múmkindik bolsa odan da kóbin suranys bar tehnıkalyq mamandyqtar boıynsha bakalavrǵa bólý josparlanýda. Bul qadam Tórtinshi ónerkásiptik revolúsıa jaǵdaıynda jańa ekonomıkada suranysqa ıe bolatyn myńdaǵan mamandardy daıarlaýǵa múmkindik beredi. Bul jerde ınjenerler, aqparattyq tehnologıalar salasy men robototehnıka, nanotehnologıa salasyndaǵy mamandar týraly aıtyp otyrmyn. Bul da memlekettiń jastarǵa qoldaýy bolyp tabylady», - dedi Memleket basshysy.
Nursultan Nazarbaevtyń aıtýynsha, barlyq JOO-larda tehnıkalyq, aýyl sharýashylyǵy mamandyqtary boıynsha Ulttyq JOO-lar deńgeıinde jańa granttardyń qunyn ósirgen jón.
«Bul sharalar joǵary bilim berýmen orta mektepterdiń oqýshylaryn kóbirek qamtýǵa jol ashady. Bul - adamı kapıtalǵa, demek bilimge salynǵan salym. Ekinshi jaǵynan, álemdik standarttar boıynsha bilim júıesin jasaı otyryp, stýdentterdiń ómir súrýi jaǵdaıyna basa mańyz berýimiz kerek. Qalalyq emes jastardyń bir parasy qala shetinen baspana jaldaýǵa májbúr ekenin bilesizder. Ondaı jaǵdaıda sapaly bilim jaıly qalaı aıtýǵa bolady. Búgingi tańda JOO-lar men kolejderdiń stýdentterin jataqhanamen qamtý máselesi ótkir bolyp otyr. Osy máseleni sheshý úshin memlekettik-jekeshelik áriptestik aıasynda jataqhana turǵyzý qolǵa alynady. Memleket óz tarapynan BǴM (QR Bilim jáne ǵylym mınıstrligi - avt.) arqyly ınvestısıalardyń bir bóligin jataqhana qurylysyna jumsaýǵa kepildik beredi. 2022 jylǵa deıin 75 myń oryndyq stýdenttik jataqhana salýdy tapsyramyn», - dedi Nursultan Nazarbaev.
Eske sala ketsek, qazirgi ýaqytta QR Parlamenti palatalarynyń birlesken otyrysy ótkizilip jatyr.
QazAqparat
You Might Also Like
-
Ekonomıkadaǵy jáne ónerkásiptegi tyńshylyqtyń paıda bolý tarıxy tereńde jatyr. Shirkeý qyzmetshisi Fransýa Ksaveniń jumystary ónerkásiptegi tyńshylyqtyń alǵashqy jetistikteri boldy. Ol 1712 jyly qytaı ...
