Tańǵy shýaq kókjıekten kóringen
[ ] Býdılnık daýsynan emes, aǵamnyń óshir!, degen ashýly úninen oıandym. Jyp-jyly tósegimdi, qanbaǵam uıqymdy qımaı-qımaı oıandym. Býdılnıkti óshirdim. Úı ishi typ-tynysh. Kımimdi kıip, terezeden dalaǵa qarasam kún endi shyǵyp keledi. Dala tutas kóleńke. Esikti óz yńǵaıymen, ónerlep turyp, dybysyn shyǵarmaı ashatyn qasıetim bar edi. Esiktiń ashylǵanyn ózine de bildirtpeı ashyp, syrtqa shyqtym. Dalanyń qanyǵyn, keremettigin aıtyp jetkizý múmkin emes. Tap-taza aýamen tynyshtyqtyń keremet úılesimin bir jaǵymsyz ún qurtty. Ol ıttiń balasy laıka kúshigim. Meni kóre sala alasuryp, úrip jatyr. Árıne meni jaqsy kórgennen emes, qarnynyń ashqandyǵynan. Daladaǵy as úıge júgirip baryp 2 úzim nandy sýǵa bir malyp aldym da, aldyna laqtyra saldym. Úni óshtide qaldy. /Tańerteń erte turǵandaǵy negizgi maqsatym, meni taǵatsyzdana kútip turǵan, qadirmendi 42 taýyqpen 1 qorazyma tamaq berý úshin edi. Olar meniń kele jatqan daýsymdy estigennen gúbirlesip birdeńe dese bastaıdy. Sodan taýyq qoraǵa kirip jem salatyn ydys alyp shyǵamyn. Meniń taýyqtarymda ne úrký, ne qorqý degen joq bolatyn. Menimen jaǵalasatynda júretin. Ydysqa tórt tostaq kebek(kebek degenimiz taýyqqa beretin bir pále. sý qossań talqan sıaqty bolady), 1 tostaq bıdaı salyp, sýmen aralastyra bastaımyn. Tańǵy astaryn daıyndalý jolyn, tamashalap turǵan taýyqtar aǵash sharbaqty(al sharbaq degen, qorshaý) jaryp óterdeı umtylady. Tamaq daıyn bolǵansoń, syrtqy jyndy esikten kiremin(jyndy esik degenimiz, topsasy symnan jasalǵan, baǵytsyz, baǵdarsyz, ashýǵa tıip, jartylaı ashylatyn jeksuryn esik). Qolymdaǵy jem toly tostaqty tógip almaı, 42 taýyqty shyǵaryp almaı, bir keremet eptilikpen kiremin. İshke kirgen soń, qarbalas bastalady. 42-si 42 jaqtan maǵan qaraı umtylatyndary sonshalyq, meni jep qoıýǵa daıyn. Qolyma bir ýysyn alyp, jem salatyn astaýǵa salamyn. Salyp jatqanda qolymnyń shuqylmaǵan jeri qalmaıdy. Keıde jem aıaǵyma túsip ketkende, aıaǵymdaǵy jem taýsylǵansha álek bolam. /Tamaqtaryn berip, sýyn quıyp bolǵan soń, eńbegimniń aqysyn alamyn. Men keledi dep 14-15 jumyrtqany, jańa piskeı taba nandaı yp-ystyq qylyp daıyndap qoıady. Úıge kelip, qolymdaǵy kebek qaldyǵyn jýyp, tósegime kelip jatamyn. Qolymnan kebektiń ıisi ańqyp shyǵyp turady. Sol ıis júregime ystyq sezim uıalatady.
Jyldar ótip, qarıa bolǵan shaǵymda kebektiń ıisi murnyma kezdeısoq ilinip, kózime jas keletindeı. Bul jas, balalyq shaǵyma degen ystyq sezimmen, bir keremet saǵynyshtyń jasy bolary anyq.
Zakırov Omar:"Alǵabas" shyǵarmasynan úzindi.
You Might Also Like
