InfoHub Logo

Ertede bir ǵaryp shal bolady. Shaldyń jan degende jalǵyz qyzy, mal degende bir kók sıyry bolady. Shal bir kúni kók sıyryn ózenge sýaryp, sýdyń jaǵasynda dem alyp otyrady. Sýdyń janynda shaldan buryn kelgen úsh taz otyr eken. Qasyna kelip otyra bergende bir taz «óltiremin» dep jabysa ketedi. Shal baıǵus jalynyp: «Kók sıyrymdy bereıin, qoıa ber», – deıdi. Qoıa bermeıdi. «Qyzyńdy berseń, qoıa beremin», – deıdi. Shal baıǵus qoryqqanynan « bereıin» deıdi.

         Úsh taz shaldy qoıa beredi. Shal úıine keledi. Biraq as-sý ishpeı,  úhileı  beredi. Sonda qyzy otyryp ákesine:

         — Áke, nege as ishpeı úhileı beresiń? – deıdi.

         — Kók sıyrdy jaıyp júrgende, bir úsh taz jumbaq aıtysyp otyr eken, men qasyna bara berip edim, bireýi jańylyp ketip, meniń jumbaǵymnyń quıryǵyn úzdiń dep óltirmek boldy. «Ólimnen qoryqqanymnan seni solarǵa beremiń dep ýáde ǵyp keldim», – deıdi shal.

         — Áke, onyń nesine ýaıymdaısyń? Asyńdy ish te ustaǵa kete ber, – deıdi qyzy. Shal asyn iship, ustaǵa ketedi. Bir ýaqytta qyz bastary jaltyrap, júgirip kele jatqan úsh tazdy kóredi. Qyz bórkin júktiń ústine qoıyp, urshyǵyn qolyna alyp, esiktiń aldyna shyǵyp, tura qalady. Úsh taz júgirip kelip:

         — Esikke nege tura qaldyń, qyz hanym? – deıdi.

         — Etekterińdi nege túrdińder taz hanym? – deıdi qyz.

         — Bórkiń qaıda qyz hanym? –deıdi.

         — Shashyń qaıda, taz hanym?

         — Ákeń qaıda, qyz hanym?

         — Atam  tyshqannyń  múıizinen pyshaq soqtyra ketti, taz hanym!

         — Tyshqannyń múıizi bola ma eken, qyz hanym!

         — Jumbaktyń quıryǵy bola ma eken, taz hanym! Taz:

         — Oı, tilińdi táńiri kessin! – dep, jeńilip syrt aınalyp ketken eken.

---