InfoHub Logo

Baıaǵy zamanda bir aýylda bir keńpeıildi shal men nıeti tar shal turypty. Keńpeıildi shal óziniń tamaǵyn, qolyndaǵy bar zatyn kórshilerimen bólisip ómir súripti. Al nıeti jaman shal árdaıym joq deýmen, sarańdyqpen ómir súripti. Kerisinshe odan keń peıildi shal kúrish surap kelse, bergen kúrishiniń jartysyna qum qosyp berip, mazaq qylady eken.

Bir kúni qaıyrymdy shaldyń úıine bir jolaýshy kelip qonypty. Ol onyń úıine túnep shyǵyp, keterinde bir qyzyl jelpýish jáne kók jelpýishin umytyp, qaldyryp ketipti. Qaıtyp kelip ony almapty. Ony keń peıildi shal alyp, kúnniń astynda biraz turyp, qyzyl jelpýishpen jelpip kórip edi. O, toba, muryny uzara tústi. Ol shoshyp ketti. Sóıtip ekinshi kók jelpýishti alyp onymen de jelpip kórse, ol uzarǵan muryndy qysqartyp, áýelgi qalpyna aparady eken. Buǵan tań qalǵan keńpeıildi shal taǵy birneshe ret qyzyqtap, murnyn uzartyp, qaıta qystartyp kóredi. Ony estigen kórshisi nıeti tar shal álginiń eki jelpýishin de urlap alyp, onymen aqsha tabýdy oılaıdy. Sóıtip úıine alyp kelip, aýlasynda shalqaıyp jatyp, eki jelpýishti synap kórdi. Basynda bir kishkene uzartyp, qaıta qysqartty. Óziniń isine balasha máz boldy. Sálden soń oǵan mynadaı jaman oı keldi. Erikken nıeti tar shal murny qaı jerge deıin uzarady eken dep, aıaǵyn kókke kóterip qoıyp, qyzyl jelpýishpen jelpı berdi, jelpı berdi. Onyń murny jelpigen saıyn uzaryp, sonaý aspannyń tórine bir-aq shyqqanyn qaıtersiń! Ol oǵan máz-meıram. Onyń uzarǵan murny aspandaǵy bir perishteniń úıiniń edenin tesip shyǵypty. Aqymaq shaldyń qylyǵyna ashýlanǵan aspandaǵy perishte onyń murnyn, úıindegi dińgektiń birine baılap tastapty. Ony aqymaq shal baıqamady. Oıynda dáneńe joq, uzarǵan murnyn qysqartpaq bolyp, kók jelpýishpen jelpigen eken. Sóıtse álgi jelpigen saıyn murny shaldyń ózin kókke kóterip áketipti. Týra aspandaǵy álgi perishteniń úıiniń dińgegine taqaǵan sátte ol murnyn sheship qoıa bere salypty. Sheshken bette gúrs etip jerge qulapty. Jerge qulaǵan álgi beıshara shaldan ne qaldy deısiń?! Sóıtip onyń baılyǵy men úıine qaıyrymdy, keńpeıildi shal ıelik etipti. Biraq ol onyń dúnıesiniń bárin aýyl adamdaryna taratyp berip, olarmen birge bólisip ómir súrgen eken.

Koreı tilinen aýdarǵan Dastan Aqash

---