InfoHub Logo

Elimizdiń ortasynda jetide bir, endi eki bolatyn bazarymyz bar (bolatyn) edi. Anaý kúngi alasapyranda dúkennen qant, shaı alyp shyqsam, bizdiń Maqash soǵylqasynda tamyr - soqyr Ivan bar, tory sholaǵyna minip, bir taıdy qosarǵa alyp jele jortyp bara jatqanyn kórdim. Bul qurǵyr neǵyp Ivanshyl bolyp ketti, aýylǵa qaıtpaı ma eken dep, sońynan «Maqash, Maqash, toqta» dep daýystap edim, Maqashym maǵan bir qarady da, Ivanǵa bir nárse sybyrlaǵandaı bolyp shoqyta jóneldi.

Osynsha jasqa kelgenshe kudaı muny jeliktirip aldy ǵoı, qorasynda tis shuqıtyn shóp joq. Aınaldyrǵan eki sıyry kórshiniń shóbine túsip, múıizin qaqtyryp qansyrap jatyr, qatyqsyz qara kójege qamalyp qatyn-balasy úıinde shýlap otyr.

Munyń munda bir kóterem taıǵa dúnıeniń qazynasyn alatyndaı Ivannyń úıinen shyqpaı sandalyp júrgeni mynaý dep keıip, artynan at bazaryna men de keldim. Kelsem Maqashty bes-alty orys ortaǵa alǵan. Betinen maıy shyqqan, aýzy-basyn túk qaptaǵan Alekseı taıyn saýdalap tur eken.

- Taı satasyń tamyr?

- Satam.

- Qansha suraısyń?

- Júz som.

- Tifý! Qutyrdyń ba, Maqashqa, aıtar edim mas bolǵan, araq joq. Júz som suraısyń, uıat qaıda?

-  Yznakom, bul taı arǵymaq balasy, atasy uly dúbirde báıge alǵan qara arǵymaq. Ony myna Ivan da biledi, - dep Maqash qorazdanyp, qamshysymen búıirin taıanyp, tory sholaqtyń miner jaǵyna taman qısaıyńqyrap otyrdy.

-  Atasy qara arǵymaq! Qara arǵymak bolsa mne kakoe delo, seniki atasyn satpaıdy, mynaý turǵan jaman balasyn satady.

- Baı, almasań da taıymdy jamandama, janýarda osy kúni syn bar ma, jazdygúni kórseń bir júz túgil eki júz berer ediń. Onda maqpaldaı qara edi, qazir jún ońyp, azyp qubaqan bolyp ketti.

Soqyr Ivan Álikseıge orysshalap: - Taı arǵymaq tuqym ekeni ras, Maqash ótirik sóılemeıtin jigit, jazdygúni kórgenimde kómirden qara, sýretten sulý edi, átteń aqsham joq, ózim alar edim. Taıyn Ivan maqtaǵan soń, Maqash burynǵydan da artyq kóterilip:

- Ana jyly osy taımen bir eneden týǵan arǵymaqty myń jarymǵa sattym, - dep maqtandy. Munysy álde ótirik, álde ras, áıteýir Álikseı nanyp: Baltaı-shaltaı ne kerek, satar bolsań, tamyr óler jerin bir-aq aıt, - dedi. Ekeýi bir saǵattaı saýdalasyp, aqyrynda 50 somǵa kelisip, qol qaǵysty.

Maqashtyń eptiligine súısinip, manadan beri qarap turǵan men de Álikseıge:

- Baı, bıik arzan aldyńyz, terisin qymbat satarsyz! - dedim. Qazaqshaǵa shorkaq Álikseı bul sózime ne túsinsin, taıdy jetelep úıine tartty.

---