InfoHub Logo

Elorda qalasynyń Bilim basqarmasy bilim mekemelerinde aqsha jınaý faktilerin boldyrmaýǵa baǵyttalǵan aksıany iske qosty, dep Elorda Info saıty habarlaıdy.

#Alym-salyqqa jol joq sharasy «Astana - Adaldyq alańy» jobalyq keńsesimen birlesken joba.

«Eger bilim berý mekemelerinde zańsyz áreketterge tap bolsańyz 55-68-83, 55-68-73 telefon nomerlerine habarlasýdy suraımyz», - dedi Bilim basqarmasynyń basshysy Ánýar Janǵozın.

Aıta keteıik, qala mektepteriniń qajettiligi úshin búdjetten 149 ataý boıynsha qarjy bólinedi. Onyń ishinde ákimshilik personal úshin keńse zattary (bor, tabelder, maqtaý qaǵazdary jáne t.b.), sanıtarlyq tazalyqty qamtamasyz etetin zattar, santehnıkalyq jabdyqtar, sporttyq taýarlar (dop, torlar, qanattar jáne t.b.), qurylys materıaldary bar.  

Al balalary balabaqshaǵa baratyn ata-analar aı saıynǵy tólemnen bólek, kelesi zattardy óz qarajattaryna satyp alýlary tıis: keńse zattaryn (ermeksaz, qatty qaǵaz, túrli-tústi qaǵaz, qarandashtar, boıaýlar, flomaster, álbom, qaıshy, jelim jáne t.b); jumys dápterlerin (joǵary jáne daıarlyq toptary úshin). Budan bólek, kezekshilik jáne demalys kúndergi toptar úshin, damytý jáne bilim berý úıirmeleri úshin aqy ata-ananyń qalaýy boıynsha tólenedi.

Eske salaıyq, 2018 jyldyń 28 tamyzynda Astana qalalyq Bilim basqarmasynyń ata-analardan zańsyz aqsha jınaýǵa tyıym salynatyny týraly buıryǵy shyqty. Buıryqtyń oryndalýyna baqylaýdy Bilim basqarmasynyń basshysy Ánýar Janǵozın ózi júrgizbek. 

---