InfoHub Logo

Úsh jolaýshy kele jatsa, aldynan bir adam qarsy shyǵyp:

— Beımezgil júrgen túıe kózderińe túspedi me? – dep surady.

Jolaýshynyń bireýi:

— Túıeńniń oń kózi soqyr ma edi? – deıdi.

Joqshy:

— Iá,– dep basyn ızeıdi. Ekinshi jolaýshy:

— Túıeńniń oń jaq artqy aıaǵy aqsaq pa edi? – dep suraıdy.

— Durys! Sol jaq artqy aıaǵynyń syltyǵy bar edi,– deıdi. Sonan soń, úshinshi jolaýshy:

— Túıeńniń quıryǵy sholaq pa, edi? – dep suraıdy. Joqshy:

— Iá,  quıryǵy sholaq, – dep, asyǵyp jaýap beredi de: – ol túıeni qaıdan kórdińizder? – dep suraı bastaıdy. Jolaýshylar:

— Kórgenimiz joq, – deıdi.

— Kórmeseńder, túıemniń belgisin qaıdan bildińder? Túıemdi sender urladyńdar! – dep joqshy jabysa ketedi. Jolaýshylar:

— Aý, janym, deniń saý ma? Túıeńdi urlamaq túgil kórgenimiz de joq, – deıdi.

Joqshy bul jaýapqa qanaǵattanbaıdy. Tórteýi bir bıge kelip, júginedi. Bı surastyra kele:

— Urlamasańdar, kórmeseńder, ol túıeniń beıne-belgisin, kórgen kisideı anyqtap, baıqap, qaıdan bildińder? – deıdi. Jolaýshylar:

— Biz ury emespiz, mal baqqan, malmen kózimizdi ashqan sharýanyń balalarymyz, sondyqtan bildik. Biz toǵyshar emespiz, – dep, jaýap beredi.

— Qalaı bildińder? – dep, bı qaıta suraıdy.

Jolaýshylar:

— «Túıeniń oń kózi soqyr ma edi?» degenimiz: túıe bara jatyp, ylǵı joldyń sol jaǵyndaǵy shópti jepti, oń jaqtaǵy shópti jemepti. Aıaǵynyń aqsaǵyn  bilgenimiz: turǵan jerinde, túıe artqy sol aıaǵyn  kóterip  turypty. Túıeniń quıryǵy sholaq ekenin bilgenimiz: qumalaq tastaǵanda, alysqa jiberipti. Sholaq túıeniń qumalaǵy alysqa túsedi, quıryqty túıe qumalaǵyn alysqa tastaı almaıdy, – depti.

---