InfoHub Logo

Qaıypaldy birde Abylǵa kezdesip:

- Men týraly syrtymnan sóz aıtatyn kórinesiń, kózimshe aıt – depti.

Sonda Abyl taısalmastan balaı deıdi:

Qyzyl til Jırenshedeı tilim taqsyr,

Qyzyl til – óner aldy, bilim, taqsyr.

Baımaǵambet ózińnen artty dese,

Ustaıdy sonda seniń jynyń, taqsyr.

Qoldaǵan sol sultandy gýbernator,

Ózgeden artyq pa edi diniń, taqsyr.

Hıýanyń qonyshyna kirip kettiń,

Bir ýys bolmasa ıgi ed kúniń, taqsyr?!

      Qaıypaldy meni tildediń dep, Hıýa úkimetiniń salǵan salyǵyna qosa  Adaı rýyna 60 atan aıyp tartqyzamyn depti. Sebebi Hıýa úkimetiniń salyq jınaýshy ákimderiniń biri Qaıypaldy bolǵan. Halyq ony han dep uqqan. Abyl alpys úıden alpys adam ertip, Qaıypaldyǵa qaıta barypty. Ózi bylaı depti:

Zamanaqaıym bolar jer zyńyransa,

Taý qulap, tas qańbaqtaı jumalasa.

Aldyńa alpys Adaı kelip turmyz,

Kele me hannan qorqyp, qorǵalasa?! 

Arǵy atań – han Nuraly, ákeń – Esim,

Ketirdiń buıqyt eldiń berekesin.

Qulandaı qyrda ósken Adaı edik,

Adaıǵa salyq degen saldyń kesim. 

Adaıdyń salyq saldyń moıynyna.

Shydamaı Adaı seniń oıynyńa,

Alpysy adýyndy atqa minip,

Jarmasty jaraqtanyp soıylyna.

Oý, taqsyr, týra qarap, durysyńdy aıt,

Abylǵa alpys atan saldym degen

Áziliń áneýkúngi qoıyldy ma?

Jasanyp kelgen jigitterdi kórip, Abyldyń sózinen seskenip, Qaıypaldy:

- Adaımen ázildeser jáıim bar edi, jorta aıtyp edim, - dep qutylypty.

---