InfoHub Logo

Ult qaıratkeri Saıyn Shapaǵatovqa

Osynaý dúrbeleń dúnıe, mazasyz da qym-qýyt ǵumyr-pánıge adam-pende balasynyń jalǵyz ret qana jaratylatyny qandaı tylsym syrǵa toly, jumbaq deseńizshi! Qaı-qaısymyz da alqara kók túnde kók júzinen aǵyp túsetin juldyzdar tárizdimiz. Bir kún bolmasa, bir kún jaryq dúnıeden attaný jaratylystyń zańy bolǵasyn amalyń qansha? «Árkimniń mańdaıyna jazylǵan taǵdyry, tirshilik - ǵumyrynyń ólshemi bar» desedi káriqulaqtar. «Dúnıe-jalǵan-aı, ómir ótip barady» dep árbir kúnin sanaıdy eken burynǵylar. «Qaıtkenmen de «jazmyshtan ozmysh joq» ekendigi ózinen-ózi túsinikti. Sondaılyq jaratylys zańy bola tursa da, jandy beıne, otty keýdeniń bir mezette jer astyna tyǵylyp, jany baqıǵa máńgilikke joǵalatynyna tipti de sengiń kelmeıdi-aý. Óldi deýge qalaı aıtsań da qımaıtyn, óz qudiretine ılandyrmaı qoımaıtyn Táńirim jaratqan áýlıeler de bar shyǵar. Sondaı árýaqty er, asyl týǵan arǵymaqtarymyzdyń biri de biregeıi Sen ediń!

Ótken túnde taǵy da túsime kirip, kózimdi ashsam, kádimgideı-aq úıimniń tórinde otyr ekensiń...

Kettim dep ortamyzdan jasyma, Aǵa,
Ediń ǵoı kóz tirińde jasyn dara.
Erlerdi óldi deýge kim senedi –
Jaralǵan elden erek asyl, dana, -

degen óleń joldary eriksizden til ushyna orala berdi..

Al sen bolsań baıaǵy báz qalpyńda, júziń uqsap jalyn atqan jarqylǵa, jon arqań men tula boıyń jaldanyp, uqsamaı túk jurt oılaǵan marqumǵa:

Kelip turdyń túngi uıqyńnan selt etip,
Men de oıandym qıaldy alys sermetip,
Qushaǵyńdy jaıyp maǵan qaraısyń,
Janarymnan jas tóksem be seldetip?!
Ór júzińde óshpes alaý lapyldap,
Janyma bir keldiń dersiń jaqyndap.
Kózderinde qaısar minez márttigiń,
Jer qushsań da júr ekensiń jalyndap.
Men oıladym: sendik júrek toqtamaı,
Soǵar deısiń máńgi laýlar ottardaı.
Kelip turdyń, kelip turdyń janyma,
Ón boıyńda úzilmeıtin toq bardaı.
Baýrap aldyń azamattyq tulǵamen,
Endi ǵana Kún shyqqandaı nurly álem.
Rýhyńnyń óshpesine sendim de,
Júgingenmin júrek jardy jyrǵa men.
Tańǵa salym uıqymdy aldyń demes em,
Óziń menen suhbattasam, keńesem.
Seniń menen suraıtynyń - el jaıy,
Sol elińdi alǵa bastar kemesi eń,
Ortamyzdan erte kettiń nege sen?!
Týǵan jerdiń oılaıdy endi qamyn kim,
Jurttyń júzin alǵan bılep saǵym-muń.
Qysylǵanda shyǵatuǵyn tý ustap,
Suńqar syndy ór júzińdi saǵyndym,
Halqyń syılar qasıetińe tabyndym.
Qadirińdi endi bilgen eliń de,
Qyrany ediń qalyqtaǵan kóginde,
Týǵan dala namysty ulǵa zar bolyp,
Tumsa tirlik alǵan jaýlap teginde.
Ózdik qamyn qamdaýmenen kimiń de,
Kúnder kúıbeń jatyr ótip búginde.
Qazaq qashan El bolady
Er týyp,
Ulttyq rýh turar esip únińde?!

...Taǵy da ózińmen syrlasamyn. Sen elińdi birlikke, batyldyqqa, qaısarlyqqa, aqyl men aıla, parasat pen paıymǵa, er júrektilik pen erkindikke úndeısiń. Jaǵympaz ben jádigóı, alaıaq pen arsyzdardy júndeısiń. Týǵan dala tósin qımaı jaraly, Ashý menen Yza-

Kekten túteısiń...
Ospadar men oısyzdarǵa,
Oıran salǵan mısyzdarǵa,
Rýhy páseń qansyzdar men
Ashqaraqtanǵan toıymsyzdarǵa
jol bergiń kelmeıdi!

Kózińniń tirisinde olardy han yǵardaı qaharyńmen, qanjar sózderińmen tilgilep, úrkitýshi ediń. Erkin de egemendi el bolamyz degende erte sónip ketken Sholpan Juldyzym-aı!!!

Sen jer astyn qushsań da, kıeli topyraǵyń úshin, qasıetti el-jurtyń úshin janyń maza tappaı azalanýda. Óli árýaqtardyń kıesi atyp, kórsoqyr keýde jazalanýda...

Túbinde Ádilettiń keleri anyq,
Dúnıede ozyq oıdyń jeńeri anyq.
Erlerdiń baǵasyna jetedi aqyr
Erteńin oılaıtuǵyn dana halyq.
... Kúnder, aılar, jyldar ótip jymysqy,
Jazatyn bir qaıda kezder tynysty?
Qaıran, erim, bul ómirden sen ótip,
Jalyn atqan jaýyryn bizdiń qurysty.
Dem beretin, lep beretin, Mazdaǵym,
Qalaı ushyp barady appaq Qazdarym?
Sen uıqyńnan tura kelshi kenetten,
Dúr silkinsin dúnıe qýǵan qazaǵym!
...Sen meniń qasymdasyń,
Adamgershilik muratyńmen,
Adam degen uly atyńmen,
Arqaly tulǵań menen,
Azamattyq keskinińmen,
Abzal kelbetińmen,
Aqjarqyn qalpyńmenen,
Qaraqan bastyń qamy emes,
Eliń menen jerińniń
Kelipsiń jaıyn suraýǵa.
Kıem bop eles berdiń be,
Sózimdi elge jetkizer
Jan ǵoı dep maǵan sendiń be?
Úıime keldiń taǵy da,
Otyrdyń tórde, ardaǵym,
Kele ber solaı janyma
Ólmese degen armanym.
Ózgege namys bermegen
Tentek te tekti tarpańym!
Jatsań da jerdiń astynda
Taıǵaqty joldar týǵanda
Elińdi qolda, árýaǵym!

---