InfoHub Logo

Atlassian kompanıasynyń bas baǵdarlamashysy jáne «Iandekstiń» burynǵy qyzmetkeri Dmıtrıı Sorın reseılik iri İT-korporasıa «Iandekstegi» jumysy jóninde jazdy. Avtor kompanıaǵa jumysqa ornalasý, ondaǵy jalaqy kólemi, qyzmettik mansap jóninde jáne «Iandeksten» jumystan ketýiniń sebebin ashyp aıtty.

Men 2012 jyldyń basynda «Iandeks» kompanıasynda jumys isteý úshin, Sankt-Peterbýrgten Máskeýge qonys aýdardym. Munan keıingi 5 jylda Firefox-ke arnalǵan keńeıtýler jasaıtyn maman retinde qyzmet ettim. Ol ǵana emes, «Iandeks.Bardyń», Firefox pen Chrome-ǵa arnalǵan «Elementter» men «Vızýaldy Belgiler» jasaýǵa atsalysyp, «Telebaǵdarlamalar» (tv.yandex.ru) frontendiniń, «KınoPoısktiń» (plus.kinopoisk.ru) jańa túriniń jáne ishki kıno jáne TV-jobalardyń jasalýyn basqaryp, test qurýshylardy avtotest jazýǵa úırettim. 2017 jyldyń qańtar aıynda Atlassian-de Senior Software Engineer qyzmetine jumysqa ornalasý úshin, «Iandeks» kompanıasyndaǵy qyzmetimdi doǵaryp, Sıdneıge kóshtim.

Bul maqala – «Iandeks» kompanıasynda 5 jyl atqarǵan eńbek tájirıbemniń mazmuny. Kompanıada meni kóp nársege úıretken bilikti mamandarmen tize qosyp, birge jumys istegendikten, esh shúbásiz jolym boldy deı alamyn. Sonymen qatar keńeıtýler, jobalar jasaýshy retinde ǵana emes, «people management» retinde basqarý qyzmetin atqarǵanymdy úlken baq dep bilemin.

Múmkin, munda da birdeńe jetispeıtin bolar. Biraq ol – keıinnen qaıtyp kelip, ózińdi tekserý úshin saqtaýǵa turarlyq mańyzdy dúnıe.

«Iandeks» kompanıasyna jumysqa ornalasý qıyn ba?

Árıne, jumysqa ornalasý qıyn, biraq múmkindik bar. Óz basym kompanıaǵa qyzmetke keler aldynda 6 ret suhbattan óttim. Alǵashqy ekeýi sátsiz boldy. Munda tek bir qaǵıda bar: baıqap kórińiz, suhbattan óte almasańyz, osal tustaryńyzdy jetildirip, qaıtadan talpynyńyz. «Iandeks» kompanıasynda qyzmet atqarǵan 5 jyl ishinde kóptegen úmitkermen suhbat ótkizdim. Biraq olardyń qatarynda kemshilikterin túzep, qaıta baǵyn synaıtyndar az.

Kompanıada pozıtıvti kóńil-kúıdiń mańyzy zor: eger áldeneni bilmeseńiz, ýaıymdamańyz. Tipti, sizben suhbat ótkizip otyrǵan mamannyń da barlyǵyn bilýi múmkin emes. Eń mańyzdysy – aldyńyzǵa qoıylǵan mindetti atqara bilýińiz, úırenýge qabilettiligińiz, jaǵymdy kóńil-kúı men tabandylyq.

Men úshin suhbattaǵy eń mańyzdy qasıet úmitkerlerdiń pozıtıvti ári syndarly oıy bolǵan edi. Árıne, boıyńnan atalǵan qasıetter tabylsa da, suhbatqa daıyndalýǵa tıissiz.

Kompanıada sizben salystyrǵanda, biliktilik deńgeıi anaǵurlym joǵary mamandar kóp

Bastapqy kezde buǵan sený óte qıyn, sebebi ózińdi bilikti, minsiz maman sanaısyń. Alaıda «kompanıa úshin esh paıdam joq» degen oı týyndamaýy tıis. Aıtqym kelgeni, bul jerde sizdiń jetilýińizge kómektesetin, bilgenin úıretetin mamandar kóp. Iaǵnı munda úırene alasyz jáne kemeldenýge múmkindik bar.

