InfoHub Logo

Oqý grantyn alýda «Altyn belgi» ıegeri tek bir ǵana basymdyqqa ıe bolady. Bul týraly Májiliste tilshilerge QR Bilim jáne ǵylym vıse-mınıstri Asqat Aımaǵambetov aıtty.

«Búgingi zań jobasynda qarastyrylǵan másele «Altyn belgi» ıegerlerine qatysty. Ózderińiz bilesizder, bul másele kópten beri talqylandy. Ótken jyldarda «Altyn belgi» ıegerleri grantty alǵanda, onyń tolyq basymdylyqqa ıe edi. Alǵan upaıyna qaramastan, olarda granttyń ıegeri atanýǵa múmkindikteri boldy. Ótken jyly UBT-nyń jańa formatyn engizdik. Osyǵan sáıkes, atestatty alý mektep qabyrǵasynda ótedi, sonymen qatar «Altyn belgini» de mektep ózi beredi. Iaǵnı, bul sharalar mektepte tapsyrylǵan emtıhanǵa baılanysty. Al Ulttyq biryńǵaı testileý búginde jańa fýnksıaǵa ıe. UBT tek qana joǵary oqý ornyna túsý úshin júzege asyrylady. Túlek JOO-ǵa UBT-ny tapsyrǵanda onyń «Altyn belgisi» qolynda bolady. Endi bıylǵy usynys aıasynda «Altyn belgi» ıegerleri bal upaılary teń bolǵan jaǵdaıda ǵana basymdyq beriledi», - dep túsindirdi Asqat Aımaǵambetov.

Osy oraıda eki túlek bir mamandyqqa birdeı upaımen barsa, ol kezde grant boıynsha basymdyq «Altyn belgi» ıegerine beriledi.

Aıta keteıik, Májiliste ótken jumys tobynyń otyrysynda osy baǵyttaǵy usynysqa depýtattar qoldaý jasady.

Bilim jáne ǵylym mınıstrligi ókilderiniń sózine qaraǵanda, buǵan deıin bul usynys muǵalimder men ata-analar tarapynan pysyqtaldy.

QazAqparat

---