InfoHub Logo

Qazaqstanda oqýshylardyń kórý qabileti tómendep barady. Almaty qalasy Qoǵamdyq densaýlyq saqtaý departamenti júrgizgen arnaıy saýalnamanyń qorytyndysy osyndaı, dep «Habar 24» telearnasyna silteme jasap bilim-all.kz habarlaıdy.

Búgingi kúni balalar qoly qalt etse planshet pen gadjetke, odan qala berdi teledıdarǵa úńiledi. Jańa tehnologıanyń jetistikteri búgingi tańda oqýshynyń ári qamqorshysy, ári aldanyshy. Durys qoldana bilseń, kópkórim paıdasy bar. Al ýaqyttyń qadirin bilmeı uzaq otyrsań, zıany da barshylyq. Buǵan statısıka dálel.

«Oqýshylar arasynda jıi kezdesetin aýrýlardyń túrlerine keletin bolsaq, birinshi orynda kórý qabiletiniń nasharlaýy tur. Sondaı-aq tirek-qımyl júıeleri syr beredi. Onyń ishinde arqa omyrtqasynyń qısaıýy kóp kezdesedi. Úshinshi orynda júıke jáne asqazan-ishek jolynyń aýrýlary bar», - deıdi  qalalyq Qoǵamdyq densaýlyq saqtaý departamentiniń basshysy Aızat Moldaqasymova.

Sońǵy úsh jylda memleket tarapynan mekteptegi medısına qyzmetine erekshe kóńil bólinip keledi. Gúlnár Dyǵaeva 18 jyldan beri №52 mektepte medbıke bolyp jumys isteıdi. Onyń mindetine alǵashqy medısınalyq kómek kórsetýmen qatar, saýyqtyrý, aldyn alý jumystary da kiredi. Partada durys otyrýdan bastap durys tamaqtanýdyń qyr-syryna deıin úıretedi. Talap boıynsha osyndaı «sergitý sáti» qalanyń barlyq bilim oshaǵynda júrýi tıis. Qarapaıym ǵana jattyǵýlardyń oqýshylar úshin, ásirese bastaýysh synyp balalary úshin paıdasy kóp. Sońǵy jyldary kóz aýrýlarynyń 1,5 esege azaıýy soǵan dálel.  

«Oqýshylarǵa óte qyzyqty. Balalar óte belsendi túrde qatysyp, qosylyp otyrady. Kóńildi mýzykalardy qosyp, balalardyń dene shynyqtyrýdaǵy jasaǵan árbir is-qımylyn qosa otyryp, bı jáne de jattyǵý jumystarymen sergitý sátin oryndatyp otyramyz», - deıdi №52 mekteptiń muǵalimi Aıjan Erkebaeva.

Almaty qalasy Qoǵamdyq densaýlyq saqtaý departamenti júrgizgen saýalnama taǵy bir máseleni anyqtady. Qaladaǵy 10 oqýshynyń bireýi ǵana sportpen belsendi aınalysady eken. Sonymen qatar jemis-jıdek pen kókónisti múldem qoldanbaıtyndar da bar. Sol sebepti mamandar ata-analarǵa as mázirin durystap, salamatty ómir saltyn ustanýǵa keńes berýde.

---