InfoHub Logo

Ótken apta basynda Jazýshylar odaǵynyń qyzmetkerlerdiń biri telefon shalyp, Almaty oblysynyń jańadan taǵaıyndalǵan ákimi Serik Úmbetov myrzanyń Jetisý óńirinde týyp-ósken bir top qarymdy qalamgerlerdi arnaıy qabyldaýǵa shaqyryp otyrǵanyn, solardyń ishinde meniń de barymdy aıtyp, seısenbi kúni erteletip júrip ketýge tıis ekenimizdi eskertken.

Serik Úmbetovtiń atyna da, zatyna da burynnan qanyqpyn. Azdy-kem tanys-bilistigimiz de bar, onyń ústine, el qulaǵy elý, Jambyl oblysyn basqaryp otyrǵan jyldary sol óńirdiń aqyndary men jazýshylaryna jasaǵan qamqorlyǵy, shynaıy talant ıeleriniń jekelegen shyǵarmalarynyń basylyp shyǵýyna qol úshin bergeni, qalamy qaýqarly birqatar odaq múshelerine arnaıy syılyq taǵaıyndaǵanynan da habardar bolatynbyz. Sondaı-aq onyń mádenıettiń ártúrli salalaryna, aýyl sportyn kóterýge aıryqsha kóńil bóletini jaıynda da estip-bilip júrgenbiz. El basqaryp otyrǵan azamattyń sol ıgilikti is-áreketine syrtta júrip biz de súısinetinbiz.

Endi, mine, sol Serik Úmbetov arnaıy at jiberip aldyryp otyrsa, bizdiń taqymymyz qyshymaı qaıtsin. Kóne bir batyrlar jyrlarynda:

Qabanbaı saýyn aıtty degennen soń
Toqpaqtan kelgen eken er Qasabaı, —

deıtin joldar bolýshy edi, sol aıtqandaı, onyń ústine ózimiz aýdan ákimi ataýlynyń aldyna emine baryp kórmegen basymyz, keıbir oblys deńgeıinde el bılep, jurt shúılep júrgen azamattardyń áldebir jeńil-jelpi buıymtaımen aldyna bara qalǵan aqyn-jazýshylardy aýyz úıinde saǵattar boıy sarǵaıtyp otyrǵyzyp qoıady eken degendi de estip, "apyr-aı, á!" desip, bas shaıqaıtynymyz bolatyn.

Sonymen aıtylǵan kúni qulan ıek tańnan turyp, aıtylǵan saǵatyńda ýaǵdaly jerge jettik. Bizdi bastap shyqqaly turǵan Qazaqstan Jazýshylar odaǵy basqarmasynyń tóraǵasy Nurlan Orazalın, Taldyqorǵannan bizdi ádeıilep alyp júrýge kelgen oblystyq til basqarmasynyń bastyǵy, aqyn inimiz Ahmet Kendirbekulyna qosylyp jedel júrip ketkenbiz. Óz kóligimen shyqqandar bar, ákim jibergen arnaıy kólikke mingeskenderimiz bar, ártúrli áńgimemen otyryp, oblys ákimshiligi ǵımaratynyń aldyna taban tiregenimizdi baıqamaı da qalǵanbyz.

Quramynda alys-jaqyn aǵaıynǵa aty málim, ataq-abyroıdan da quralaqan bolyp kórmegen Tumanbaı Moldaǵalıev, Saın Muratbekov, Marfýǵa Aıthoja, Qastek Balabaı, osyny jazyp otyrǵan paqyryńyz, Bek Toǵysbaev, Beksultan Nurjeke, Baqqoja Muqaı, uıǵyrdyń áıdik jazýshylary Shaıym Shanaev pen Ahmetjan Áshirov, taǵy basqa biraz sańylaqtar bar topty oblys ákimi kóp kúttirmeı qabyldady.

