InfoHub Logo

Qanat — atasynyń balasy. Atasy bir aýyldyń eń jasy úlken qarty. Anada «Áı, kerpushyq! Bir mashına shóp túsirip berseń, qul bolyp ketesiń be?» dep keńsede atasy ákimge qamshysyn ala júgirgeńde, baıǵustyń kózi tas tóbesine shyǵyp, «aınalaıyn atataı, jumys-jumys dep umytyp ketippin» dep keshirim surap báıek bolǵan. Mine, sol kúnnen beri Qanattyń da minezi ózgerip salsyn. «Atasynyń balasy atasy sıaqty bolý kerek». Keshe túste sabaqqa daıyndalyp otyrǵan ápkesi Sáýleniń dápterin ortasynan qaq bólip jyrtyp tastady. Ońdaǵysy maǵan ýaqytynda bir kese aıran ákep bermediń degeni. Sáýle ápkesi ashýlanyp, jylap ózine tura umtylyp edi, Qanat saspady. «Atama aıtamyn» dedi aıbat shegip. Ol ol ma, kórshiniń balasy ózinen kishi Ulannyń saqasyn aıdalaǵa laqtyryp jiberdi. Ondaǵysy «maǵan utyla qoımadyń» dep ashynǵany. Qoıshy, sonymen Qanat bir kúnde atasyna uqsap shyǵa kelsin.

Áýeli ózin janyndaı jaqsy kóretin ákesimen anasynyń da jumsaǵan jerine barmaı, «atama aıtamyn» dep qorqytyp jónine ketip turdy. Óıtkeni Qanattyń atasynan bul aýylda qoryqpaıtyn adam joq. «Áı, paqyrlar, Qanat bir áýlettiń tiregi bolady, áli. Tıispeı júrińder túge!» degen atasynyń qaharly úni talaı jerde estilip qalatyn.

Biraq biraz kúnnen keıin Qanattyń jaıy qıynǵa aınaldy. Sáýle ápkesi munymen sóılespeıtin ádet tapty. Kórshiniń balasy Qanatty kórse, ázireıildeı shoshyp, úıine kirip ketetindi shyǵardy. Bala-baqshadaǵy kishi toptyń balalary Qanatty kórse, oıynshyqtaryn qoınyna tyǵyp, tárbıeshi apaıǵa júgiretin boldy. Áýeli ákesi men anasy da burynǵydaı erkeletkenin qoıdy. Atasy shabdar bıesin minip, basqa aýyldarǵa jolaýshylap ketkende, Qanat ne isterin bilmeı, jalǵyz qalyp, esi shyqty. Aqyry esik aldyndaǵy oryndyqta otyrǵan Aqlıma apaıdyń janyna kep otyryp, jyly sálemdesti.

— Apaı, keshirińiz... Men   keshe  sizge sálemdespedim, — dedi kúmiljip.

— Men atamnyń balasymyn ǵoı... Aqlıma apaı buǵan ańtaryla qarady.

— Tek sen ǵana emes, osy aýyldyń bári — Bekzat qarttyń balasy. Biraq olardyń bári sen sıaqty emes. Bir-birimen sálemdesip, jón surasady. Qıyndyq bolsa kómektesedi...

— Iá, seniń atań keremet adam. Sonaý asharshylyqta ol kisi osy aýyldy bólip-jarmady. Osy Besiktoǵannyń boıyna kóshirip alyp keldi. Muz astynan balyq aýlatyp, aman alyp qaldy. Oǵan búkil el qaryzdar. Biraq ol bul qamqorlyǵyna buldanbaıdy...

Keshkisin Qanat batylsyzdaý basyp kelip Sáýleden anaý kúngi tirligi úshin keshirim surap, jyrtqan dápteri úshin atasy bergen jıyrma teńgesin usyndy. Sáýle baýyryn qushaqtap betinen súıdi.

— Tentek bolma, atasynyń balasy, á  —dedi ol kúlimsirep.

— Bolat, keshir. Saqamdy saǵan bereıin, — dedi Qanat atasyna uqsap. Bolat rıza bolyp:

— Keshirdim, atasynyń balasy. Men de sol kúni seni utyp... — dedi Qanatqa meıirlene qarap.

— Balalar, meni keshirińdershi. Aıyp menen. Endi senderdiń oıynshyqtaryńa tıispeımin, — dedi Qanat bala baqshaǵa kelgende kishi toptyń balalaryna kelip.

— Rahmet saǵan, Qanat. Biz seni aǵamyz dep júremiz, — dedi olar qýanyp.

— Kóke, mama, qaıda jumsasańdar da men daıyn, — dedi Qanat keshkisin úıde shaı iship otyrǵanda.

— Mine, jaraısyń, atasynyń balasy, — dedi ákesi.

— Keshirim suraǵanyńnan, aınaldym, — dedi mamasy.

Sóıtip bir kúnde Qanat burynǵy Qanat bolyp shyǵa keldi. Atasy úıge kelgende ol, oń tizesine otyryp alyp, bolǵan oqıǵany baıandap shyqty.

— Á, balam. Sózdiń, istiń mánine túsine bastapsyń. «Keshirińiz» degen — sıqyrly sóz. Kókireginde zerdesi bar bala osyndaı bolady, — dedi atasy qýanyp.

---