InfoHub Logo

Erkindigin enshilep, egemendik tizginin qolyna alǵan memleketimizdiń Táýelsizdik týyn kóginde jelbiretkenine de mine, bıyl 25 jyl tolyp otyr! 25 jyl! Tarıh úshin qas-qaǵym bul sát, jumyr basty pendege ájepteýir ýaqyt. Jas jigittiń aqyl toqtatyp, ońdy- solyn tanyp, alǵa qaraı nyq basyp, ózin kórseter shaǵy desek, memleketimizdiń de tek alǵa qaraı damyp, órkendeý kezeńine de jetip otyrǵanyn kózimiz kórip otyr.

Bizdiń Otanymyz - Egemendi, Táýelsiz, Qazaq memleketi. 

Osynaý marjandaı tizbektele qalǵan sózderdiń astarynda-jatsa túsinen, tursa esinen bir sát ketpegen babalardyń ǵasyrlyq arman joly jatyr emes pe?                                                                                                                               

Tereńnen oılap, tebirene tolǵansań- halqymyzdyń barsha tarıhy osy Táýelsizdik úshin, halqymyzdyń bas bostandyǵy úshin kúrespen ótken eken.

Myń ólip, myń tirilgen qazaq eli qıly- qıly taǵdyr taýqymetin kórse de, ult retinde tarıh sahnasynda ózin- ózi saqtaı bildi. Halqymyzdyń qaısarlyǵy men tabandylyǵy arqasynda búginde erkindik samalynyń rahatyna bólenýdemiz.

Táýelsizdik - Qazaq úshin ǵajap qut.
Ǵajap qutqa júrmeıdi endi mazaq túk.
Bóri minez Babalardyń armany-
Aınalaıyn, altyn qanat-Azattyq!- dep, el Táýelsizdigine óshpesteı erlik isterimen óz úlesin qosyp ketken Qaırattaı aǵamyzdyń óleń joldaryn eske túsirsek, qazaq halqy ult bolyp uıyǵaly beri tap búgingideı birtutas, qýatty memleket quryp, óz taǵdyryn ózi sheshýge múmkindigi bolǵan emes. Qazirgi kúnde memleketimizdiń dúnıe júzindegi eń iri memlekettermen terezesi teń. Eshkimge jaltaqtap jatqanymyz joq.Osynaý jyldar ishinde elimizdi ǵalamǵa tanytqan kóptegen ıgi ister atqarylýda.  Qazaqstannyń  kók aspanynda kók týymyz jelbirep, Qazaqstan degen eldiń bar ekenin álem jurtshylyǵy moıyndaǵaly qashan. Búgingi tańda álem nazaryn ózine aýdaryp otyrǵan qazaq eliniń ár kúni, aıy, jyly jaǵymdy jańalyqtarǵa toly. Iá, elimizde beıbitshilik pen tynyshtyq zaman.

«Qazaqstan - birtutas jer, birtutas halyq jáne ortaq keleshek»- dep Elbasymyz aıtqandaı, búgingi tańda elimiz túrli ult ókilderimen bir shańyraq astynda yntymaǵy yrysty,birligi bekem bolyp, bir úıdiń balasyndaı jarasty ǵumyr keship, elimizdiń tolaǵaı tabystaryn arttyrýǵa óz úlesterin qosýda.

«El birligi – eń asyl qasıet» degen qaǵıdatty qaster tutatyn Elbasymyzdyń: « Elimiz aman, jurtymyz tynysh bolsyn.Táýelsiz el atanyp, buryn- sońdy bolmaǵan, ózgelermen terezesi memleket qurdyq. Dúnıe júzi syılaıtyn el atandyq. Sonyń bári - birligimizdiń arqasy!»-degen dana sózderin árqashan jadymyzda ustasaq artyqtyq etpeıdi.

Erkin eldiń qashanda armany asqaq,
Oı men eńbek ushtasqan qarbalas shaq.
Ulylaryn álemniń moıyndatyp,
Qazaq kóshin kelesiz alǵa bastap-dep, Baýyrjan Ońǵarbaev aǵamyz jyrlaǵandaı, el basqarý eshqashan da ońaı bolǵan emes. Al, Táýelsizdikke jańa ilikken eldi qıyn kezeńde basqarýdyń myń batpan aýyr júgin tek erdiń eri ǵana kótere alary anyq. Onyń ústine halqymyzdyń baǵyna qaraı, osynaý qıyn kezeńde el basqarý tizgini N.Á. Nazarbaev syndy óz jurtynyń arman- muńyn sezine biletin tájirıbeli saıasatker, bıik parasat ıesiniń qolynda bolýy da búgingi bıigimizge tolymdy tabystarmen jetýimizde az ról atqarǵan joq. Bir ǵana «EKSPO-2017» halyqaralyq mamandandyrylǵan biregeı ulttyq jobalar kórmesi memleket basshysy Nursultan Nazarbaevtyń álemdik deńgeıdegi bedeliniń qanshalyqty bıik ekenin tanytady.

Toqsan aýyz sózdiń tobyqtaı túıinin de Elbasymyzdyń mynadaı sózderimen aıaqtaıyn dep otyrmyn: «Táýelsizdik- táńirdiń urpaqqa bergen úlken baqyty,halqymyzdyń máńgilik qundylyǵy. Biz búginge deıin barlyq jetistikterimizge Táýelsizdiktiń arqasynda qol jetkizdik...          

Elińniń uly bolsań, elińe janyń ashysa, azamattyq namysyń bolsa, qazaqtyń ulttyq jalǵyz memleketiniń nyǵaıyp- kórkeıýi jolynda jan terińdi syǵyp júrip eńbek et. Jerdiń de, eldiń de ıesi óziń ekenińdi umytpa!

Iá,  «Halyqtyń kemeline kelip, órkendep ósýi úshin eń aldymen azattyq pen bilim qajet»- dep uly ǵalym Sh. Ýálıhanov aıtyp ketkendeı, elimizdiń baqytyn terbetken Táýelsizdigimiz baıandy, irgesi máńgi berik bolsyn. Súıikti Otanymyz - Azat Qazaqstandy qorǵaý búgingi urpaqtyń qolynda. Elimizdiń «Máńgilik El» bolýyna barshamyz at salysaıyq aǵaıyn!     

                                            Maqtaral aýdany, Asyqata kenti
«№121 jalpy orta mektebi» KMM
qazaq tili men ádebıeti muǵalimi
Týltaeva Perýza Almahanovna

---