InfoHub Logo

Qazaqta: “Qalǵan kóńil — shyqqan jan” degen sóz bar ǵoı. Buryndary oqta-tekte oıǵa oralyp, aýzyma túskenimen, babyna baryp, mán bere qoımaǵandaı ekenmin. Áıgili orys aqyny Ev.Evtýshenkonyń bir óleńin aýdaryp otyryp osy bir tirkes tilime orala ketkeni. Óleń “Jerlep kelip otyrmyn joldasymdy (“Ia tovarısha horonú”) dep bastalady.

Ózgelerge óıtkeni ol áli tiri,
Jany siri, janynda jar úkili,
Syrt kózge men onymen dospyn áli,
Onsyz kire qoımaıdy keshtiń ári.
Áli kúnge onymen tiri óbisip,

Syrahana jaqtarda júrem iship, — degen joldardyń orysshasy:

Dlá drýgıh on eshe jıvoı,
Dlá drýhıg on eshe s jenoı,
Dlá drýgıh eshe s nım drýjý,
Ibo s nım v restorany hojý
Ne branú, a molchkom horonú, — bolatyn.

Shynynda da birge týyp, bite qaınasyp ketpeseń de kóp jyldar syılas, syrlas bolǵan, biraq saǵan syryn túgel aldyra qoımaǵan, sóıtse de sińisip júrgendeı qylyq kórsetip, dos-jaranyń bolatyny da ras qoı. Solardyń biri bolmasa biri oqysta kezikken qysyltaıań kezde seni satyp kete beredi. Biraq túk bolmaǵandaı betińe jylmıa qarap, qýlyǵymdy asyrdym ba degendeı jymıyp qoıatynyn qaıtersiń.

Sol bir ekijúzdilikke, sol bir, qysqasy, ıttigine ábden kózim jetkende men de endi ony birjolata óldige sanaıtynym bar. Joq, birjola atquıryǵyn da kesise almaımyn. Kóp ishinde kezige qalǵanda qol berip amandasyp, tipti qushaqtasqan bolyp, óp-ótirik súıisip te jatamyz. “Qatyrdym ba, bálem!” — dep máz bolyp ol ketedi, “Men úshin tiri ólik ekenin de sezbeıdi-aý bul shirkin” — dep sen qalasyń.

“Sondaı barynan — joǵy” dep biletin birer tanys mende de bar. Jasy kishi bul jigit jurt kózinshe de, ekeýara ońasha qalǵanda da óziniń maǵan shyn kóńilimen berilgendigin áńgime saıyn dáleldeı sóılep júretin. Sonyń ekijúzdiligine, alaıaqtyǵyna ábden kózim jetkende baryp kóńilimniń oǵan degen esik-terezesin berik etip japtym da, birjola óldige sanadym. Kóńilimde oǵan degen senim-qurmetten eshteme qalmaǵanyn ańǵardym. Óldi. Bitti! Endi onyń ózine de, ózgelerdiń ol týraly aıtyp júrgen ártúrli áńgimelerine de renjip, kúıip-pisý degen múlde bolmaıdy. Qalǵan kóńil — shyqqan jan... Jolyǵa qalsa, amalsyz qolyn alam, biraq ol endi meni qýanta da, ashýlandyra da almaıdy. “Pýstoe mesto” deıdi orystar mundaıdy. “V ýpor ne vıjý!” dep te jatady.

Sertten taıǵan, sózinde turmaǵan, dostyq nıetke júrdim-bardym qaraıtyn, paıdakúnem, ótirik aıtatyn, oǵan bola qysylyp-qymtyrylyp ta jatpaıtyn, sýaıt, noıys, kisimsip, basqany basa kóktep ótkisi keletin urda-jyq adamdardan boıymdy aýlaq salýǵa tyrysyp-aq baǵamyn. Olar meniń sanamnan múldem syzylyp qalǵan, men úshin endi bul dúnıede joq, tiriler sanatynda da joq adamdar.

Bular kóbine-kóp erkek pishindi adamdar, ishterinde sırek te bolsa áıelder de kezdesedi, amal qansha! Qaldarbek aıtyp edi bir kezde: “Áıelderge ókpeleýge bolmaıdy”, — dep, sol da durys shyǵar dep oılaı beremin.

---