InfoHub Logo

S.Toraıǵyrov atyndaǵy oblystyq kitaphananyń balalar ádebıeti bólimi kúrdeli jóndeýden ótip, qoldanysqa qaıta berildi. Búgin qaıta jańartylǵan kitaphanaǵa oblys ákimi Ábilqaıyr Sqaqov arnaıy kelip, atqarylǵan jumysqa oń baǵa berdi.

-Jóndeý jumystarynyń sapaly atqarylǵany kózge birden kórinip tur. Pandemıa aıaqtalǵan soń bul jerde balalar alańsyz bilim alatyn bolady. Jumysyn tez ári tıanaqty atqarǵan merdiger kompanıaǵa rızashylyq bildiremin, -dedi Á.Sqaqov.
Aıta keterligi, oblystyq kitaphananyń balalar ádebıeti bólimine Qazaqstan Jazýshylar odaǵynyń múshesi, aqyn, qalamger, balalar ádebıetiniń kórinekti ókili, jerlesimiz Súleımen Baıazıtovtyń esimi berildi.

Elý jyldan astam jóndeý kórmegen nysanda jas jetkinshekterdiń bilim alýyna, ýaqyttaryn tıimdi ótkizýine barlyq jaǵdaı qarastyrylǵan. Kitaphananyń qyzmet kórsetý júıesi birneshe aımaqqa bólingen.

Máselen, «Bilimpaz» aımaǵynda abonement pen oqý zaly bar. Bul jerde oqyrmandar úshin úıge kitap alýǵa nemese oqý zalynda otyryp kitap, gazet-jýrnaldar oqýǵa múmkindik bar. «Baldyrǵan» oqý aımaǵynda mektepke deıingi jáne bastaýysh mektep jasyndaǵy balalarǵa arnalǵan tanymdyq oıyndar aımaǵy shoǵyrlanǵan. «Órken» ulttyq shyǵarmashylyq aımaǵynda balalardyń oqýǵa degen qyzyǵýshylyǵyn ulttyq salt-dástúrler arqyly damytýǵa, shyǵarmashylyqqa baýlýǵa basymdyq berilmek. «IT-Bala» medıa aımaǵy jas oqyrmandardy kompúterlik saýattylyqqa baýlý, aqparattyq mádenıetti qalyptastyrýǵa arnalǵan. «Zerde» ıntellektýaldyq aımaǵynda túrli taqyryptardaǵy semınarlar, konferensıalar, prezentasıalar, trenıńter, oıyn-saýyq sharalary ótetin bolady. Zamanaýı tehnıkalar arqyly oqyrmandarǵa beınefılmder kórsetiledi.

S.Toraıǵyrov atyndaǵy oblystyq kitaphana basshysy Sholpan Shahmetova balalar ádebıeti bóliminde 86 myńnan astam kitap qory bar ekendigin atap ótti. İshi jaryq ári jyly kitaphana tolyqtaı zamanaýı tehnıkalyq quraldarmen jabdyqtalǵan. Jańartylǵan nysan balalar úshin qyzmet kórsetýge daıyn.

---