Ákimniń ózi sıaqty bizdiń bárimiz de bul jaqtyń uńǵyl-shuńǵylyn, ekonomıkasy men mádenıetin bir kisideı biletindikterimizden de bolar, ol asa bir kósile qazbalap jatpaı, Jetisý jeriniń búgini men erteńi jaıly qysqasha aıtyp keldi de, ádeıi basymyzdy qosyp otyrǵan kezdesýdiń mániń túsindirip, negizinen bizdi tyńdaǵysy keletinin ańǵartty.

Áńgimeni Jazýshylar odaǵynyń basshysy Nurlan Orazalın bastap, qazaq jazýshylarynyń qazirgi hal-ahýalynan habardar etti de, alda kele jatqan Prezıdent saılaýy aldynda burynǵydan da berik biraýyzdylyq keregine, sol baǵytta jazýshylar uıymy da ujymdasa otyryp, ortaq múddege oraı birqatar istiń basyn qaıyryp otyrǵanyn aıtty. Búgingi kezdesý de sonyń bir kórinisi degendi bildirdi.

Joǵaryda attary atalǵandardan da basqa bul saparǵa arnaıy shaqyrylǵan Smaǵúl Elýbaı, Orazaqyn Asqar, Nesip Júnisbaıuly, Jumabaı Shashtaıuly, Yrym Kenenbaev, Qaırat Álimbek, Shaımergen Áldıbekov, qysqasy kezdesýge qatysqandardyń barlyǵy derlik sóılep, búkpesiz oılaryn ortaǵa saldy. Birqatar usynys-pikirler aıtyldy. Aıtsaq degen, aıtylýǵa tıisti sózimizdi irikpeı, irkilmeı túgel aqtardyq-aý deımin. Osynaý rıasyz ashyq áńgimeniń ózi soǵan bárimizdi de jeteleı túskendeı boldy.

İshimizdegi jasy úlkenimiz — ardager Seıdálim Tánekeev edi, ol kisi de ádettegi kisilikti kishipeıildilikke baǵyp, biraz qomaqty oıdyń basyn qaıyrdy. Osynaý basqosý sıaqty ıgi dástúrdiń bastala bere tuıyqtalyp qalmaı, aldaǵy ýaqytta oblys, aýdan ortalyqtaryńda nátıjeli jalǵasyn taýyp otyrsa degen turǵydaǵy tilegin bildirdi.

Sondaı-aq osy kezdesýge arnaıy shaqyrylǵan Taldyqorǵandyq qalamgerler — aqyn Áben Dáýrenbekov, Álı Ysqabaı, Tursyn Ábdýálıevter de óz lebizderin bildirip jatty.

Eki úsh saǵatqa sozylǵan áserli áńgimeni tujyrymdaı kelip, Serik Úmbetov oblys ortalyǵynda Jazýshylar odaǵynyń bólimshesi ashyla qalsa, úı-jaı, dúnıe-múlik jaǵynan qaraılasatynyn, sondaı-aq óz qolyndaǵy bılik deńgeıinde talant-darynyn el ábden tanyp bolǵan, qazir qoǵamdyq qyzmetten eriksiz qol úzip qalǵan bir top qalamgerge azdy-kópti arnaıy stıpendıa taǵaıyndaıtynyn, jyl saıyn úsh jazýshynyń úzdik shyǵarmalaryn basyp shyǵarýǵa qarjylaı kómek kórsetetin aıtty. Mundaı shynaıy peıil, shyn yqylasqa óz tarapymyzdan biz de alǵys aıtyp tarastyq.

Qaıtar joldaǵy áńgimemizdiń negizgi arqaýy osy kezdesý jaıynda boldy. Serik Úmbetov bizden madaq kútip, maqtaý estıin dep shaqyrmaǵan bolar, osy óńirdiń sóz ustar azamattary bolǵandyqtan oryndy pikir, oqshaý oı kútken bolar degenge toqaılastyq. Kórgendi azamatqa tán kósheli isterdiń bir kórinisi de osy-aý dep túıdik bárimiz.

Myna bir top shaǵyn maqalalar "Parasat " jýrnalynyń tapsyrmasymen jazylyp, jarıalanyp edi. Osy kitapqa qosýdy jón kórgen jaıym bar.

---