InfoHub Logo

Elektr jaryǵynyń ýaqytsha shektelip turýyna baılanysty ústel ústinde jez qońyraý turar edi. Jez qońyraý - osy qalpynda mop-momaqan.

Al qabyrǵa saǵatynyń uzynsha tili eregiskendeı on bir degen sıfrdyń ústinde uzynynan sulap túsip jatyp alady. Demek, qońyraýǵa áli 5 mınýt ýaqyt bar degen sóz. Muǵalim úshin ár mınýt baǵaly. Eger keńse qyzmetkeriniń jumys ýaqytysy saǵatpen esepteletin bolsa, muǵalimniń jumys ýaqytysy - mınýtpen esepteletin birden-bir mamandyq.

Saǵattyń sekónd tili mensiz qaıda barasyńdar degendeı, saǵat betinde tyrs-tyrs etip, tynymsyz júgiredi. Ol saǵat betin óz baǵytymen bir aınalyp shyqqanda baryp, uzynynan sulap túsip jatqan saǵat tili erine alǵa jyljyr edi. Tórt mınýt. Úsh. Eki...
Osy kezde kezekshi muǵalıma ústel ústindegi qońyraýǵa qol júgirtedi. Ol qońyraýdyń shyǵyrshyǵynan saýsaǵymen ilip alǵan sátte-aq, álginde ǵana mop-momaqan bolyp kórinip turǵan jez qońyraý oıyn tilegen baladaı oınaqtap sala berer edi. Quddy shákirttiń óz minezi sekildi.

Muǵalıma esikti ashyp, syrtqa betteı bergen sátte-aq, tentek qońyraý aqyry óz degenin jasap úlgeredi. Onyń ortasyndaǵy uzynsha tili qabyrǵasyna baryp soǵylady. Bar bolǵany bir-aq márte soǵylýynyń ózi jetkilikti. Daýys tym alysqa ketedi.
Osy kezde syrtta turǵan oqýshylar ishke qaraı lap qoıar edi. Sebebi shákirt sanasy qońyraýdyń ámirli únine baǵynyp úırengen.
Dál osy sátte kishkentaı, til alǵysh, elgezek qyzdar kezekshi muǵalımanyń qolyndaǵy qońyraýǵa jarmasady: "Apaı! Apaı! Maǵan berińizshi! Syrtqa men soǵaıynshy! Maǵan berińiz!"

Olardyń qońyraýdy ózine jula-mula tartqandyǵy sonshalyq, tipti kezekshi muǵalıma shyǵyrshyqtan saýsaǵyn áreń sýyryp úlgerer edi.
Kishkentaı, til alǵysh, elgezek qyzdar sol betimen júgire basyp, mektep basqyshynyń ústinde turyp alyp qońyraýdy uzaq syńǵyrlatady. Olar tipti ózderi de kele jatyrǵan aq kóılek kıgen uldarǵa "asyqsańshy!" der edi nyǵyzdaı sóılep.
Qońyraýdyń syńǵyrlaǵan úni "Sabaqqa!", "Sabaqqa!", "Bilimge!", joq bilimge ǵana emes-aý, bolashaqqa shaqyryp turǵandaı.
Sálden keıin bári de tynyshtala qalady.

Tek ashyq turǵan synyp esikterinen sabaq berip jatqan muǵalimniń ózine ǵana tanys jáne sol pánnen sabaq beretin basqa da áriptesterine jat emes, ózge pán muǵalimderin onsha-munsha qyzyqtyra qoımaıtyn, osy pánge ǵana tán áldebir sózder estilip qalyp jatar edi.

---