InfoHub Logo

Qolym bosta stýdent kezde arnaǵan qoıyn dápterimdi ashyp oqydym…İshinde talaı–talaı estelikter jazylypty. Ótken kúnderdiń qyzyqty sátteri kóz aldyńa tizilip eske túsedi. Paraqtap otyryp, ishinen erekshe bir jazylǵan estelikke kózim tústi. Iá, naǵyz estelik degen osy bolar! Mektep bitirgenimizge 2 jyl tolǵanda ustazymnyń maǵan arnap jazǵan esteligi eken. Al, mektepti bitirgenimizge 14 jyl ótip, aramyz alshaqtasa da ustazymmen áli kúnge deıin habarlasyp, kezdesip turamyz.

Men úshin shyn júrekten jazylǵan sol bir izgi tilekterdiń arqasynda oqýymdy qyzyl dıplommen aıaqtap, mamandyq ıesi bolyp, bilimniń bıik shyńyna órmelep, ómirdegi asqar taýdaı armandarymdy oryndaýǵa tyrysyp kelemin.

Sol ustazym - Mahanbetova Gúlaıym qazirgi tańda Panfılov mektebiniń dırektory, qazaq tili men ádebıeti pániniń muǵalimi. 5-synypta jetekshilikke alǵash kelgen kúnnen bastap, óte qarapaıym, aqyldylyǵymen, júris-turysymen meni ózine birden baýrap alǵan edi. Qazaq tilinen olımpıadaǵa sen barasyń degen kúninen bastap aramyz jaqyndaı tústi. Ustazǵa degen súıispenshiligim arta túsip, aınymas dostarǵa aınaldyq.

4-synypqa deıin anama eliktep, bastaýysh synyp muǵalimi bolamyn deýshi edim. 5-synypqa ótkennen soń, ustaz mahabbaty jeńip qazaq tili men ádebıetin tańdadym.

Mine, «Armandar oryndalady - maqsattar aıqyn bolsa» - degen ras eken. Qazirgi tańda ustazymmen áriptes bolyp, habarlasyp otyramyn. Ómirdegi ekinshi anama, syr bóliser syrlas dosyma aınalyp úlgergen desem, artyq aıtpaǵanym.

«Ustaz ben shákirt arasynda umytylmas dostyq bolady. Kim de kim ustazymen umytylmas dostyqta bolsa, ol jan úlken baqytqa ıe bolady»- dep jazyppyn mektepte oqyp júrgenimde.

Ulaǵatty ustazyma arnap kúndeligimdi shımaılap, ár kezderde jazylǵan shýmaq óleńderimdi de tizgim kelip otyr.

Eń aıaýly ustazym meniń,
Boldyń maǵan qımas dos óziń.
Júrektegi bar tilegin,
Arnaıdy sizge óz shákirtiń.

Oqyttyńyz jeti jyl bizdi,
Úırettińiz bar bilimdi.
Jaqsy kórip qalyppyn ǵoı,
Óz anamdaı ustazym sizdi.

Ustazym meniń ustazym,
Keledi ózińe uqsaǵym.
Sizdeı ustaz bola alsam,
Oryndalar armanym dep shyn nıettengen ekenmin  balalyq, jastyq shaǵymda…

* * *

Ustazym- ekinshi anam aıalaǵan!
Shákirtinen bilimin aıamaǵan.
Árbir aıtqan aqylyń júregimde,
Kerek kezde bolady saıa maǵan!!!

* * *

Jan ustazym jaqsy kórem ózińdi,
Saǵynyshym túsime jáne engizdi.
Kezdesip bir qaýyshyppyz ekeýmiz,
Shyn asyǵa kúter edim sol kúndi.

* * *                     

Jan ustazym túsime jıi kiresiz,
Tús qadirin saǵynsańyz bilersiz.
Sheksiz mende sizge degen saǵynysh,
Sonda da siz jaýap qatpaı júresiz.

* * *

Saǵynyp seni ustazym,
Esime ár kez alamyn.
Estigim kep daýsyńdy,
Qońyraý ár kez shalamyn.

Saǵyna berem ózińdi,
Ol úshin aıyp etpeńiz.
Joldaǵan úzik bul syrdy,
Shákirtińiz dep bilińiz.

* * *

Ekinshi anam bola bildiń ómirde,
Syrlarym joq sizge aıtpaǵan kóńilde.
Dostyǵymyz máńgi bolsyn tilerim,
Rıza bolam maǵan kóńil bólgende.

* * *

Bilim bergen sharshamaı bizge,
Aqylmenen  salatyn jónge.
20 jyl birge dos boldyq mine,
Myń alǵys aıtam ustazym sizge.

Maqtaral aýdany, Asyqata kenti
"Názir Tórequlov atyndaǵy №121 JOM" KMM-niń
qazaq tili men ádebıetá páni muǵalimi Týltaeva Perýza

---