InfoHub Logo

Ońtústik Qazaqstan oblysynyń ákimi Janseıit Túımebaev  QR Bilim jáne ǵylym mınıstri Erlan Saǵadıevpen kezdesti. 

Júzdesý barysynda Elbasy Joldaýy júktegen bilim men ǵylymdy damytýdyń memlekettik baǵdarlamasy talqylanyp, bilim berý mazmunyn jańartýdyń negizgi baǵyttary jóninde sóz qozǵaldy. 

Ońtústik óńirine issaparmen  kelgen Erlan Kenjeǵalıuly bazalyq oqýlyqtar ázirleýge qatysty mınıstrlik júrgizip jatqan reformalardy sóz etti.

«Elimizde bilim salasyna erekshe mán berilip otyr. Jańa zamanǵa saı talaptar retimen engizilýde. Biz osyndaı qadamdar arqyly Qazaqstandaǵy bilim berý júıesin kútilgen standarttarǵa jetkizemiz. Taǵy bir jańalyqtar - elektrondy portal. Bul óz kezeginde muǵalimderdi qaǵazbastylyqtan bosatady. «Kúndelik» portaly men oqýshylardyń UBT jáne basqa da emtıhandarǵa daıyndalýyna kómekshi qural bolatyn «Vilim Land. Kz» ınternet portaly iske qosylyp otyr. Mektepterdi ınternetpen jáne ınteraktıvti taqtalarmen qamtý da basty nazarda bolady», - dedi mınıstr.

Bilim jáne ǵylym mınıstrligi bıyldan bastap jalpy bilim beretin mektepterdiń muǵalimderin atestattaýdyń jańa qaǵıdalaryn ázirlep shyqty.  Budan bólek, balabaqshalarda, mektepterde, kolejderde jáne JOO-larda memlekettik baqylaý sheńberinde táýekelderdi baǵalaý júıesi boıynsha jańa tásilder qoldanyla bastady.

Elimizde árbir besinshi bala ómirge keletin óńir respýblıka kóleminde eń kóp oqýshylar toptasqan aımaq bolyp sanalady. Ár jyl saıyn mektep tabaldyryǵyn attaıtyn balalar 30 myńǵa kóbeıip otyr. Jylyna ortasha eseppen 80 myńǵa jýyq náreste dúnıege keledi. Sondyqtan da kúngeıde sońǵy kezde  mektep tapshylyǵy týyndaýda. Áli kúnge úsh aýysymmen oqıtyn bilim oshaqtary bar.

«Jalpy, búginde oblysymyzda 1021 mektep bar. Aldaǵy 5 jylda 205 mekteptiń qurylysyn júrgizýdi josparlap otyrmyz. Elbasymyzdyń Joldaýyn iske asyrý barshamyzǵa mindet. Osy oraıda elimizdegi bilim men ǵylym júıesiniń aldaǵy reformalaryn birlese atqarýǵa nıettimiz. Ózimniń osy saladaǵy tájirıbem men bilimimdi bólisýge qashanda ázirmin», - dedi Janseıit Qanseıituly.

Aıta keteıik, oblysta "Balapan" baǵdarlamasy aıasynda 3 pen 6 jas aralyǵyndaǵy balalardy mektepke deıingi uıymdarmen qamtý máselesi basty nazarǵa alynyp otyr.  Aldaǵy 3 jylda memlekettik-jekemenshik áriptestik aıasynda balabaqshalar sanyn 100 paıyzǵa jetkizý josparlanýda. Kezdesý sońynda Bilim jáne ǵylym mınıstrligi men oblys ákimdigi Ońtústik óńirindegi bilim salasyndaǵy kúrmeýli máselelerdi birlese sheshýge  ýaǵdalasty.

---