Qazaqstanda 12 myń muǵalim sıfrlyq ınklúzıvti oqý kýrsynan ótedi
12 myń qazaqstandyq muǵalim sıfrlyq ınklúzıvti oqý kýrstarynan ótedi.
Birikken Ulttar Uıymynyń Balalar qorynyń (IýNISEF) Qazaqstandaǵy keńsesi Astana Hub IT startaptar halyqaralyq tehnoparkimen birlesip, Qazaqstan Respýblıkasynyń 11 oblysynda 12 myńnan astam muǵalimdi aralas formatta sıfrlyq ınklúzıvti bilim negizderin oqytýdy josparlap otyr.
Oqytý Bilim jáne ǵylym mınıstrliginiń oblystyq basqarmalarymen jáne bilim departamentterimen birlesip júzege asady.
Trenıńke qalalyq jáne aýyldyq mektepterdiń muǵalimderi qatysady. Búgingi tańda kýrsqa on myńnan astam tyńdaýshylar tirkeldi.
«COVID-19 pandemıasy eń osal balalarǵa - erekshe bilim berý qajettilikteri bar balalarǵa bilimge qoljetimdilikti shekteý jáne qashyqtyqtan oqytýǵa kóshýden eń kóp zardap shegetinin anyq kórsetti. Bizdiń basty maqsatymyz – olardyń qajettilikterine qaramastan árbir balaǵa birdeı qoljetimdi bilim berý prosesin qoldaý. Sıfrlyq tehnologıalardy qoldanysymen júzege asatyn aralas format oqý úderisin ıkemdi jáne bilim berý ortasyn beıimdelgish etedi. Biraq munda muǵalimderdiń biliktiligi men bilimi basty ról atqarady. Sondyqtan men Astana Hub-pen birlese otyryp, kóptegen muǵalimderdi jańa sandyq quraldarǵa úırete alatynymyzǵa qýanyshtymyn», - dedi IýNISEF-tiń Qazaqstandaǵy ókili Artýr van Dızen.
Aralas format – arnaıy aqparattyq tehnologıalardy paıdalana otyryp, synypta oqytýdyń dástúrli formalaryn biriktirýdi kózdeıtin zamanaýı bilim berý tásili. Qazaqstandyq muǵalimderge arnalǵan aralas formattaǵy sıfrlyq ınklúzıvti bilim berý kýrsy Okoo.kz bilim berý platformasynda ótýde.
Kýrs tyńdaýshylardyń birinshi toby «ınklúzıa» termınin, qalyptasqan stereotıpter men qate túsinikterdi zertteı bastady.
Oǵan qosa olar erekshe bilim berý qajettilikteri bar balalardy oqýǵa tartýdyń jańa tehnologıalarymen tanysady.
Olar mektepte qolaıly jaǵdaı jasaý úshin ártúrli sıfrlyq quraldardy paıdalana otyryp, qashyqtyqtan jáne ınteraktıvti sabaqtardy uıymdastyrý ádisterin zertteıdi.
«Sıfrlyq tehnologıalar sıfrlyq bilim berýdi qoljetimdi jáne ınklúzıvti etý sıaqty jahandyq máselelerge áser ete alatyny - erekshe qýantatyn jaıt. Bolashaqta IT-tehnologıalar erekshe bilim berý qajettilikteri bar balalardyń oqý baǵdarlamasyna qatysýyna kedergi keltiretin barlyq kedergilerdi tolyǵymen jeńýge kómektesedi dep senemiz. Biz quzyretterimiz ben kúsh-jigerimizdi IýNISEF-pen biriktirýdiń arqasynda biz osyndaı áleýmettik mańyzdy máseleni sheshýge yqpal ete alatynymyz jáne eń bastysy, aıtarlyqtaı serpin bere alatynymyz keremet», - dedi Astana Hub IT-startap tehnoparkiniń bas dırektory Maǵjan Mádıev.
Teorıalyq bólimnen basqa muǵalimderge onlaın rejıminde tıimdi oqytý úshin praktıkalyq bilim beriledi.
Kýrs aıasynda muǵalimder Mural, Padlet, ZOOM, Canva, Kahoot jáne t.b. quraldardy paıdalanýdy úırenedi.
«Osyndaı kýrstar uıymdastyrǵanyńyz úshin alǵysymyz sheksiz. Trenıńimiz 3 kúnge sozyldy, osy ýaqyt ishinde biz kóp nárseni úırendik: buryn bilmegen ádistermen, tehnologıalarmen tanystyq, bilimimizdi tereńdettik. Padlet jáne Canva sıaqty quraldarmen jumys isteý ásirese qyzyqty boldy. Alǵan bilimimdi aldaǵy ýaqytta mindetti túrde sabaqta qoldanamyn», - dep bólisti Batys Qazaqstan oblysy Terekti aýdany Jańa ómir aýylyndaǵy Shaǵan orta mektebiniń muǵalimi Jupar Tańatarova.
Bilim jáne ǵylym mınıstrliginiń resmı málimetterine sáıkes, 2020 jyldyń 1 qańtaryndaǵy jaǵdaı boıynsha Qazaqstanda 161 826 myńnan astam erekshe bilim berýdi qajet etetin bala turady, olar úshin 99 arnaıy mektep quryldy, onda 15 myń bala oqıdy.
Sondaı-aq, 42 mektepke deıingi arnaıy uıym bar. Qalǵan balalar ınklúzıvti ortada jalpy bilim beretin mektepterde oqytylady.
You Might Also Like
