InfoHub Logo

         Baıaǵyda Ómirbek degen baı bolypty, baıdyń úsh qyzy bolypty. Baıdyń kishi qyzynyń aty Aısha eken. Aıshanyń aı dese aýzy bar, kún dese kózi bar, úrip aýyzǵa salǵandaı sulý eken.

         Kúnderdiń kúninde bir bala kelip Ómirbektiń, qoıyn baǵady. Bul balanyń kelý sebebi bylaı edi: Ákesi, sheshesi aǵalarynan erte aırylyp jasynan joqshylyq pen jetimdikti birdeı kórip ósedi. Sonan bul bala bir baıǵa jaldanady. Kóp keshikpeı sol aýylda juqpaly aýrý shyǵady. Ol aýyldyń aqsaqaldary men qara saqaldary osy aýrýdy ákelgen osy bala dep balany qýyp jiberedi. Qashyp kele jatqan balanyń aldynan sol jaldanǵan baıdyń balasy kezdesedi. Ol ań aýlap kele jatyr eken. Baıdyń balasy kezdesken úıindegi jalshy bala ekenin tanyp: «Áı, Bek! Beri kel!» dep shaqyrady. Sonan jańaǵy baıdyń balasy Bekti shaqyryp alyp, «sen nege qashasyń, qaıt aýylǵa!..» dep attyń baýyryna alyp sabaıdy. Bek «ketsem óshimdi alyp keteıin» degen oıǵa kelip: «Qaıtsam qaıtaıyn, artyńa mingestire ket!» – deıdi jalynǵan bolyp. Baıdyń balasy «kel» dep eńkeıe bergende Bek qolynan shap berip ustaı alyp attan julyp tastaıdy da bastan bir tebedi. Sóıtip, atyn, qarý-jaraǵyn tartyp alyp, Bek beti aýǵan jaqqa qaraı júrip ketedi. Júrip kele jatsa, aldynan bir aýyl kezdesedi. Bek osy aýylǵa kelip qoıshy bolady. Bul álgi Ómirbektiń aýyly edi. Bek osy aýylda tura beredi. Bir kúni Bek sýǵa shomylyp kele jatsa, Ómirbektiń úsh qyzy sýǵa kele jatady. Aısha Bekti kórip onyń tulǵasyna, bet ajaryna qyzyǵady.

         Aqyry Bek pen Aısha bir-birine ǵashyq bolady. Biraq qosylamyz deýge baıdan qorqady. Ómirbek ishinen: «Osy qyzdarymdy eshkimnen qalyńmal almaı-aq súıgenine qossam», – dep oılaıtyn edi.

         Bir kúni ol qyzdaryn jınap alyp, olarǵa óziniń oıyn aıtady. Sóıtip, barlyq elin jınap alyp: «Qyzdarym, kimdi unatsańdar, sony almamen uryńdar» dep úsheýine úsh alma beredi. Ómirbektiń qol astyndaǵy halyq túgel jıylady, úsh qyzynyń ishinen úlkeni men ortanshysynyń unatqany baıdyń balalary, al Aıshanyń súıgeni manaǵy Bek bolyp shyǵady. Ómirbek Aıshaǵa ókpelep, basqa qyzdaryn jasaýlarymen uzatady da, Aıshaǵa jasaý bermeıdi. Olar óz eńbekterimen kún kóredi.

         Kúnderdiń kúninde Ómirbek aýyrady. Buǵan baqsy-balgerlerdiń aıtýynsha, kıiktiń eti em bolady deıdi. Osyny estigen Bek ańǵa shyǵady. Ómirbektiń baı kúıeýleri dalada Bekpen kezdese ketedi. Biraq Bekti tanymaıdy. Bek bul kezde kıik ustap, baýyzdap jatady. Bekten janaǵy bajalary turyp et suraıdy. Bek olarǵa kıiktiń qaryn-suryndaryń beredi de, onyń aqysyna arqalaryna tańba basady.

         Bek kıiktiń etin ákelgen soń, jaqsylap pisirip tabaqqa salady, tabaqtyń bir shetine sıyrdyń tezegin salady. Aısha etti ákesine aparyp tartady. Ákesi jep bolǵan soń, «myna tezegiń ne?» – deıdi.

         — Sıyr qorada turamyz, ózińizdiń bergen úıińiz ǵoı, múmkin baıqaýsyzda túsip ketken sıyrdyń tezegi shyǵar, – deıdi qyzy. Baı kúıeý balalary da qaıyn atasyna kıiktiń ishek-qarnyn beredi. Ómirbek kıiktiń etin jegesin jazylyp ketedi.

         Baı kúıeýleri: «Biz kıik atyp ákelip, atamyzdy ólimnen jazyp aldyq», – dep maqtanady. Bek bir kúni baıaǵy baı balasynan tartyp alǵan kıimdi kıip, atty minip Ómirbektiń úıine barady. Ómirbek Bekti tanymaı qalady. Bek «sizdi aýrý dep edi, kim jazdy?» – dep suraıdy. Ómirbek óziniń baı kúıeýleri jazǵanyn aıtady. Bek baı kúıeýleriniń kıiktiń etin kimnen alǵanyn aıtady. Ómirbek oǵan senbeıdi. «Nanbasańyz kúıeýlerińizdi shaqyryp aldyryńyz, olar anyǵyn aıtar», – deıdi.

         Ómirbek kúıeý balalaryn shaqyrtady. Arqalaryna tańba basylǵan baı kúıeý balalary tana almaıdy. Adamnyń qasıeti malda emes, adamshylyǵynda  degendi Ómirbek sonda ǵana túsinedi.

     Aısha sulý men Bek adal eńbegimen baqytqa jetip, elge qadirli        bolypty.

---