InfoHub Logo

Gazettiń alǵashqy nómirine Amankeldi Qańtarbaıuly «Aǵaıynǵa arnaý sóz» atty súıinshilegen maqalasy men gazettiń eki quryltaıshysynyń, oblystyq, aýdandyq gazetterdiń quttyqtaýlary, jerles jazýshy, belgili qalamger Qalmuqan Isabaevtyń «Ótkir bol, «Otarqa» atty quttyqtaý-batasy jarıalandy. Iá, aıtary joq, ýaqyt óte kele «Otarqanyń» mán-mazmuny jaqsara tústi. Bir atap óterligi, «Otarqa» oblystaǵy qazaq basylymdarynyń arasynda alǵashqylardyń biri bolyp, 1996 jyldan bastap kompútermen terilip, bettelip, ofsettik basylymmen shyǵa bastady. Memlekettik tildiń qanat jaıýy, ata dástúr, ata kásip, ulttyq rýhanıat syndy taqyryptar birinshi kezekte qamtyldy. Halqymyzdyń tarıhyna, tarıhı tulǵalarǵa gazette kóp oryn berilip, ulttyq máselelerdiń júzege asýyna aıtarlyqtaı yqpal jasady. Máselen, qala men aýyldardaǵy   keıbir orys tilindegi aýyldardyń qazaqsha atalý qajettigi týraly másele kóterildi.

Ekibastuz qalasyndaǵy Ermak kóshesin Buqar jyraý atymen ataýǵa, Qalının kóshesine Estaı Berkimbaıuly, K.Marks kóshesine M.Áýezov, Kırov kóshesine S.Toraıǵyrov esimin berý týraly másele kóterip, óz degenine jetti. Sondaı-aq, Ekibastuz aýdanyndaǵy Stepnoı aýylyn Á.Marǵulan dep ataý týraly másele kóterip, 2-3 jyldaı gazet betinde jurtshylyqtyń hattaryn jarıalap, aqyry sol ataýlardy eldi-mekenderge bergizdi. «Otarqada» tarıhı tulǵalardyń mereıtoılaryna baılanysty arnaıy better, arnaıy nómirler uıymdastyrýdy ádetke aınaldyrdy. Máselen, Abaı men Jambyldyń 150 jyldyǵyna, Á.Marǵulannyń 90 jyldyǵyna, aıqarma better, Máshhúr Júsip Kópeevtiń 140 jyldyǵyna, M.Áýezov pen Q.Sátbaev, I.Baızaqovtyń 100 jyldyǵyna arnaıy nómirler arnaldy.

Sońǵy atalǵan tulǵalarǵa arnalǵan nómirler A-4 formatynda túptelip, 16-24 bettik bolyp, jýrnal esebinde shyǵaryldy. Gazettiń mundaı nómirleri Ekibastuz óńirindegi oqyrmandarǵa ǵana emes, sonymen qatar kórpshiles aýdandardaǵy turǵyndarǵa da áser etti. Baıanaýyl, Aqtoǵaı aýdandaryna taratyldy. Qanysh Sátbaevqa arnalǵan gazet nómirin uly ǵalymnyń qyzdary men jıenderi, týystary joǵary baǵalady. Árıne, qazirgideı ınternet áli keń jaıylmaǵan, memlekettik tildegi buqaralyq aqparat quraldary tapshy ýaqytta mundaı dúnıelerdiń kózi qaraqty oqyrman úshin mańyzy óte zor bolǵandyǵyn aıtý kerek. Mine, osyndaı ıgi isterdiń basy-qasynda Amankeldi Qańtarbaıuly boldy. Barlyǵy da sol kisiniń aıtýymen, uıymdastyrýymen júzege asty.

«Otarqa» - el Táýelsizdiginiń jarshysy boldy, sol jyldarda. Ár nómirdiń birinshi beti Táýelsizdik shejiresimen ashyldy.

Sonymen qatar, gazette aýdan men qalanyń ekonomıkasy, aýyl sharýashylyǵy, ónerkásibine qosa, «Imandylyq», «Shejire», «Ádebıet áleminde», «Adam.Qoǵam.Zań», analar men arýlar úshin «Araı», «Altyn sandyq», «Rýhanıat», jastarǵa arnalǵan «Jalyn», «Sport degen bir sıqyr...», balalarǵa arnalǵan «Baldáýren» syndy aıqarma better únemi shyǵyp turdy. Bul betterde halyqtyq tárbıe men pedagogıka, salt-dástúr keńinen nasıhattaldy.

Saıa Moldaıyp

---