InfoHub Logo

Bıylǵy 2021 jyl, qazaqstandyqtar úshin aıtýly datamen órnektelip otyr. Bıyl el táýelsizdigine 30 jyl! Atalǵan sıfrdiń mán-maǵynasyn tolyqtaı túsindirý maqsatynda el Prezıdenti Qasym-Jomart Toqaev «Egemen Qazaqstan» gazetinde «Táýelsizdik bárinen qymbat» atty maqalasyn jarıalady.

Prezıdentimiz atalǵan maqalada Qazaqstan Respýblıkasynyń táýelsizdikke qol jetkizgennen keıingi kezeńin 3 onjyldyq esebinde bólip qarastyra otyryp, sanany sabyltqan jyldarda azattyq tańyn kútken halyqtyń keshegisi men búginin túgendep, bolashaqqa degen senimderin naqtylaı túsedi. Azattyqtyń alǵashqy jyldary, sovettikti eldikke, ujymdyqty ulttyqqa aýystyrýdyń kóptegen batyl qadamdary jasaldy .

Osy turǵydan  Qasym-Jomart Kemeluly : «Bul kezeńde memleketimizdiń ulttyq nyshandary belgilenip, bılik júıesi qalyptasty. Ulttyq valútamyz aınalymǵa endi. Ulttyq qorymyz uıymdastyryldy, Qarýly Kúshterimiz quryldy. Shekaramyzdy syzýǵa úlgiler usynyldy, Ata zańymyz kúshine endi. Sheteldermen dıplomatıalyq qatynas ornatyldy. Elimiz bedeldi halyqaralyq uıymdarǵa múshe boldy»,- dep táýelsizdigimizdiń irgetasy bolǵan alǵashqy 10 jyldyqtyń mańyzdy jaqtaryn ashyp kórsetti. Sonymen qatar, ıadrolyq qarýdan alǵashqylardyń biri bolyp bas tartý, elordamyzdyń Arqa tósine kóshirilýi , shette júrgen otandastarymyzdyń ata mekenge oralýyna jaǵdaı jasalynǵandyǵy jónindegi túbegeıli ózgeristerdi jazdy. Bul atalǵan jetistikter Alash azamaty Mustafa Shoqaıdyń: «óziniń ishki birligin nyǵaıta alǵan halyqtar ǵana táýelsizdigine qol jetkize alady jáne ony qorǵap qala alady» degen sóziniń dáıektiligin negizdedi.

Ekinshi kezeń jańa ǵasyrǵa jol siltep, 21 ǵasyrǵa aıaq basqan baǵytymyzdyń buralańǵa túspeýin kózdeıdi. Bul ýaqytty Prezıdentimiz «Qazaq eliniń keregesin keńeıtý kezeńi» dep kórsetedi. Aıtqandaı, osy jyldarda memleketimiz ishki-syrtqy baǵytta damyp, ekonomıkalyq áleýetimiz arta tústi. Qurlyqtaǵy barlyq shekaramyzdy aıqyndap, zań júzinde bekittik. «Mádenı mura» baǵdarlamasyn júzege asyryp, tarıhymyzdy túgendedik.

Úshinshi onjyldyq búgingi kúnge deıingi memlekettik áleýetimizdiń qarqynyn anyqtady, damyǵan otyz eldiń qataryna kirýge degen naqty múmkindikterdi mejeledi.

El basshysy bul jyldardy memlekettik damýdyń ishki-syrtqy óristeýin, bilim-ǵylym salasynyń,mádenıetimizdiń, qoǵamdyq, saıası jáne ekonomıkalyq baǵyttardyń bıik deńgeıge shyǵýymen baılanystyrdy.

