Ormannan Qasqyr keldi elge qashyp,
Alaqtap, ne qylaryn bilmeı sasyp.
Sońynan bir top ańshy qıqý salyp,
It qosyp kele jatyr shapqylasyp.
Jalynyp Qasqyr sonda Mysyqqa aıtty,
Shetinde bir aýyldyń ushyrasyp:
«Mysyqjan! Bul jerdegi jurttar qandaı?
Jaý qýyp kele jatyr arttan qalmaı.
It úrgen, qıqý salǵan adamdardyń
Daýysyn estımisiń tartqan kerneı?
Aıta kór, qaıyrymdy er bar bolsa
Tasalap meni jaýdan qutqarǵandaı!».
«Bara kór, - Mysyq aıtty, - Qoıankózge,
Jigit kem er kóńildi odan ózge.
Adamdy anaý-mynaý toqtatarlyq
Óziniń ebi de bar sóıler sózge».
«Ony qoı, - Qasqyr aıtty, - ol jasyrmas,
Jep edim bir tý qoıyn ótken kúzde».
«Bara kór, olaı bolsa, Quramysqa,
Adam joq jasyrýǵa onan usta.
Shamasyz ózi asqan jaqsy jigit,
Jalǵyz-aq tony kelte, qoly qysqa».
«Mysyqjan, ony da qoı, ózgesin aıt,
Jep edim bir laǵyn byltyr qysta».
«Iesi anaý úıdiń Kópbergen baı,
Jaqsylyq, jamandyqty kóp kórgen baı.
Qonaqjaı, ózi asqan dáýletti adam,
Jatsań da, aýyrlamas, birneshe aı».
«Barýǵa, - Qasqyr aıtty, - júreksinem,
Onyń da qozylaryn jep em talaı».
«Bilmeımin silterimdi endi qaıda!
Baryp kór Qısyqbasqa anaý saıda.
Bolǵanmen basy qısyq, óneri kóp,
Ár túrli tabylady onan aıla».
«Mysyqjan, ony da aıtyp áýre bolma,
Jep edim bir buzaýyn ótken aıda».
«Men qaıran, - Mysyq aıtty, - isterińe!
Zalaldan basqa nárse istediń be?
Baıdyń kóbi, jarlynyń jalǵyzy da
Tıipti, tyńdap tursam, tisterińe.
Zararger jurtqa tegis bolyp ábden,
Endi ne izdep keldiń ishterine?!
Jyndy joq seni aman qutyldyryp,
Alǵandaı bále tilep ústerine.
«Ne ekseń, sony orarsyń» degen sóz bar,
Or endi eginińdi piskeninde!».

---