InfoHub Logo

Ót qabyna tas baılanýdy keıde holelıtıaz dep te ataıdy.

Ót qaby – baýyrdyń aldyńǵy jaǵynda ornalasqan qapshyq tárizdes aǵza. Ol – baýyrda túziletin jáne maılardy qorytýǵa qatysatyn suıyq óttiń «ydysy». Ót qabyndaǵy tastar holesterın krıstaldarynan nemese sırek jaǵdaılarda tuzdardan túziledi. Bul tastar qum tárizdi usaq nemese grek jańǵaǵynyń kólemindeı úlken bolýy múmkin. Ótti ót qabynan ash ishekke jetkizetin ót jolyn tas bitep tastaǵanda holesıstıt nemese ót qabynyń shanshýy bilinedi.

Sebepteri

Ót qabyndaǵy tastar ót túziletin zattardyń tepe-teńdigi buzylǵanda paıda bolady dep esepteledi. Sondaı-aq óttegi holesterın mólsheriniń kóp bolýy da mańyzdy. Ótke tas baılanýdan bolatyn ustama kóbine maıly taǵamnan keıin baıqalady.

Belgileri

Ót qabynyń shanshýy kóbine ózdiginen joıylady. Tas ót joly arqyly ash ishekke ótkende aýyrsyný men basqa belgiler tyıylady. Eger tas ornynan jyljı almaıtyndaı úlken bolsa, aýyrsyný jalǵasa beredi jáne bundaı jaǵdaılarda tez arada hırýrgıalyq sharalar qoldaný kerek. Eger jalpy ót jolynda turyp qalsa, sarǵaıý baıqalyp (teri men kózdiń aǵy sarǵaıady), baýyr zaqymdanýy múmkin.

Asqynýlary

Ót qaltasyna baılanǵan tastardyń kóbi ót joly bitelip qalǵansha qaýipti emes. Ót joly taspen bitelgen jaǵdaıda ınfeksıa qosylyp, ót qaby, baýyr jáne uıqy bezi qabynady. Ót qabynyń jarylýy perıtonıtke alyp kelýi múmkin. Sozylmaly ót tasy syrqaty sondaı-aq ót qabynyń obyryna alyp kelýi múmkin. Aýyrsyný kezinde naýqas adam jatyp, tamaqtan bas tartýy kerek. Aýyrsynýdy basý úshin analgetıkter ishýge bolady. Eger ót qabynyń ustamasy 2 saǵattan uzaqqa sozylsa, mindetti túrde dárigerge júginý kerek. Oń jaq qabyrǵa astynda únemi aýyrsyný nemese jaǵymsyz áserler sezinseńiz, dárigerge kóringenińiz abzal.

Naqtamalanýy

Ót qabyndaǵy tastar, ádette, rentgenologıalyq jáne últradybystyq zertteý arqyly naqtamalanady.

Emi

Tastardyń kóbi «mylqaý» keledi, ıaǵnı esh belgi bermeı júre beredi. Bundaı jaǵdaılarda kóbine eshqandaı em qajet emes. Eger aýyrsyný ustama túrinde bolsa, holesıstoektomıa (ót qabyn otalaý arqyly alyp tastaý) jasalady. Keı jaǵdaılarda ót tastaryn eritetin preparattar taǵaıyndalady. Biraq tastar tolyǵymen erip ketýi úshin bul dárilerdi birneshe jyl boıy ishedi. Sondaı-aq jańa tastardyń ósýine jol bermeıtin sharalar qoldaný kerek.

Aldyn alý

Ót qaltasyna tas baılanýǵa jol bermes úshin tómendegi sharalardy eskergen jón:

-   artyq salmaq bolǵan jaǵdaıda qýattylyǵy tómen taǵam jep, dene jattyǵýlaryn jasaý;

-   maıly taǵamnan saqtaný;

-   ót qabynda tastyń bary anyqtalǵan jaǵdaıda áıel adamdardyń estrogendermen emdelýden saqtanýy tıis, óıtkeni estrogender tastyń paıda bolýyna yqpal etedi.

-   aǵzaǵa holesterınniń túsýin shekteý.

Hırýrg dárigerler: Ý. Valhanov, V.M. Kım,  R. Ajıbıev.

---