Óz maqalasynda memlekettik tilge, memlekettik jerge, ulttyq múddege, yntymaqtastyq pen birlikke basa nazar aýdarǵan memleket basshysy: «Bizdi qaı zamanda da qıyndyqtardan aman alyp kele jatqan basty qudiret – el birligi. Yntymaǵy jarasqan jurttyń qashanda upaıy túgel. Túrli jaǵdaılarǵa baılanysty qazaq jerine ár kezeńde ártúrli ult ókilderi kóptep qonystandy. Qazaq halqy eshkimdi jat kórmeı, baýyryna basty. Búginde olardyń týǵan jeri de, Otany da – Qazaqstan. Biz kópetnostyq sıpatymyzdy artyqshylyǵymyzǵa aınaldyra alǵanymyz anyq. Kóptegen sheteldik sarapshylardyń elimizge qatysty «Eýrazıadaǵy shyrpy tıse lap etkeli turǵan qýraı», «failed state» sıaqty boljamdaryn joqqa shyǵardyq. Eshkimdi ultyna qarap, bóle-jarǵan joqpyz. Báriniń ósip-ónýine tolyq jaǵdaı jasadyq, birdeı múmkindik berdik. Bizdiń ultaralyq kelisim saıasatymyz álemdi moıyndatty. Halqymyzdyń osyndaı yrys-yntymaqqa negizdelgen jarasymyn baǵalaı bilýimiz kerek» -, degen pikirin shaqshadaı sanamyzǵa shegelep jetkizdi.

Jerge baılanysty «bárimiz aıqyn biletin jáne buljymaıtyn aqıqat – qazaqtyń jeri eshbir sheteldiktiń menshigine berilmeıdi, eshqashan satylmaıdy»-, dep kóńildegi kúdigimizdi birjolata óshirdi. Basty qundylyqtardyń biri memlekettik til máselesinde de Qasym-Jomart  Kemeluly qazaq tilin bilý, basqa tildiń qunyn tómendetýimiz emes, halyqtyq minberimizdiń mártebesin joǵarylatý ekendigin óz maqalasynyń qoǵam men qundylyq atty bóliminde birneshe mysaldarmen dáleldep  ótti.

«Tamyryn tereńge jibere almaǵan urpaqtyń, utymdy uranynan ne úlgi» degen eken,-  Ahmet Baıtursynuly. Prezıdentimiz bul taýyp aıtylǵan tirkestiń maǵynasyn bylaısha tarqatyp jazady: «Táýelsiz el bolý ony jarıalaýmen nemese memlekettiń irgetasyn qalaýmen shektelmeıdi. Táýelsizdik úshin naǵyz kúres kúndelikti eńbekpen, úzdiksiz ári dáıekti eldik saıasatpen máńgi jalǵasady. Biz qýatty táýelsiz memleketimizben ǵana ult retinde jer betinde saqtalamyz. Osy aınymas aqıqatty berik ustanýymyz qajet. «Táýelsizdik bárinen qymbat!» degen bir aýyz sóz máńgi uranymyz bolýǵa tıis.»

Aıbyny asqaq Abylaıhan: «Sheshenniń sózi ólmeıdi, tektilerdiń isi, izi óshpeıdi! Butaqqa sý, urpaqqa Rýh bermeseń – kógermeıdi!» degende, arǵy alapat babasy Kúlteginniń kıeli rýhynan qýat alǵan shyǵar-aý…. Kóregendi basshymyzdyń máıekti maqalasyn aqyl tarazysyna sala otyryp sózimizdiń túıini, sonaý sańlaq saqtardyń soıylyn soǵyp, ǵundardyń ǵurpynan nár alǵan, túrkilerdiń tektiligin, kıeli qazaq handyǵynyń qasterli rýhyn, batyrlar men bılerimizdiń bedelin boıǵa jınaǵan ultymyz úshin táýelsizdik táńirdiń eń baǵaly syıy bolyp qala bermek. Al, bul máselede keń baıtaq jerimizdi, daryndy ultymyzdy, shuraıly tilimizdi, halyqtyq ónerimizdi saqtap qalý úshin bárimiz birigip, qol ustasyp, sapqa turatyn ýaqyt keldi.

Janbolatova Ásıla

---