InfoHub Logo

Anashym! Meni adamdar únemi  «Qańǵybas» dep músirkeıdi.   Myna bir qarań qalǵan ókinishterden ǵana turatyn ómirim maǵan unamaıdy. Qyzyq, á? Eshkimnen de tómen turǵym kelmeıtin edi ǵoı. Al myna júrisim ne? Nege tuıyqqa tireldim? Nege tyǵyryqtan shyǵar ózge jol izdemedim eken?  

Aptaldaı azamattyń bir shısha shólmektiń aldynda sonshalyq tómendegeni ne degen aıanyshty edi...Sol bir quryǵyr shólmekti qolyma alǵan kúnimdi qarǵys atsyn. Iá, rasymen ol meniń bar qaıǵymdy, bar qıyndyǵymly umyttyrdy. Tańerteń tipten óz úıime qalaı kelgenimdi bilmeıtindeı jaǵdaıǵa da jettim. Siz de, Balym da, bar janashyrym da maǵan bar aqyldaryn úıip – tókti.  Sonda da meni  shaıtannyń sýynan ózge eshteńe qyzyqtyra qoımady. Qanshama jaqyndaryma aıtqan sózderim esime túse qalsa, kirerge tesik tappaımyn. Al on jyl otassaq ta, birde – bir ret sháı desip kórmegen jan jarym Balymǵa qol kótergenim tipten ıttik qoı. 
Baıǵus anam... Qolynan túk kelmeıtin, jigersiz ulyńdy keshe gór. Men sizdi eń baqytty ana etemin dep júrip, eń sorly ana ettim-aý. Sizge kórinýge betim de joq. Esińizde me? Siz kezinde «jas bolsa da  bas bolyp, ákesiniń joqtyǵyn bildirtpeı, meni alaqanyna salyp baǵyp otyr» dep kórshi áıelderge jer-kókke syıǵyzbaı maqtaýshy edińiz ǵoı meni. Sony esime alsam, ózegim órtenedi. Siz senip edińiz ǵoı maǵan. Al men ne istedim? 

Tentek inimmen bir kórisip sizdi tapsyrǵym keledi. Meniń ornyma eń baqytty ana et, seniń qolyńnan keledi degim keledi. Biraq myna túrimmen inime qalaı kórinemin. Meni kórse shoshynatyn shyǵar. Aıtpaqshy, ótken joly ony bazardyń mańyna kórdim. Baıaǵy tentekti emes, eresek azamatty kórgendeı boldym. Eseıip ketkendeı me ózi?  

Kishkentaı júgirmegimniń haly qalaı? Kishkentaı dep qoıamyn. Ol áldeqashan ósip ketken bolar. Kórmegenime eki jyldan asyp barady. Ony da qushaǵyma alyp, keshir degim keledi. Degenmen, keshpeıtinine senimdimin. Qaıtip keshirsin? Men ony tirileı jetim etip, ákesiz ósýge májbúr ettim ǵoı. Ózim ákesiz óskendikten, ulymnyń ákesiz óskenin múlde qalamaǵan edim. Qaıteıin endi? Sorly ulyńyzdyń qolynan ol da kelmedi.   Bilesiz be? Ol kishkentaı bolǵanyna qaramastan sondaı ójet edi. Men oǵan erkekterge jylaýǵa bolmaıdy degenmin. Onyń sodan keıin kózine jas alǵanyn kórgen emespin. Ulymdy osy bir qaısarlyǵy  úshin maqtan etemin. Men ony jaqsy túsinemin. Onyń maǵan degen ókpesi ishinde. Sondyqtan meni kórse janyma jolamastan óte shyǵatynyna senimdimin. Meni kórmese eken dep kúni-túni tileımin.  Onyń da, ózimniń de júregimdi aýyrtqym kelmeıdi. 

Birneshe kún buryn, Balym meni taýyp aldy. Nege izdediń? – dep edim. Ol izdemegenin, kezdeısoq kezdestirip qalǵanyn aıtty. Júzi solyp, júdep qalypty.  Men odan endigári meni kóre qalsa burylyp ta qaramaýyn ótindim. Bul isim qatigezdik  bolar, biraq ol úshin de, men úshin de osy durys emes pe, apa? Kelinińizge aqylyńyzdy aıtyńyzshy! Ary qaraıǵy ómirin meni kútip qor qylmasyn....

Anashym! Kezdeısoq kezdestirip qalǵandary bolmasa, eki jyldan beri eshkim de meni  izdemedi.  Meniń myna túrimmen eshkimge kóringim kelmeıdi. Aıtshy olarǵa, eshqaısysy da meni izdemesin, esine de almasyn, kórse de kórmegendeı óte shyqsyn. Ýáde eteıin, men eshqaısysyna da renjimeımin.  Óz qateligimniń azabyn ózim ǵana tartqym keledi... Jalǵyz... Tek ózim ǵana...

---