InfoHub Logo

Ony o basta qońyraý etip Tabıǵat pen Ýaqyt ekeýi birlesip quısa kerek. silkinip qalǵan kezinde onyń óz boıynan jasynnyń jaryǵyndaı-qyp-qyzyl ot shashyrap, tirshiliktiń demindeı órtteı ystyq lep uratyny sondyqtan. Silkinip qalǵan kezinde onyń ón boıynan jalyn burqyrap, astan-kesten bolyp jatqan uly muhıttardyń surapyl shýyly men gýili áldeneden bórligip, áldeneden úreılengen myna qan bazar ómirdiń tóbesine qatar tógilip jatatyny da sondyqtan. Onyń ón boıynan aspan men adamnyń alapat kúrsinisi qatar estiletini de sodan dep bilemiz.

Aqyn Ábdildá Tájibaevty o basta Tabıǵat pen Ýaqyt qońyraý etip quıar kezde ony aldymen halyq júreginde qorytyp, halyq júreginde shyńdap alǵany sózsiz. Sondyqtan da, qashan kórseń de, onyń kómeıinen halyqtyń oıy quıylyp, tilinen halyqtyń sózi sorǵalap turady. Halyqtyń alyp júreginde qorytylyp, halyqtyń alyp júreginde shyńdalǵan qońyraý, sol halyqtyń tereń oıy men suńǵyla sózine aınalmaı endi ne istemek?! Al halyq júreginde qorytylyp, halyq júreginde shyńdalyp baryp quıylǵan qońyraý, sóz joq, kúmbirine qulaq túrgen árbir adamnyń janyn shyńdap, júregin sýǵarary taǵy belgili.

Ábdildá Tájibaev — shynynda da kóne qońyraý. Tozǵan, eskirgen emes, kókiregine eliniń kósemdigin, kósheligin jıǵan, tula boıyna dalanyń darqandylyǵyn, danalyǵyn sińirgen kóne qońyraý. Al ondaı qońyraý — qaı tustan shyqsa da — selt etken dybysqa sergek, qylt etken qımylǵa oıaý. Qaı ýaqytta kórseń de onyń damylsyz dabyl sap, tas tóbeńde kúmbirlep turatyny da sondyqtan. Óne boıyna myna mazasyz ómirdiń qusasy men qýanyshyn, kúlkisi men kúrsinisin, qysastyǵy men qushtarlyǵyn qunyǵa sińirip alatyn ondaı sergek te oıaý qońyraý dabyl salmaı tura almaq emes. Dabyl sap turǵan ondaı qońyraý kúnderdiń bir kúninde salǵyrttyń sanasyn jańǵyrtyp, qamsyzdyń qanyn oıatary kádik.

... Mine, qazaq óleńiniń kóne qońyraý taǵy da damylsyz kúmbirlep tur. Úninde rıza qýanyshtan góri, ýaıym-kúrsinis kóbirek sekildi. Iaǵnı ýaqyttyń jeli, dúnıeniń demi ony solaı soqtyryp tur!

---