InfoHub Logo

Burynǵy ótken zamanda bir patsha bolǵan eken. Onyń úsh qyzy, áıeli bolǵan eken.

         Patsha qalaǵa túspek bolyp, úsh qyzynan surapty:

         — Qyzdarym, ne alyp keleıin qaladan bazarlyqqa?

         Úlken qyzy túregelip:

         — Áke, maǵan marjan alyp kel! – depti.

         Keıin patsha ortanshy qyzynan:

         — Qyzym, saǵan ne alyp keleıin? – dep surapty.

         Ortanshy qyzy túregelip:

         — Maǵan bir altyn saqına alyp kel! – depti.

         Patsha eń kishi qyzynan surapty:

         — Qyzym, saǵan ne alyp keleıin? – dep.

         Kishi qyzy:

   — Áke, meni oılaısyz ǵoı, oılasańyz, maǵan bir jańǵaqtyń butaǵyn alyp kelińiz! – depti.

   Patsha «maqul» dep, arbasyn qostyryp qalaǵa júrip ketti. Qalaǵa baryp bir qansha jerge túsip tursa, bir kisi marjan alyp ketip barady eken. «Áı, kisi, marjanyńdy qanshadan satasyń?» – dep surapty.

         Kisi:

   — Bes somnan satyp júrmin, – depti. Bes somdy berip, marjandy qaltasyna salyp tursa, bir kisi altyn saqına alyp barady eken.

Patsha: «Eı, balam, qanshaǵa satasyń? – dep surapty. Ol bala: «Alty som», – depti.

Aqshasyn berip, saqınany qolyna taǵyp, arbasyna kelip minip ketti. Ketip bara jatyp bir baýdy kórip, «eń kishi qyzym maǵan jańǵaqtyń butaǵyn alyp kelińiz dep edi ǵoı, esimnen shyǵyp ketipti ǵoı» dep, arbasynan túsip baýǵa kirse, jańǵaqtar kóp deıdi. Jańǵaǵyna qarasa, altyn jańǵaq eken. Patsha tań qalyp, «meniń kishi qyzym aqyldy eken ǵoı» dep, syndyryp alyp ketip bara jatqanda, bir aıý shyǵyp:

— Patsha, meniń baýymdaǵy jańǵaqty nege alasyz? – dep suraıdy. Patsha qyzdarynyń aıtqan sózderiniń bárin aıtady.

         Aıý:

— Meıli, alyp bar, biraq qyzyńdy úsh kúnnen keıin alyp kel, – depti.

         Patsha qorqyp:

         — Nege alyp kelemin? – dep surapty.

         Aıý:

   — Men senimen ázildespeımin, alyp kel, bolmasa, ózim baryp alyp kelemin, – depti.

         Patsha «maqul» dep, arbasyna túsip ketipti.

         Qyzdaryna alǵan nárselerin berip, ózi qapa bolyp júripti.

         Áıeli:

         — Nege qapa bolasyń? – dep surapty. Patsha baǵanaǵy aıýdyń aıtqan sózin bárin aıtypty. Áıeli:

         — Qoı, qapa bolma, qyzym úshin ózim baramyn, – depti. Sondaı dep otyrǵanyn qyzy estip:

         — Apa, sen barma, men ózim baramyn, bul páleniń bári menen bolǵan eken, – dep jylapty. Anadaǵy aıýdyń úsh kúni ótip ketken eken. Bir zaman qarasa, bir aıý kele jatyr. Kelip:

         — Qane qyzyń? – dep surapty.

         Patsha:

         — Mynaý! – dep kórsetipti.

         Aıý:

         — Qyzyndy kıindir! – depti. Qyzyn kıindirip, qyz ben aıý arbaǵa túsip ketti. Baryp-baryp baýǵa kelip:

         — Qane, tús! – depti qyzǵa qarap, — meniń sońymnan júr, – depti de kete berdi. Baryp bir jerdiń astyna tústi.

         Qyz keıinnen bir esik ashty, qarańǵy, taǵy bireýin ashsa, jap-jaryq altyn saraı, jańaǵy aıý ádemi jigit bolyp ketipti. Jigit qyzǵa:

         — Sen maǵan kúıeýge tı! – depti. Qyz ózi qaıran bolyp qaldy, jańaǵy ádemi jigit bolǵanyna. Qyz «maqul» dep, qyzdy jigit almaqshy bolyp, toı qylyp, qyzdyń áke-sheshesin shaqyrdy. Ákesi men sheshesi keldi.     Sóıtip qyzdy aıý aldy.

---