InfoHub Logo

Sebepsiz saldar joq, qoǵamdaǵy san qıly jaǵdaıattar gazet sıpatynyń ózgerýine múmkindik jasady. Buǵan deıin «Alǵa» - «Vpered» gazetterin qarjylandyryp turǵan Ekibastuz aýdanynyń búdjeti nasharlaı bastady. Mine, osy kezeńde Amankeldi Qańtarbaıuly áli eshkim oıǵa ala qoımaǵan tyń qadam jasady.  «Vperedti»  jaýyp tastap, «Alǵanyń» negizinde qala men aýdanǵa birdeı taraıtyn qazaq gazetin ashýdy qolǵa aldy. «Vperedtiń» jabylyp qalýynan eshteńe joǵalmaıtyn edi, óıtkeni Ekibastuz qalasynda sol jyldary qalalyq «Zavety Ilıcha», «Shahtastroı», «Lenınskaıa Iskra», «Ýgolnyı Ekıbastýz», «Ognı Ekıbastýza» deıtin salalyq orys tildi gazetter bar. Redaktordyń bul usynysyn sol kezdegi bedeldi, ultjandy azamattar men aqsaqaldar - Adam Muhamedjanuly, Kóben Tólepbergenuly, Serik Jaqsybaev, Nurjan Tıshpaev, İrgebaı Satanovtar quptap, qoldaý jasaǵanmen bul nıet basshylar tarapynan úlken qarsylyqtarǵa ushyrady.

Áıtse de sol jyldardaǵy saıası oqıǵalar, Odaqta, onyń ishinde Qazaqstanda Kompartıanyń taratylýy basshy qyzmetterde otyrǵandardyń betperdesin ózgertýge dýshar etti. Iá, ádildik saltanat qurdy, aýdandyq, qalalyq keńestiń «qazaq gazeti ashylsyn» degen sheshimi shyqty. Ólketanýshy, belgili qalamger, ekonomıka ǵylymdarynyń kandıdaty Serik Imantaıuly Jaqsybaev jańa ashylǵaly otyrǵan gazetke «Otarqa» degen tarıhı mańyzy bar atty usynypty. Onyń mánisi bylaı: birde Buqar jyraý babamyz Abylaı hanǵa: «Ordańdy ýaqytsha basqa jerge kóshir»,- deıdi. Saryarqany, ásirese Kókshetaýdy qımaǵan han bul sózge nemketti qaraıdy. Sol kezde Qytaımen aradaǵy jaǵdaı qatty ýshyǵyp tursa kerek, Buqar sodan saqtanǵan ǵoı.

Sol saqtyǵyn hanǵa:

...Burynǵydaı baı el dep,

Otarqada qalmańyz,

Shúrshit kelse jaramas,

Aı-túıińe qaramas,-degen eken.

Uly jyraýdyń Saryarqany Otarqa ataýy tegin emes. Serik Imantaıuly: «Saryarqa aımaǵy tas kómirdiń ústinde tur. Tas kómir – ot, eki birdeı alyp elektr stansasy da  - ottyń ústinde tur,  sondyqtan gazetti «Otarqa» dep ataý kerek» degen ýájdi sózi quptalyp, aqyry 1991 jyldyń jeltoqsan aıynyń aıaǵynda Baspasóz jáne buqaralyq aqparat mınıstrligine tirkelip, táýelsiz eldiń alǵashqy qarlyǵashtarynyń birindeı bolyp, Ekibastuzdyń tuńǵysh «Otarqa» atty gazeti dúnıege keldi.

            Saıa Moldaıyp

---