InfoHub Logo

Baýkeń (B.Momyshuly) qupıa jazbalardy dinge, senimge, ultqa qatysty dúnıelerdi oryssha emes, arab árpimen jazyp otyrypty.Ol týraly kelini Zeınep apa da rastaıdy: «Men sháı mázirin salǵan ydysymdy kóterip atanyń bólmesine bardym. Alasa ústeldiń ústindegi temeki qaldyqtaryna tolyp qalǵan kúlsalǵyshty ala bergenimde, ashyq jatqan dápterdiń betine iri arab áripterimen jazylǵan qysqa úsh jolǵa kózim tústi, biraq oqymadym. Kúlsalǵyshty tazartyp alyp kelsem, atam dápterin áli almapty. Taǵy da jazýǵa eriksiz kózim tústi, shydamymdy tejemeı oqyp úlgerdim.

Naızany ushyna qaramaǵyn,

Onyń tutqasyn ustaǵan

Qoldyń kúshine qaraǵyn, — degen joldar eken.

— Kózime tura qara! — oqystan shyqqan daýystan júregim jarq etti.

— Shynyńdy aıt arab áripterin oqı alasyń ba?

— I-ı-á, — dedim, nege ekenin, aıaq asytanan kekeshtenip.

— Shekem qyzǵan eken! — mańdaıyn alaqanymen sart etkizdi.

Men sasqalaqtap qaldym.

— Sorym qaınaǵan eken! Qupıalarymdy jazǵanda osy áripterdi paıdalanýshy edim, endi qaıttim? — degende amalym taýsylyp júzine qarasam, atam murtynan kúlip otyr eken. Ázil ekenine kózim jetken soń:

— Keshirińiz, baqyraıyp tursa... eriksiz oqydym, dep shynymdy aıttym.

— Balam, eger sózdiń jónine kóshsek, bul áripti bilgeniń óte jaqsy eken. Meniń jazbalarymnyń ájeptáýir bóligi arab áripterimen jazylǵan. Bala kezimde saýatymdy osy áriptermen ashqanǵa ma, qol ońaı júgiredi. Keıin Baqytjan (balasy) qoljazbalarymdy ózgeniń kómeginsiz oqı almaıdy-aý dep oılaýshy edim, endi qarasam sen bar ekensiń, dedi».

Batyrdyń arab áripterimen jazǵan kóp jazbalary áli de tolyqtaı baspa betin kórmese kerek. Óıtkeni Baýyrjantanýshy ǵalym Mekemtas Myrzahmetov batyrdyń 30 tomdyq jınaǵy jarıalanǵanda, áli de 15 tomdaı mura qalǵanyn tilge tıek etken bolatyn.

---