 «Iandekstegi» jalaqy

«Iandeks» kompanıasyndaǵy jalaqy naryqtaǵy ortasha jalaqy mólsheri tómen degen pikir qalyptasqan. Iá, jalaqy sál tómen bolýy múmkin, biraq bizdegi ishki qyzmet kórsetý joǵary deńgeıde, al qyzmetkerler – adam retinde de, maman retinde de ǵajap jandar. Sonymen qatar tamaq úshin ótemaqy tólenedi. Áleýmettik paketke min taǵa almaıtynyń taǵy bar. Atalǵandar jalaqy mólsheri tómendiginiń qarymyn qaıtarady. Alaıda, jalpy alǵanda, Reseı boıynsha «Iandeks» kompanıasynyń qyzmetkerleri jaqsy tabys tabady. Eger men Mail.Ru Group nemese Jetbrains-ke jumysqa ornalassam, jalaqy mólsheri aıtarlyqtaı artpaıtyn edi.

Jalpy «Iandekste» jalaqy ár jarty jyl nemese jyl saıyn ózgerip otyrady. Biraq ol jóninde kompanıada qyzmetin jalǵastyrýshylar menen artyq biledi.

Qyzmetten keterden jarty jyl buryn men alǵashqy shekteýli aksıalar paketine qol jetkizdim. Vestıngti (aksıa alý quqyǵyna ıelený) kútpesten, aksıalar paketine qol jetkizdim. Iaǵnı birinshi shırektegi vestıngke jarty jyl qalǵanda jumystan kettim.

Kompanıada qyzmetkerlerge arnalǵan aksıalar qarastyrylǵan. Belgili bir qyzmettik deńgeıge jetken mamandar revú qorytyndysy boıynsha aksıalarǵa ıelene alady. Iaǵnı shekteýli aksıalar paketine qol jetkizý ádben múmkin. Ol úshin bilikti ári basshylyq baǵalaıtyn qyzmetker bolý kereksiń. Oǵan qosa basqarýshy óz tobynyń jetistigine nemquraıly qaramaýy tıis. Eger sizde shekteýli aksıalar paketi bolmasa, biraq ózińizdi aksıalarǵa ıelenýge laıyq sanasańyz, basqarýshyńyzben sóılesip kórýińizge bolady.

Work-life balance — «Iandeks» kompanıasyna qatysty emes

Eger «Iandeks» kompanıasynda jumys istep, joǵary jalaqyǵa ıelenip, mansapqa qol jetkizýmen qatar jeke ómirińizge ýaqyt bólip, januıańyzben demalýdy oılasańyz, qateleskenińiz. Mundaǵy qyzmetkerler jumysyna shyndap berilgen. Olar tynbaı jumys istep, túrli jobalardyń iske asyrylýyna atsalysyp, túnimen ne demalys kúnderi kod jazýdan jalyqpaıdy.

Dese de Máskeýde turatyn áriptesterimniń ishinde otbasy men qyzmetin qatar alyp júrgenderi de az emes. Sondyqtan ol sizdiń jumysqa degen qatynasyńyzǵa, tobyńyz daıarlap jatqan ónimge baılanysty.

Kompanıada túrli jobalar kóp

Bir jobamen aınalysý jalyqtyrsa, basqasyna aýysý múmkindigi bar. Mamandy daıyndap jatqan ónimniń jalyqtyrýy, basqarýshysynyń qysastyq jasaýy nemese tehnologıalarǵa kóńili tolmaýy múmkin. Sondyqtan onyń ózge jobaǵa aýysýyna esh narazylyq bolmaıdy. Tipten, ol úshin barlyq jaǵdaı qarastyrylǵan: bizdegi HR qashanda kóńilińizge jaǵymdy jumys taýyp bere alady. Kezinde men de medıa qyzmet salasyna aýysyp, múldem ózge toppen qaýyshqan edim.

Siz «Iandeks» kompanıasyna jumys isteýge kelgende, bolashaq áriptesterińizden qyzyqtyratyn dúnıelerdiń barlyǵyn jaı-japsaryna deıin surap alyńyz: ónimge qatysty jospar qandaı, toptar arasyndaǵy josparlaý men olardyń ózara árekettestigi qandaı negizde qurylǵan, sizdiń bolashaqtaǵy tobyńyz qandaı baǵytty ustanady. Osy saýaldardyń barlyǵyna jaýap alǵanyńyz jón.

Bul rette bolashaq basqarýshyńyzben de tildeskenińiz abzal. «Iandeks» - úlken kompanıa. Onyń bir bólimindegi joba zamanaýı ári belsendi bolsa, kelesi bólimdegisi aıtarlyqtaı mańyzsyz, qajetsiz bolýy múmkin.

