InfoHub Logo

Janna ekinshi klasta oqyp júr edi. Bir kúni ol kitabynan «Oqyǵannyń kózi ashyq. Oqymaǵan adam soqyr bolady» degen maqaldy oqyp kórdi de:

— Bul ne degen sóz? — dep surady.

— Oqyǵan adam kópti biledi. Kóziniń ashyq bolatyny sodan. Al oqymaǵannyń dúnıeden habary az bolady. Bul soqyrmen teń etedi, — dedim men.

Bul jaýapqa Janna yrza bolmaı qaldy.

— Mine, ájem oqymaǵan. Sonda da soqyr emes qoı. Al sen qyzmetten kelseń-aq boldy, otyryp alyp, oqı beresiń, oqı beresiń. Sonda da kózińniń ashyq eshteńesi de joq. Ájemniń kózindeı, — dedi.

Nesin jasyraıyn, jaýap taba almaı, kúmiljip qaldym.

Sóıtip balamyz ekeýmiz «daýlasyp» otyrǵanda, Janna oqystan qolyn sıalap aldy. Ol tazalyqty jaqsy kóretin. Ústi-basy kirshiksiz, jınaqy júrýshi edi. Sol daǵdysyna baǵyp jýyna bastady. Sıa daǵy birden kete qoıa ma! Tyrnaǵynyń kóbesinde, saýsaq arasynda qalyp qoıdy. «Ystyq sýmen jý», — degen ájesiniń tilin alam dep, kúıip te qala jazdady. Meniń kómektesýime týra keldi. Áýeli men oǵan:

— Qolyńdy sýla, — dedim.

Janna aıtqanymdy oryndap, qasyma keldi. Men bir tal sireńke shyrpysyn aldym da, kúkirtimen sıanyń daǵy bar jerlerdi ysqylap jiberdim. Sodan keıin qyzym qolyn jýýy muń eken tap-taza bolyp shyǵa keldi.

— Muny kimnen kórdiń papa? — dep surady qýanǵan Janna.

— Eshkimnen kórgen joqpyn. Kitaptan oqydym. «Oqyǵan adamnyń kózi ashyq» degen, mine, osy.

Áńgimeniń mánine Janna endi túsindi-aý deımin, kúlimsiregen qalpy oılanyp qaldy.

---