InfoHub Logo

Bir baı óler ýaqytynda ulyn shaqyryp alyp:

— Ulym, men ólgen soń juma saıyn qyz alyp, qala saıyn úı sal. As jeseń, bal je, – dep, ósıet aıtypty. Baı dúnıeden ótip, uly atasynyń ósıetin oryndaı bastaıdy: juma saıyn qyz alyp, qala saıyn úı salady. As ishse, bal iship, aqshasyn bitiredi. Sóıtip, jigit jarly bolady. Bir kúni jigit dalaǵa shyǵyp biraz júrip, bir úıilgen tastyń tasasyna otyryp, bórkin qolyna alyp basyn ustap otyrǵan ýaqytta, bir jaqtan bir shal kelip jigitke sálem beredi. Jigit sálemin alǵan soń, ol adam janyna otyrady da jigitke:

— Neǵyp otyrsyń? – deıdi.

Jigit:

— Jáı otyrmyn, – dep jaýap beredi.

Shal:

— Shynyńdy aıt! – dep qysa bastaıdy. Jigit esh nárse aıtpaıdy.

Shal:

— Syryńdy jasyrma! Men saǵan jaqsylyq kórsetemin, – deıdi.

Jigit:

— Meniń atam baı adam edi, sol atamnyń óler aldynda aıtqan ósıetin oryndaımyn dep, kedeı boldym, – deıdi. Shal:

— Qandaı ósıet aıtyp edi? – deıdi. Jigit:

— Áýelgi ósıeti: «Men ólgen soń juma saıyn qyz al», – dep edi, men atamnyń sol ósıetin tutyp, juma saıyn qyz aldym. Ekinshi ósıeti: «Qala saıyn úı sal», – dep edi. Men qala saıyn úı saldym. Úshinshi ósıeti: «As ishseń, bal je», – dep edi. Men bul ósıetin de oryndap, ár kúni bal jedim. Solaı etip, úsh jylda barlyq aqsham taýsyldy, – deıdi.

Shal turyp jigitke:

— Sen atańnyń ósıetin uqpaǵan ekensiń, óıtkeni atańnyń: «Juma saıyn qyz al» – degeni: «Áıelińmen syılas bol, qadirińdi ketirme. Sonda ǵumyr boıy tatý-tátti ómir súresiń» – degeni. «Qala saıyn úı sal» degeni: «Qala saıyn dostaryń bolsyn, barǵanda túsetin» – degeni edi. «As ishseń bal je» – degeni: «Eńbek istep as ishseń, baldan tátti bolady» – degeni edi, – dep, qart óz jónine ketipti.

Jigit ákesiniń tereń maǵynaly ósıetine sonda ǵana túsinipti.

---