InfoHub Logo

Qazaqstanda keńes saılaý mezgili taıandy. Ortalyq qaladan alys keıbir jerlerde bolystyq ıspolkomdardyń saılaýlary bolyp ta ótti. Biraq bul saılaýlardyń qalaı ótkenin bilmeımiz. Keńes úkimetiniń uly jobasy, uly baǵyty bolystyq saılaýdan bastap — jalpy eńbekshil tabynyń maqsatyn kózdemeıtin adamdy, baı ám jýan judyryq adamdy saılaýǵa kirgizbeı, el bıleý tizginin eńbekshil tabynyń jalpy baǵytymen júretin, eńbekshil tabynyń paıdalaryn ǵana kózdeıtin adamdarǵa berý. Eńbekshil tabynyń óz bıligin ózine berý. El bıleý tizginin baılarǵa, kúshti judyryqtarǵa bermeı óz qolyna alyp, qyzmet basyna óz kisilerin qoıý úshin eńbekshil halyq tize qosyp, jumylyp bul iske kirisýleri kerek.

Burynǵy patshanyń zamanyndaı endi baılardan, kúshti judyryqtardan qorqatyn emes, burynǵy buǵyp qalǵan eńbekshil halyq endi búksheńdemeı tórden oryn alýlary kerek. Eńbekshil halyqtyń kúshti qorǵany — Keńes úkimeti.

Ras, keıbir saılaýǵa shyqqan Keńes úkimetin syrtynan aldap júrgen adamdardyń baılarǵa, kúshti judyryqtarǵa bolysyp ketetinderi de bolatyn, biraq ol úshin Keńes úkimetiniń istegeni osy ǵoı dep eńbekshil halyq qorqyp, búksheńdep baılarǵa, kúshti judyryqtarǵa bılikti berip jibermeýi kerek. Qandaı aılamen bolsa da saılaýdan ótken eńbekshil tabyna jat adamdar bilinse Keńes úkimeti olardy qoımaıdy. Ondaı aram oıly, eńbekshil tabynyń maqsatyn kózdemeıtin adamdardy el bıleý isine ıe qylmaıdy.

Eńbekshil tabynyń shyn azamattary, ár jerde jumyla saq bolyńdar!

1928 jyl

---