InfoHub Logo

Muzdaı balmuzdaqtyń kesiri Botanyń tamaǵyna ashkúzenshe jabysty. Naızaǵaıly bıylǵy jazdyń maýsym aıynda kóktegi altyn kún tóńirekti órtep jibererdeı kóringen. Sondyqtan qazbaýyr bulttar jer betine jańbyryn jıi-jıi tóge salady. Bota ózi qaǵilez bala, aýyrǵaly anasy qansha tyqpalasa da, bir qasyq balǵa qaraǵysy, bir kese aırandy jutqysy joq, nár tatpastan mıneral sýyn ǵana unatyp ishedi. Tipti táýir bolsa da bótelkedegi sýǵa tónip turady, shetinen simire bergennen jalyǵar emes.

Nazym aýladan júgirip kirdi, shóldep, shólirkep sý ishti.

— Bota meniń mıneral sýymnan ishpe! — dep oǵan tyıym saldy. Sebebi, bul úıde bala sál syrqattanyp qalsa, soǵan aıryqsha yqylas tanytatynyna úırengen.

— Joq, ishpesin, sý meniki, ol aýyrǵan joq, — dep qıqarlyq tanytty Bota ózimshildikpen, ylǵı sińlisine ozbyrlyq qylýǵa daǵdylanǵan ádetpen. Ústel basynda qaz-qatar otyratyn eki balanyń dúrdaraz bolyp tatýlasýy da op-ońaı, uıalas kúshikter tárizdi talasa ketedi. Artynsha Bota tisti baqadaı jabysa ketip, Nazymnyń shashynan julyp, ústine sorpa tógip jiberdi. Nazymnyń kózinen jas yrshyp ketti. Botanyń shataqqumarlyǵynan ábden sharshady. Shyrq buzyp ókpelete berse, qashanǵa tózsin. Sol-aq eken, anasy móldir kók qutynyń ishindegi ájeptáýir mol sýdy Botanyń basyna quıa saldy.

— Ylǵı janjal shyǵarasyń da, baýyryńa kún kórsetpeısiń! Má, saǵan keregi osy shyǵar!

Sońǵy kezde ózin erekshe mápelep, baǵyp-qaqqan súıikti anasynan mundaı mazaq qylyq kútpegen. Bota qatty shamdanyp baqyryp jylady. Moıyndaý kerek, bul ekeýi shybyq tımeı, shyńq eter balalardan. Ol balkonǵa atyp shyǵyp, esigin syrttan jaýyp aldy. Kóz jasynan hám aıanyshty únnen anasynyń jany kúızele bastaǵan. Kóp uzamaı Bota baqyrýyn qoıyp, sap tıyldy. Biraq degbiri qashqan anasy ishten, áınektiń ar jaǵynan anyq kórdi, onyń názik ıyǵy dirildep, áli de jylap otyrǵandaı.

— Kúnim-aý, tamaǵyńdy ishe ǵoı, sýyp qalady, — dep daýystady anasy qyzyn birtúrli aıap ketip, alaıda tóbesinen sý quıǵanyna esh ókinbesten. — Óziń kináli, túkke turmaıtyn nárseni ulan-ǵaıyr qylǵan.

Bota men Nazymnyń anasy qyzyq. Minezi jumsaq, uzaq qatal bola almaıdy. Ol kóp keshikpeı, kishkene qyzyn balkonnan jalynǵandaı, súıregendeı qushaqtap alyp shyqty. Baǵanaǵy baqyrǵan daýys qaıta jandandy, múldem kúsheıip, ozandap bir basyldy. Beti-qolyn jýyp, betinen bir súıse balasynyń kóz jasy lezde qurǵaı qalatynyn bilip, syralǵy anasy Botany aınalyp, úıirilip-aq jatyr. Eń qyzyǵy, anasy erkeletken saıyn jylaýyq qyz bala bulaqsha aqqan kóz jasyn kilt tyıa qoıdy da, anasynyń betine kúle qarap:

— Mama, men kórdim, uıada bes jumyrtqa jatyr eken, — dep aıtty.

— Qaıdaǵy uıa?

— Bizdiń balkonnyń shetinde uıa bar.

Bul maǵlumattyń erekshe mańyzdy ekeni onyń badyraıǵan úlken tanakózinen bilindi, al kirpigi bólek-bólek, sý-sý. Qas qaqqansha Bota ókpesin umytqysy kelmeı, qaıtadan buzyla qaldy, jas taǵy saýlap ketti. Erkeniń kózi jasty. Arada bes mınýt ótkende ol as bólmede montıyp tamaǵyn iship otyrdy.

---