InfoHub Logo

Elimizde júrgizilip jatqan keń aýqymdy jobalardyń ishindegi biregeıi - bilim júıesin zamanaýı talaptarǵa saı órkendetý, bul árıne joǵary deńgeıli bilikti mamandardy daıarlaýdy qajet etedi. Elbasy N.Á. Nazarbaev ta únemi bilim berý isinde tárbıe jaǵyna, ásirese otansúıgishtik, rýhanı qundylyqtar qasıetterine baýlýǵa basa nazar aýdarýdyń qajettiligin aıryqsha atady. Oǵan JOO oqý prosesin uıymdastyrýǵa kómek, ǵylymı zertteý jumystary boıynsha ǵalymdarǵa baǵyt-baǵdar silteý, jas mamandardy tárbıeleýde otansúıgishtik, rýhanı qundylyqtar qasıetterine baýlıtyn kópshilik is-sharalar júrgizý jobalary jatady. Bul jobalardyń bári derlik ózara seriktestik qatynastardy damytý barysynda tolyqqandy júzege asyrylatyny málim.

Joǵary oqý oryndaryn sıfrlandyrý dáýirinde kitaphanalardyń alatyn orny erekshe ekendigi de belgili. Sebebi, kitaphana aqparattardy jınap, saqtaýshy oryn ǵana emes, oqyrmandardy óz betinshe bilim alýǵa, ártúrli aqparat kózderimen jumys isteýge úıretetin, olardyń izdenis áreketterin, ǵylymı-zertteý qyzmetin damyta otyryp, saýatty paıdalanýshyny qalyptastyratyn mekeme. Sondyqtan da bilim alýshylardy sıfrlyq aqparattyq keńistikte jeteleýde kitaphana isiniń basqalardan ozyq turýy mindet jáne bilim berý úrdisinde bilim alýshylardyń talap-tilegin, suranysyn sapaly oryndaýy tıis. Bilim salasynyń álemdik keńistikke enýi, halyqaralyq standarttardy basshylyqqa alýy – órkenıetti qoǵamnyń ınovasıalyq bilim berý tehnologıalaryn endire otyryp halyqaralyq seriktestikter arasyndaǵy úılesimdilikti meńgerýdi talap etedi.

\Kitaphanashy mamandyǵy búgingi tańda qyzmeti men mindeti ózgergen jańa mamandyqqa aınalǵan. Osyǵan sáıkes jańa oqý baǵdarlamasymen «Kitaphanalyq» bilim beretin birden bir joǵary oqý orny bolyp ál-Farabı atyndaǵy QazUÝ aıtsaq bolady. Búgingi tańda bul oqý ornynda bakalavrıat, magıstratýra, doktarantýra negizinde «Kitaphana isi», «Kitaphanalyq aqparattyq júıe» mamandyǵy boıynsha bilim beriledi. Bıylǵy jyly Quacquarelli Symonds (QS) analıtıkalyq agenttiginiń jahandyq reıtıńinde ál-Farabı atyndaǵy QazUÝ 165-shi oryndy ıelenip, álemdiń úzdik 200 ýnıversıtetiniń qataryna endi. Álemniń eń úzdik dep tanylatyn JOO arasynda el mártebesin ustap turǵan «Qara shańyraqtan» búginde qanshama jas mamandar kásibı bilim alyp, sol bilimin el damýy jolynda jumsap, adal qyzmet atqaryp keledi. Ýnıversıtetten «Kitaphana isi» mamandyǵy boıynsha bilim alǵan stýdentterimiz qazirgi tańda Qazaqstannyń túkpir-túkpirinde respýblıkalyq, oblystyq, qalalyq, aýdandyq, aýyldyq kitaphanalarda, mektep, ýnıversıtet kitaphanalarynda jumys isteýde. Demek jańa zaman talabyna saı bilim alǵan jas kásibı mamandar elimizdegi «Kitaphana» salasynyń damýyna óz úlesterin qosyp júr deýge bolady.

\Bul oraıda biz elbasymyzdyń «Ómir boıy bilim alý» jónindegi qaǵıdasyn da esten shyǵarmaýymyz kerek. Iaǵnı, ómir súre otyryp bilim alyp, bilim ala otyryp tehnologıalardy meńgerip, álemdik órkenıetten tys qalmaı, jańa júıelerdi meńgerýimiz kerek. Álemniń damyǵan elderiniń qataryna ený jolynda jasap jatqan ıgi jumystardyń qatarynda qashan da «Kitaphanalardy» damytý da turýǵa tıis. Sebebi, damyǵan eldiń qaısybirin alyp qarasańyz da óziniń alyp kitaphanalarymen, ondaǵy baı qorymen maqtanady. Ál-Farabı atyndaǵy QazUÝ sol baǵytta jumys istep jatqan irgeli oqý orny ekenin aıtýdan jalyqpaımyz!

 

Mýhajanova T. N. t.ǵ.k., dosent,

Otarbaı Shahrızada  Ál-Farabı atyndaǵy QazUÝ

«Tarıh, arheologıa jáne etnologıa» fakúlteti

«Kitaphanalyq aqparattyq júıe» mamandyǵynyń 2-kýrs magıstranty

 

---