InfoHub Logo

Zıandy ádetinen arylǵan shylymqorlar kóp jaǵdaıda artyq salmaq jınaıdy.

AQSH ǵalymdary ózderiniń jańa zertteýlerinde shylym shegý aǵzaǵa maıdy jańqalaýǵa kómektesetin genniń belsendiligin kúsheıtetinin dáleldegen. Zertteý nátıjeleri Chest jýrnalynda jarıalanǵan.

Kóptegen adam shylym shegýdi doǵarǵan soń nege salmaq jınaıtyny ǵalymdardy burynnan qyzyqtyryp keledi. Buǵan tábettiń joǵarylýy, sonymen qatar, ádette nıkotın jedeldetip júrgen metabolızm deńgeıiniń tómendeýi sebep retinde atalǵan bolatyn.

Nú-Iorktaǵy Kornel ýnıversıtetiniń dárigeri Holı Vannı (Holly Vanni) men onyń áriptesteri shylym shekpeıtindermen salystyrǵanda shylym shegetinderdiń tynys jolyndaǵy jasýshalarynda AZGP1 geniniń belsendiligi joǵary ekeni anyqtalǵan.  Bul gen maıdy jańqalaý men salmaqty turaqtandyrýǵa qatysatyndyqtan, shylym shegýshilerdiń ekinshilerine qaraǵanda aryqtaý bolatyny jáne shylym shegýdi doǵarǵan soń salmaq jınaıtyny osydan bolýy múmkin.

Zertteýlerge súıensek, shylym shegý men salmaqtyń baılanysy molekýlárlyq negizge ıe, naqtyraq aıtsaq, shylym shegý kezinde AZGP1 geniniń belsendiligi artady. Bul gendi zertteýmen baılanysty aldyńǵy zertteýler bul genniń tyshqandardyń maı mólsherin retteıtinin kórsetken, sonymen qatar, qaterli isikke ushyraǵan jáne osynyń saldarynan salmaq tastaǵan aýrýlardyń jasýshalarynda AZGP1 geniniń belsendiligi artýy múmkin.

Degenmen, bul shylym shegýden bas tartýdan salmaq qosý genetıkalyq beıimdiliktiń saldarynan bolatynyn bildirmeıdi. Ǵalymdardyń pikirinshe, shylym shegý men salmaqtyń ara-qatynasy áldeqaıda kúrdeli, jáne bul proseske tamaqtaný men fızıkalyq belsendilik sıaqty kóptegen faktorlar áser etedi.

---