InfoHub Logo

Bir qarlyǵash jardyń qýysyna uıa salyp, ómir súripti. Qanaty qatpaǵan balapandary anasy azyq ákelýge ketkende, shydamsyzdana kútýmen bolady eken.

Bir kúni balapandardy jemekke qarlyǵashtyń uıasyna jaýyz jylan órmelep shyǵyp bara jatady. Muny kórgen qarlyǵash aspan men jerdi sharlap, shyr-shyr etip, balapandaryna arashashy izdeıdi. Kókekten kómek suraı barsa:

— Búrkit qonaqqa shaqyryp edi, soǵan barǵaly jatyrmyn, ýaqytym joq, – deıdi kókek.

Odan shyǵyp, qarǵaǵa barsa:

— Úılengeli jatqanymda, mazamdy alma, – deıdi. Qarlyǵashtyń amaly taýsylyp, shyryldap ushyp kele jatady. Bir kezde dáýitti kóredi. Dáýit qarlyǵashtyń shyr-shyr etken daýysyn estip:

— Dostym, nege zarlaısyń? – dep suraıdy.

Qarlyǵash sonda:

— Jaýyz jylan balapandarymdy jutpaqshy bolyp, uıama órmelep jetip qaldy. Soǵan ne isterimdi bilmeımin, – dep, qarlyǵash kóziniń jasyn tógip-tógip jiberedi.

— Olaı bolsa, meni jetkiz tezirek, – deıdi dáýit. Qarlyǵash qanatyn tosady. Dáýit jotasyna shyǵyp alady.

Kózdi ashyp-jumǵansha uıasyna jetedi. Jylan uıaǵa taqap qalǵan eken. Dáýit pen qarlyǵash endi bir sát keshikse, balapandardy qylǵyp sap, jumsaq uıada masaırap uıqtamaqshy eken.

Dáýit aıaǵymen shaba tyrnap, jylannyń eki kózin aǵyzyp jiberedi. Jaýyz jylan sylq etip jerge qulap túsedi de mert bolady.

Dáýittiń erligine súısingen qarlyǵash onymen aınymas dos bolypty. Sodan beri talaı zaman ótse de ekeýi bir uıada turyp, birge ómir súredi eken.

---