Mansap jolynda órleý

Bastapqyda men úshin kompanıadaǵy mansap múldem túsiniksiz edi. Tek basqarýshy qyzmetin atqarǵannan keıin ǵana ol jóninde tolyq túsinik qalypasty. Sondyqtan qazir aýyz toltyra aıta alatyndaı pikirim bar. Kompanıada jospar boıynsha jumys istep, usaq-túıekke bola basqarýshymen sóz talastyrmaý kerek. Sonymen qatar sáttiliktiń serik bolǵany da artyq etpeıdi.

- Jospar boıynsha jumys isteý. Sizden talap etiletinini – tapsyrylǵan mindetti jyldam ári sapaly atqarý. Oǵan qosa jumysyńyzdyń atqarylýyndaǵy ár qadamyńyz anyq bolýy tıis. Ol basshylyqtyń sizge júkteletin mindet pen onyń iske asyrylý merzimin anyqtaýy úshin qajet. Eger aǵymdaǵy jobadan tys ózge mindetterdi atqarýǵa kóshseńiz, ónimge qatysty jospardy buzasyz.

- Basqarýshyńyzben daýlasý

- Joǵaryda aıtqanymdaı, sizge qysastyq jasaıtyn, qolastyndaǵy qyzmetkerlerdiń órleýine qyzyǵýshylyq tanytpaıtyn nemese jumys tájirıbesi az basqarýshyǵa tap bolýyńyz múmkin.

Dese de, bul tek meniń pikirim. Ol basqarýshy retinde maǵan qajet bolǵan áreketter men isterge negizdelgen. Bálkim, sizdiń basqarýshyńyz qabyldanǵan ár sheshim úshin daýlasqandy unatatyn bolar. Nemese jolyńyz bolmaı, alǵa qaraı jyljymaıtyn, esh ózgeris oryn almaıtyn bólimde qyzmet etetin bolarsyz. Ne de bolsa, basshylyqpen tildesip, sizden talap etiletin qasıetter men mindetter týraly bilip alǵanyńyz jón.

Turǵyn úı qaryzy

Basqa qalalarda páter satyp alý máselesi qandaı ekenin bilmeımin, biraq Máskeýde páter alý – qıyn. Turǵyn úı quny – qymbat, al ıpoteka – qoljetimsiz. Keı adamdar Máskeý mańynan úı alyp, jumysqa elektrıchkamen qatynaıdy.

Osyǵan baılanysty, «ıandekstik» turǵyn úı qaryzy (úsh jylǵa beriletin paıyzsyz qaryz) – páter alýdy maqsat etken jandar úshin úlken demeý. Beriletin qaryz mólsheri jalaqyńyzǵa baılanysty, sondyqtan jumysqa ornalasqan boıda qaryz alýǵa asyqpaǵanyńyz jón. 2015 jyly «ıandekstik» turǵyn úı qaryzynyń kómegimen eki bólmeli páterge ıelendim. Kompanıadan jumystan shyqqan kezde, qalǵan qaryzdy birden tóleý kerek.

Kompanıada qyzmet etetin adamdardyń barlyǵy minsiz emes

Uzaq ýaqyt boıy kompanıada tek bilikti ári minsiz mamandar qyzmet etetinine shúbásiz senip keldim. Ókinishke oraı, kemshiliksiz dúnıe bolmaıdy.

«Iandeks» kompanıasyndaǵy qyzmtkerlerdiń basym kópshiligi – óz isiniń maman. Olarmen birge jumys isteý janǵa jaǵymdy. Alaıda biliktiligi tómen, búkil álemge ókpe artatyn nemese minezi nashar adamdar da bar. Bir qýanyshtysy, mundaı adamdar qatary az bolǵandyqtan, sırek kezdestiresiń.

Kompanıadaǵy áriptesterińizdiń isine min taǵa almaıtyndaı bilikti, adamgershiligi mol adamdar bolatyny anyq. Biraq bes saýsaq birdeı emestigin esten shyǵarmaǵaısyz.

Qoryta kele, «Iandekstiń» tamasha jáne Reseıdegi İT qyzmet úshin eń úzdik kompanıa ekendigin atap ótkim keledi.

«Kınoİzdeý» medıa qyzmetin qaıta iske qosý sátsiz bolǵandyqtan, kompanıada qyzyǵýshylyǵymdy týdyratyn is qalmady. Al jańa basshylyq servısti turaqtandyrýmen aınalysyp, bar nazardy soǵan aýdarǵan edi.  

Dál osy sebepti 2016 jyly shet eldik kompanıalarda suhbattan óte bastadym. Olardyń ishinen Atlassian kompanıasyn tańdap, 2017 jyly osy jerge aýystym. Atlassian kompanıasyn tańdaýyma túrtki bolǵan dúnıeler – kod jazý múkindigi men aǵylshyn tili boıynsha bilimimdi tájirıbe júzinde jetildirý.

---