InfoHub Logo

Japon ertegisi

Bir knázdiń aq shynydan jasaǵan qymbatty qumyrasy bolypty. Mundaı ilýde ǵana kezdesetin qumyrany Qytaıdan aldyrǵan desetin jurt. Knáz qumyrada hosh ıisti, óte dámdi taǵam ustaıdy eken. Qumyra moınynyń tarlyǵy sonsha, úsh-tórt saýsaq zorǵa sıady. Knáz anda-sanda ǵana qumyraǵa saýsaǵyn suǵyp, álgi taǵamnan alyp jep júripti.

Knáz esiginde Dzıa degen kári qyzmetshi júripti. Ol knázdiń bala kezinen beri osy esikte kele jatqan kórinedi. Dzıa ábden qaýsap, qartaıyp, aqylynan da adasa bastaǵan eken. Bir kúni knáz qumyradan birdeńe alyp, tańdaıyn qaǵa tamsanyp jep jatqanyn Dzıanyń kózi shalyp qalady. «Mynaý asa tátti birdeńe eken» dep oılaǵan Dzıa shimirikpesten knázge:

—  Azǵantaı maǵan da bershi, — deıdi.

— Óı, bul jaı ǵana nárse ǵoı, — deıdi ishi qımaı knáz qumyrany qyzmetshige usynyp jatyp.

Dzıa knázge raqmet aıtyp, qumyranyń aýzyna qolyn apyl-ǵupyl suǵyp jiberedi. Sonan soń qaıta sýyryp alaıyn dese, qoly qumyranyń aýzyna keptelip qalyp, qaıta shyqpaı qoıady. Qumyraǵa ne bolǵany belgisiz, áıteýir, qoldy ábden obyp alyp, typyr etkizbeıdi. Sory qaınaǵan qyzmetshi qalaı bezildese de, eshteńe isteı almaıdy. Neǵurlym qolyn ózine qaraı tartsa, qumyra soǵurlym ony qysa túsetin tárizdi bolady.

Knázdiń záresi ushyp, dereý kómekke basqa qyzmetshilerin shaqyrady. Qyzmetshiler qumyraǵa jarmasa túsip, jabyla julqylaı bastaıdy.

— Qolym, oıbaı, qolym, — dep shyńǵyryp jiberedi qyzmetshi. Onyń bajyldaǵanyna qaramaı, basqa qyzmetshiler qumyrany odan da qatty julqylaı túsedi. Sóıtip turǵanda saldyr etkizip, qumyranyń kúl-parshasyn shyǵarady.

— Alda, qumyram-aı, — dep sanyn bir soǵady bop-boz bolǵan knáz.

— Ehe, ehe-he-he, onyń esesine qolym aman qaldy, — deıdi qyzmetshi qýana jymıyp.

Turǵandar qarasa, toly bir ýys taǵamdy qyzmetshi myqtap ýystap alǵan eken, sondyqtan qoly qumyranyń aýzyna keptelip qalypty.

---