InfoHub Logo

Derttiń qozý sebebi

Qanazdyqpen aýyrǵan adamnyń qany suıylyp ketedi. Úlken jaraqattar alǵanda, aýzy ashylyp ketken asqazan jarasy, ish súzegi negizindegi qannyń toqtamaýy adamdy qanazdyq aýrýyna shaldyqtyrýy múmkin. Qannyń qyzyl túıirshikterin joıyp jiberetin bezgek aýrýy da bul derttiń qozdyrýshysy bolyp tabylady. Kúndelikti taǵamda temir quramdas zattardyń bolmaýy da osy aýrýdy qozdyryp, ýshyqtyra túsedi. Áıelderde qanazdyq dertin qozdyrýǵa etekkir kelgen nemese tamaqtanbaı bosanyp álsiregen kezde toqtamaı aqqan qannyń da tıgizer zıandy saldary bar. Qanazdyqtyń aýyr túrimen ásirese qursaǵyndaǵy balasyna kerekti qosymsha qan mólsherin qamtamasyz etýge tıisti júkti áıelder aýrýy múmkin. Balalarda qanazdyq olardyń ishetin tamaǵynda temir quramdas zattardyń jetispeýshiliginen de jáne olardy alty  aılyǵynan keıin qosymsha tamaqtandyrmaǵandyqtan da bolady. Kóbine jas balalarda qanazdyq olardyń nematodty (parazıt qurttar) juqtyrýy, sozylmaly ish ótý jáne ish súzegimen aýrýynan týyndaıdy.

Syrqattyń belgileri

— Teri bozaryp, qýaryp óńi qashady;

— Qabaq ústi terisiniń óńi ketip, bozarady;

— Tis qyzyl eti qany qashyp aǵarady;

— Tyrnaq aǵaryp ketedi;

— Álsizdený, tez sharshaý paıda bolady;

Qanazdyqtyń aýyr túrinde de, aıaq isinip, júrek soǵysy jıileıdi, demigý paıda bolýy múmkin.

— Topyraq, bor jeýge áýes balalar qanazdyq zardabyn shegedi.

Dertti emdeý jáne odan saqtaný sharalary

— Quramy temirge baı taǵamdarmen tamaqtanyńyz. Et, balyq jáne balapan taýyq eti quramynda temir mólsheri kóp. Kók burshaq, asburshaq, jasymyq, qanyq jasyl japyraqty kókónisterde de temir bar.

— Qanazdyqtyń qalypty jáne aýyr túrimen aýyrǵanda temir qospaly dári-dármek qabyldaý qajet (temir súlfaty túımedaqtary). Buny ásirese qanazdyqtan zardap shegetin júkti áıelder ishý kerek. Syrqattyń barlyq túrinde de temir súlfaty túımedaqtary baýyr ekstrakty men V12 vıtamınine qaraǵanda anaǵurlym paıdalyraq. Temir qospasy temirdi ádette ektirý arqyly emes, túımedaq túrinde qabyldaıdy, óıtkeni ıne salǵyzý qansha degenmen qaýipti jáne áser etý kúshi jaǵynan da ishetin dáriden artyqshylyǵy joq.

— Eger qanazdyq ish súzegi — ishten qan ótý saldarynan nematoda juqqannan bezgek zardabynan paıda bolsa, onda adamdy qanazdyqpen aýrýǵa sebep bolǵan osy aýrýlardan emdeý kerek.

— Qanazdyq aýyr túrge aýysyp, em qonbaǵan jaǵdaıda ýaqyt ozdyrmaı dárigerge kóringen jón. Bul keńes ásirese anaǵurlym júkti áıelderge qatysty.

A. S. Jaqsymbetova

---