InfoHub Logo

Qulanıektenip tań bilingen kezde Mekke - Mádıneden dúldúline minip, zulpyqaryn asynyp, ataǵy búkil álemge ketken Ǵazretǵalı paıǵambar jolǵa shyǵypty.

Onyń oıyna birneshe qyrǵyn soǵystardaǵy, tipti ózi tań qalarlyq bolǵan jeńisteri, «allalap ap» degende, kóldeneńinen paıda bola ketetin kúshi, keremet maıdandardyń shańy burqyrap, qyzyl qandar sý bolyp aqqan sýretteri elestedi.

Biraq bir uzyn aıaq sary masa yzyldap kóziniń aldynda, murnyna qanatymen syryp ótip byj-byj etip mazasyn ketirdi. «Er muryndy keledi, at erindi keledi» degendeı, jaryqtyq Ǵazretǵalıdiń muryny qoqyraıǵan úlken bolatyn. Al tanaýynyń tesigi anaý-mynaý shelekteı bar. Yzyldaǵan sary masa endi mazasyzdyǵyn burynǵydan da góri ulǵaıta tústi. Tipti dańdaısyp ketti. Bir kezde byj-byj etip án salyp keldi de Ǵazretǵalıdyń tanaýyna zyp berdi.

Ǵazretǵalı pysqyryndy da qaldy.

Jaryqtyq Ǵazret masadan qutylǵan soń jaılanyp dúldúliniń ústinde bir shirenip qoıdy. Ǵazretǵalı óziniń qulaq estıtin jerine qandaı kúshti, qandaı ataqty kúsh bolsa, onymen izdenip baryp kúsh synasý, sony qalaı da jeńip shyǵýdy aldyna mindet qylyp qoıǵan adam.

Ol qyryq qoıdyń etin jep, qyryq saba qymyzdy ishetin Darıǵa qyzdy izdep kelip kúresken eken.

Mekke - Mádınede jatqan Ǵazretǵalı jer júzinde bir úlken el bar, onda birneshe batyr bar degendi qulaǵy shaldy. Ol sońǵy bir jyl boıy sol eldiń eń kúshti degen batyrymen kúressem dep kúni-túni oıda boldy, aqyry sol elge barýdy durys dep taýyp, birneshe aı tynyǵyp kúreske kútinedi.

Minekı, Ǵazretǵalıdiń bul sapary osy kúshti eldiń bir batyrymen kúresýge shyqqan beti edi.

Kúnderdiń kúni Ǵazretǵalı Sovet eliniń bir shopanyna kezdesedi.

Ol ushy-qıyry joq jaıylyp jatqan semiz qoılardyń ana sheti men myna shetine kóz salyp:

— Bul qaı aýyldyń qoıy? — dep suraıdy.

— Bul qoı Sovet sovhozynyki.

— SSSR degen eldi bilesiń be?

— Bilemin, — dep shopan jón suraı bastaıdy.

Ol óziniń Ǵazretǵalı ekenin, SSSR eliniń batyrlarymen kúsh salystyrýǵa kele jatqanyn áńgimeleıdi.

— Elińizden shyqqaly qansha boldy?

Ǵazretǵalı kóp ýaqyt júrgenin aıtady. Sonda qoıshy turyp, SSSR - diń dúldúline minseń, alty aıshylyqty alty-aq kúnde júrer ediń deıdi.

Ǵazretǵalı ashýlanyp, meniń dúldúlime talasatyn dúldúl jer júzinde joq, ondaı dúldúl qaıda, onymen dúldúlimniń kúshin salystyramyn deıdi.

Shopan kúlip: «Onda, siz renjimeseńiz», — dep parovoz júretin joldy silteıdi. Shopannan jón surap alyp, Ǵazretǵalı jolǵa attanady.

Ol SSSR - diń dúldúlimen kezdeskenshe asyǵyp, dúldúlin orǵytyp júrip ketedi.

Sol kezde eki tanaýynan býyn burq-burq etkizip, aýzynan kóbik shashyp arqyraǵan qara aıǵyrdaı, alyp parovoz shyǵa keledi.

Sóıtkenshe Ǵazretǵalıdiń jaýyrynyna taıanyp qaldy. Arqyraǵan qara aıǵyr japan dúzde júrgen bul ne qylǵan jalǵyz jan degendeı, azynap aıqaı salǵanda daýsy gúrildep jer júzin jańǵyryqtyrǵandaı bolady.

Ǵazretǵalıdiń astyndaǵy dúldúli buryn kórmegen ózinen de daýsy zor úlken dúldúldi kórip, júregi ushyp yrǵyp - yrǵyp túsedi. Parovozǵa tań qalyp, úreıi ushyp, eki kózin soǵan tigip kele jatqan Ǵazretǵalı dúldúlinen qulap mert boldy.

Parovozda otyrǵan jas mashınıst qulyndaı oınap shyǵa kelgen dúldúldi kórip mynaý bir kórmege qoıarlyqtaı iri janýar eken dep, dúldúldi ustap alyp haıýanattar parkine ótkizdi.

Ǵazretǵalı eń sońǵy ret «alla» dedi. Mashınıstin qolyna túsken dúldúl: «Seniń túbińe «alla» baıaǵyda-aq jetetinin bilim edim», — degendeı ólip jatqan Ǵazretǵalıǵa qarap quıryǵyn shanshyp osqyryp jiberipti.

Ǵazretǵalı kezdesetin táńirin bilmeı júr eken. Dúldúlin SSSR Memleketiniń haıýanattar parkine ótkizdirip, ózi máńgilik náýim bazaryna sapar shekti.

---