ادام ءومىرىنىڭ ماقساتى.3
ادام ءومىرىنىڭ ماقساتى.3
اباي ادامنىڭ نەگىزگى ماقساتىنا جەتۋدىڭ جولىن دا كورسەتەدى. ونى ويشىلدىڭ ايگىلى «اللانىڭ ءوزى دە راس، ءسوزى دە راس» ولەڭى مەن وتىز سەگىزىنشى قارا سوزىنەن تابامىز. ويشىل تۇجىرىمى بويىنشا نەگىزگى ماقساتقا جەتۋ جولى – اللاعا دەگەن سۇيىسپەنشىلىك. بۇل تۋرالى اباي بىلاي دەپ جازادى:
ماحابباتپەن جاراتقان ادامزاتتى،
سەن دە ءسۇي ول اللانى جاننان ءتاتتى.
ادامزاتتىڭ ءبارىن ءسۇي باۋىرىم دەپ،
جانە حاق جولى وسى دەپ ادىلەتتى.
وسى ءۇش ءسۇيۋ بولادى يماني گۇل،
يماننىڭ اسىلى ءۇش دەپ سەن ءتاحقيق1 ءبىل.
ويلان داعى، ۇشەۋىن تاراتىپ ب ا ق،
باستى بايلا جولىنا، مالىڭ تۇگىل.
ءدىن دە وسى، شىن ويلاساڭ، تاعات2 تا وسى،
ەكى دۇنيە بۇل تاسديق3 - حاقتىڭ دوسى.
وسىلادى بۇزاتىن جانە ءۇش ءىس بار:
پايدا، ماقتان، اۋەسقوي – ونان شوشى.
بۇل ولەڭنىڭ ءبىرىنشى شۋماعىنان، ابايدىڭ ءوزى جازىپ وتىرعانداي، يماننىڭ ءۇش اسىلىن كورەمىز. بۇلار – ءومىردىڭ نەگىزگى ءمانىن بىلدىرەتىن تۇجىرىمدار. ولاردىڭ ءبىرىنشىسى، «اللا تاعالا ادامزاتتى ماحابباتپەن جاراتقان». ەكىنشىسى، سول سەبەپتى، «ول اللانى سەنىڭ دە ءسۇيۋىڭ جانە جاننان ءتاتتى ءسۇيۋىڭ كەرەكتىگى». ءۇشىنشىسى، «ادامزاتتىڭ ءبارىن ءسۇي باۋىرىم دەپ جانە حاق جولى وسى دەپ ادىلەتى».
ەندى وسى تۇجىرىمداردى ويشىلدىڭ ءوزى نۇسقاعانداي، ويلانىپ، تاراتىپ باعايىق. ءبىرىنشى، «ادامزاتتى ماحابباتپەن جاراتقان» دەگەن تۇجىرىم ومىردەگى ماحاببات كوزىنىڭ قايدا جاتقانىن بىلدىرەدى. ول – اللا تاعالا ەكەن. وتباسىنداعى جۇبايلار، اتا-انا مەن بالا، تۋعان-تۋىسقان، دوستار اراسىنداعى ماحاببات تۇرلەرى، سايىپ كەلگەندە، اللا تاعالادان شىعىپ، سونىڭ شاپاعاتى بولىپ تابىلادى. سەبەبى ول ادامزاتتى ماحابباتپەن جاراتقان. ياعني ادام ءومىرىنىڭ، ءتىپتى بۇكىل بولمىستىڭ جالپى سەبەبى بار. ول – اللا تاعالانىڭ ماحابباتى. وتباسى، ءتۇرلى قوعامداستىقتار، حالىقتار، ءتىپتى بۇكىل ادامزات ءومىرى وسى ماحابباتقا بايلانىستى. ماحاببات سەزىمى ادامداردى بىرىكتىرىپ، جاقىنداستىراتىن كۇش. بولمىستىڭ قانداي ءتۇرى بولسا دا – ماحاببات كورىنىسى. ماحاببات بار جەردە بىرلىك بار. ال ول جويىلعاندا بارلىعى بىر-بىرىنەن الىستاپ، بەيبەرەكەت بولىپ تاراپ كەتەدى. ماحابباتتىڭ ەڭ جوعارعى شىڭى – اللا تاعالاعا دەگەن ماحاببات. ەگەر اللا تاعالاعا دەگەن ماحاببات بولسا، وندا ونىڭ بارلىق جاراتقاندارىنا دەگەن ماحاببات تا بولادى. ايتالىق، اشىق كۇنى تابيعاتقا ساۋلەسىن شاشىپ تۇرعان كۇن بىزگە قانداي ۇناسا، ونىڭ ساۋلەسى دە سونداي ۇنايدى. كۇننىڭ ساۋلەسىن كورىپ ءبىز ونىڭ ءوزىن كورەمىز. سول سياقتى، ەگەر اللا تاعالانى سۇيسەك، ودان جاراتىلعانداردىڭ بارلىعىن دا سۇيەمىز. ونىڭ جاراتقاندارىن كورىپ، ءبىز ونىڭ ءوزىن دە سەزىنەمىز. اللا تاعالانىڭ ماحاببات قۋاتى – بۇكىل بولمىستى بىرىكتىرەتىن كۇش. ول كۇش بولماسا بولمىستىڭ ءبىرتۇتاستىعى دا بولماس ەدى. ادامزات قوعامىنىڭ وتباسىنان باستاپ ۇلكەن يمپەريالارعا دەيىن ءبولىنىپ، بولەك-بولەك بولىپ ىدىراپ، جويىلىپ جاتۋىنىڭ سەبەبى وسى. قوعام ومىرىندە وتباسىنىڭ بۇزىلۋى، ال مەملەكەت دەڭگەيىندەگى بۇرىنعى كەڭەس وداعىنىڭ ىدىراۋى وعان جاقسى مىسال بولا الادى.
