InfoHub Logo

QR Premer-Mınıstri Baqytjan Saǵyntaev «Sıfrly Qazaqstan» baǵdarlamasyn júzege asyrý boıynsha jaýapty basshylarǵa mindetter júktedi.

«Elbasynyń bıylǵy Joldaýynda Úkimetke sıfrlyq bilim berý resýrstaryn ary qaraı damytý boıynsha tapsyrma bergen bolatyn. Osy baǵytta qabyldanǵan «Sıfrly Qazaqstan» baǵdarlamasynyń sheńberinde Bilim jáne ǵylym mınıstrligi kóptegen sharýalardy atqaryp jatyr. Qazir ǵana mınıstrdiń (Erlan Saǵadıev - avt.) baıandamasyn tyńdadyńyzdar. Aqparattyq júıelerdi ıntegrasıalaý máselesi, kóptegen mobıldik qosymshalardy shyǵarý, mamandarmen halyqqa áli de túsindirý máselesi boıynsha kóp jumys júrgizilip jatyr», - dedi Úkimet basshysy.

Baqytjan Saǵyntaev degenmen negizgi máselelerdiń birine nazar aýdarý kerektigin eske saldy.

«Bilim berý mekemelerin kompútermen qamtamasyz etýge nazar aýdarý kerek. Qazaqstandaǵy birde-bir oblysta baıandamada kórsetilgendeı 100 paıyz qamtamasyz etilmegen (mektepter kompúterlermen -avt.). Almaty men Astana qalalarynda da sondaı. Aqmola oblysy 29 paıyz, Jambyl oblysy 22 paıyz, OQO 38 paıyz, Qyzylorda oblysy 40 paıyz... Eń joǵarǵy kórsetkish 82 paıyz - Atyraý oblysynda. Jyldyń sońyna deıin bul másele sheshimin tabady dep oılaımyn», - dedi ol búgingi Úkimet otyrysynda.

Úkimet basshysy keń jolaqty ınternetke qol jetkizý máselesin de umyt qaldyrǵan joq.

«Bul jerde de suraqtar bar. Degenmen, mınıstrlikterdiń baıandamalaryna baılanysty 2020 jyldyń sońyna deıin bekitilgen kestege sáıkes, biz alystaǵy eldi mekenderdiń bárine keń jolaqty ınternet jetkizemiz. Sol boıynsha jumystyń bári sheshiletin bolady. Degenmen, oblys ortalyqtaryn, qalalar men aýdan ortalyqtaryna keletin bolsaq, búgingi qol jetkizilip otyrǵan múmkindigimiz - 85 paıyz. 85 paıyzdy 100 paıyz kompútermen qamtamasyz etsek, kóp másele sheshiledi. Qalyp otyrǵany - 15 paıyz ǵana. 15 paıyz 2020 jyldyń sońyna deıin sheshiledi», - dedi Premer-Mınıstr.

Sóz sońynda Baqytjan Saǵyntaev qalalardy Wi-Fi-men qamtý máselesi týraly aıtty.

«Negizi qalalarda bunyń bárin sheshýge bolady. Astanada Wi-Fi-men qamtamasyz etý deńgeıi 54 paıyz ǵana. Almaty oblysynda 22 paıyz, Aqmola oblysynda 18 paıyz. Bul ońaı sheshiletin suraqtar. Buny ákimdikter qolǵa alý kerek dep oılaımyn. Qalalyq mektepterdiń bári keń jolaqty ınternetke - Wi-Fi-men qamtamasyz etiletin bolsa, bizdiń negizgi suraqtardyń bári tez arada sheshiledi dep oılaımyn», - dep túıdi Úkimet basshysy.

QazAqparat

---