InfoHub Logo

Aǵymdaǵy  jyldyń qyrkúıek aıynan bastap 2, 5 jáne 7 synyp oqýshylary jańa oqýlyqpen bilim alady. Bul týraly búgin QR Ortalyq komýnıkasıalar qyzmetindegi brıfıńte elimizdiń Bilim jáne ǵylym vıse-mınıstri Elmıra Sýhanberdıeva málim etti.

«Respýblıkalyq komısıa jumysynyń qorytyndysyn jarıa etýge ruqsat etińizder. QR Bilim jáne ǵylym mınıstrligi tarıhynda komısıa múshesi esh ýaqytta 13 adamnan asqan emes jáne bul jumystardyń barlyǵy jabyq rejimde júrgizilip keldi. Biz alǵash ret respýblıkalyq komısıa músheleriniń sanyn 40 adamǵa deıin kóbeıttik. Elimizdiń barlyq óńirlerinen muǵalimder, sonymen birge tájirıbeli ǵalymdar men depýtattar shaqyryldy. Olardyń qatarynda Birǵanym Áıtimova, Bekbolat Tileýhan, Jambyl Ahmetbekov bar. Bul adamdar respýblıkalyq komısıa jumysyna qatysty. Konkýrsqa otandyq jáne sheteldik 12 baspa qatysty», - dedi ol.

Onyń atap ótýinshe, komısıa jumysy tolyqtaı kameraǵa túsirilgen.

«Eger pándik komısıalardyń barlyq múshelerin alatyn bolsaq, onda olardyń sany 140 adamnan asady. Mundaı jaıt ta birinshi ret bolyp otyr. Menińshe, jumys barynsha ashyq boldy. Osy rette 2, 5 jáne 7 synyptarǵa arnalǵan oqýlyqtardy irikteý jumystarynyń qorytyndysyn jarıa etpekpiz», - dedi vıse-mınıstr.

Onyń deregine sáıkes, komısıalardyń qaraýyna myńnan astam oqýlyq usynylǵan. İrikteý barysynda 240-y qaldyrylyp, odan keıin onyń 197-si respýblıkalyq komısıa qaraýyna usynylǵan. Komısıa jumysynan keıin 130 oqýlyqty paıdalanýǵa keńes berilgen.

«Olar oqýshynyń jas erekshelikterin eskere otyryp memlekettik standarttar men baǵdarlamalarǵa tolyq saı ázirlengen oqýlyqtar. Biz 1 jyl boıy 2, 5 jáne 7 synyp oqýlyqtaryna saraptama júrgizdik», - dedi Respýblıkalyq ǵylymı-tájirıbelik ortalyq dırektory Beıbitgúl Kárimova.

Onyń sózine qaraǵanda, jańa oqýlyqtar 2015 jyldyń jańa standarttary negizinde ázirlengen jáne mazmuny jaǵynan eski oqýlyqtar birshama aıyrmashylyǵy bar.

---