بۇل ولەڭدەگى ابايدىڭ بەرەتىن ەكىنشى ماڭىزدى تۇجىرىمى – ول سەنىڭ دە ول اللانى ءسۇيۋىڭ كەرەكتىگى. جانە ول ءسۇيۋدىڭ جوعارىلىعى سونداي – ءتىپتى جاننان دا ءتاتتى بولۋى كەرەك. ەگەر اللا تاعالا سەنى سۇيسە، وندا «سەن دە ءسۇي ول اللانى جاننان ءتاتتى» دەپ اقىن ونى ادامنىڭ مىندەتى رەتىندە كورسەتەدى. ويشىل وسى ويىن وتىز سەگىزىنشى قارا سوزىندە دە قايتالايدى. ول اللا تاعالانىڭ ادامدى ماحابباتپەن جاراتقانىن دالەلدەي كەلىپ «كىم وزىڭە ماحاببات قىلسا، سەنىڭ دە وعان ماحاببات قىلماعىڭ قارىز ەمەس پە؟» دەپ ادامدى مىندەتتەي جازادى. ءسويتىپ اباي اللا تاعالاعا، ماحابباتقا جەتۋدى ولەڭىندە دە، قارا سوزىندە دە انىقتاي ءتۇسىپ، ونى مىندەت رەتىندە كورسەتەدى. اللا مەن ادامنىڭ اراسىنداعى سۇيىسپەنشىلىكتى اقىننىڭ وسىلاي نىقتاپ كورسەتۋىنىڭ سەبەبى – بۇل نەگىزگى ماقساتقا جەتۋدىڭ، ءتۇپ يەگە قايتۋدىڭ كەپىلى. باسقا جول جوق. اللا تاعالا ءوزىن سۇيگەندى ەرەكشە ءسۇيىپ، ونى وزىنە قايتارىپ الادى.
(جالعاسى بار)
ازىرلەگەن
بەگىمحان كەرىمحان ۇلى
م.اۋەزوۆ اتىنداعى جوبب مەكتەبىنىڭ قازاق ءتىلى مەن ادەبيەتى ءمۇعالىمى
پاۆلودار قالاسى
قازاقستان جۋرناليستەر وداعىنىڭ مۇشەسى
[1] انىق، ايقىن؛ ورىنداۋ، ىسكە اسىرۋ
[2] اللاعا عيبادات قىلۋ، بوي ۇسىنۋ
[3] شىندىق، سەنىم
You Might Also Like
-
البەتتە، دەنى ساۋ، سالاۋاتتى ءومىر كەشىپ، بۇل ءومىردىڭ راقاتىن تابۋ ءۇشىن اركىم ەڭ اۋەلى ءومىردىڭ تۇپكى ماقساتىن، ياعني نە ءۇشىن ءومىر سۇرەتىنىن، انىقتاپ الۋى كەرەك. ادامنىڭ بارلىق ىس-ارەكەتىنىڭ سيپاتى، يا...
-
نەمەرەلەرى ۇيگە سيرەك كەلەدى. سيرەك كەلگەنى بىلاي تۇرسىن، «اتالارىڭنىڭ تىنىشىن الماڭدار» دەپ كۇنى بۇرىن كەلىندەرى وقىتىپ قويا ما قايدام، ايتەۋىر، كەلۋلەرىنەن كەتۋلەرى جىلدام. تىنىشىن الا...
